«ەلىمىزدە وتكەلى جاتقان باستى ساياسي ناۋقاندا جاڭا ەسىم پايدا بولدى. بۇگىن كاسىپوداقتار ۇيىمىنىڭ كوشباسشىسى، قاراعاندى وبلىسىنىڭ ەكس-اكىمى ابىلعازى قۇسايىنوۆ قر پرەزيدەنتىن سايلاۋعا قاتىسۋ ءۇشىن ورتالىق سايلاۋ كوميسسياسىنا قۇجات تاپسىردى» دەپ حابارلايدى Baq.kz

وسك عيماراتىنا كەلگەن ابىلعازى قالياقپارۇلى جۋرناليستەرگە سۇحبات بەرىپ، بۇل قادامعا نەلىكتەن بارعاندىعىن جانە قانداي ناتيجە كۇتەتىندىگىن ايتتى.
- داۋىس بەرۋ ۋاقىتى باستالمايىنشا سايلاۋدىڭ ناتيجەلەرى تۋرالى ايتۋ ارتىقتاۋ. پرەزيدەنتتىك سايلاۋ - قوعامداعى وزەكتى ماسەلەلردى كوتەرىپ، ءاربىر ازاماتتىڭ ماڭىزدى پروبلەمالارىنا نازار اۋدارۋعا شاقىراتىن شارا. ماسەلەن، ول ەكولوگيالىق جانە وندىرىستىك قاۋىپسىزدىك سىندى ماسەلەلەر بولۋى مۇمكىن، - دەدى ءا.قۇسايىنوۆ.

ابىلعازى قالياقپارۇلى قۇسايىنوۆ - 1952 جىلى 6 اقپاندا قاراعاندى وبلىسىنىڭ تەلمان اۋدانى مايوزەك كەنتىندە تۋعان.
قاراعاندى تاۋ-كەن تەحنيكۋمىنىڭ تاۋ-كەن فاكۋلتەتىن (1971) تەحنيك-شاحتا سالۋشى ماماندىعى بويىنشا; قاراعاندى پوليتەحنيكالىق ينستيتۋتىنىڭ اۆتوجول فاكۋلتەتىن (1981) ينجەنەر-مەحانيك ماماندىعى بويىنشا; رەسەي باسقارۋ اكادەمياسىنىڭ ساياساتتانۋ فاكۋلتەتىن (1992) ساياساتكەر (الەۋمەتتىك-ساياسي ماسەلەلەر جانە بايلانىس بويىنشا كەڭەسشى) ماماندىعى بويىنشا بىتىرگەن.
ەڭبەك ءوتىلىنىڭ ءار جىلدارىندا ول قر ەكونوميكا جانە ساۋدا ۆيتسە-ءمينيسترى، يندۋستريا جانە ساۋدا ۆيتسە-ءمينيسترى، كولىك جانە بايلانىس ۆيتسە-ءمينيسترى، كولىك جانە بايلانىس ءمينيسترى (2009-2011 جىلدارى), قاراعاندى وبلىسىنىڭ اكىمى (2012-2013 جىلدارى) قىزمەتىن اتقارعان.
بۇگىنگى تاڭدا ابىلعازى قالياقپارۇلى قازاقستان كاسىپوداقتار ۇيىمىنىڭ كوشباسشىسى. 

اباي-اقپارات.