«مەملەكەت باسشىسى وڭتۇستىك قازاقستان وبلىسىنا جۇمىس ساپارى بارىسىندا بارشا قازاقستاندىقتاردى كوكتەم مەرەكەسى – ناۋرىزبەن قۇتتىقتادى» دەپ حابارلايدى اقوردانىڭ ءباسپاسوز قىزمەتى.

– بۇل وڭىردە مەرەكەلىك شارالار نەگىزگى مەيرامنان توعىز كۇن بۇرىن باستالادى. ءار كۇنگە ءمان-ماڭىز بەرۋ جانە ونى ىزگى ىستەرگە ارناۋ – جاقسى باستاما. سونىڭ ارقاسىندا ناۋرىز ناعىز ىزگىلىكتىڭ مەرەكەسىنە اينالىپ كەلەدى. بۇل – باسقا وڭىرلەرگە ۇلگى بولارلىق باستاما، – دەدى نۇرسۇلتان نازارباەۆ.

قازاقستان پرەزيدەنتى مەملەكەتتىڭ ءبىلىم بەرۋ، دەنساۋلىق ساقتاۋ، جاستار ساياساتى ماسەلەلەرىنە ايرىقشا كوڭىل ءبولىپ وتىرعانىن اتاپ ءوتتى.

– بۇگىن وسىندا كوپتەگەن جاستار وتىر. ءبىز جاستارىمىزدىڭ جاقسى ءبىلىم الۋى ءۇشىن جاڭا بالاباقشالار، مەكتەپتەر، ۋنيۆەرسيتەتتەر سالىپ جاتىرمىز. وبلىستا «بالاپان» باعدارلاماسى اياسىندا مەكتەپكە دەيىنگى بىلىممەن بالالاردىڭ 70 پايىزى قامتىلعان. سونىمەن قاتار، انا مەن بالا ءولىمىنىڭ دەڭگەيى 20 پايىزعا تومەندەدى. ءار وبلىستاعى مەديتسينانى دامىتۋ ماسەلەسىنە زور كوڭىل ءبولۋدىڭ ارقاسىندا قازاقستاندىقتاردىڭ ورتاشا ءومىر جاسىنىڭ ۇزاقتىعى 70-كە جەتتى. بۇل ءبىزدىڭ ەلىمىزدىڭ زور تابىسى ءارى دامۋىنىڭ كورسەتكىشى دەپ ەسەپتەيمىن، – دەدى مەملەكەت باسشىسى.

نۇرسۇلتان نازارباەۆ الەمدەگى داعدارىس قۇبىلىستارىنا قاراماستان، قازاقستان جۇيەلى دامۋىن جالعاستىرىپ كەلە جاتقانىن، بۇعان ءوڭىردىڭ الەۋمەتتىك-ەكونوميكالىق كورسەتكىشتەرى ايعاق ەكەنىن اتاپ ءوتتى.

– وڭتۇستىك قازاقستان وبلىسىندا بۇكىل ەل حالقىنىڭ 17 پايىزى تۇرادى. ءوڭىر اۋماعى ارقىلى ءىرى تەمىرجول ماگيسترالى وتەدى، «باتىس ەۋروپا – باتىس قىتاي» حالىقارالىق ترانزيتتىك كولىك ءدالىزى سالىندى. اۋەجاي قايتا جوندەلۋدە. وسى جىلدار ىشىندە وبلىس ۋران ءوندىرىسىنىڭ الەمدىك ورتالىعىنا اينالدى. بۇگىندە ءوڭىردىڭ كەنىشتەرى جاھاندىق ۋران ءوندىرىسىنىڭ 35 پايىزىن قامتاماسىز ەتىپ، ءبىرىنشى ورىن يەلەنىپ وتىر، – دەدى مەملەكەت باسشىسى.

سوڭىندا ەلباسى «نۇر وتان» پارتياسىنىڭ تاياۋدا وتكەن XVI سەزىندە بەلگىلەنگەن جاڭا ماقساتتار مەن مىندەتتەر تۋرالى ەسكە سالىپ، بارلىق باعىتتار بويىنشا جۇمىستى جالعاستىرۋعا شاقىردى جانە جينالعاندارعا تابىس پەن باق-بەرەكە تىلەدى.

شارا بارىسىندا سونداي-اق ارداگەرلەردىڭ وبلىستىق كەڭەسىنىڭ توراعاسى ج.ماۋلەنقۇلوۆ، قازاقستان حالقى اسسامبلەياسىنىڭ مۇشەسى ن.شەۆچەنكو، جاستار وداعىنىڭ مۇشەسى ج.وسەرباەۆ ءسوز سويلەدى.

سالتاناتتى شارا تەاترلاندىرىلعان كورىنىس پەن كونتسەرتتىك باعدارلاماعا ۇلاستى.

مەرەكە قالانىڭ جاڭا اكىمشىلىك ورتالىعىنداعى «اۋىلىم - التىن بەسىگىم» بارەلەفتىك ساحناسى مەن «كوكپارشى»، «قىز قۋ»، «تەڭگە الۋ»، «بۇركىتشى» ارحيتەكتۋرالىق-دەكوراتيۆتىك كومپوزيتسيالارىن بىرىكتىرگەن «ناۋرىز الاڭىندا» ءوتتى. جالپى اۋماعى 50 گەكتار بولاتىن بىرىڭعاي ارحيتەكتۋرالىق ءانسامبلدىڭ قۇرامىندا تاريحي-ولكەتانۋ مۋزەيى، ءداستۇر جانە عۇرىپتار ورتالىعى، ەتنوپارك، جاساندى كول جانە قولدانبالى ونەر شەبەرحاناسى دا بار. 

اباي-اقپارات.