ۇمىتكەر ءۋاليحان قايساروۆ مەملەكەتتىك ءتىلدى ەركىن مەڭگەرگەنىن دالەلدەيتىن سىناقتان تاعى دا وتە المادى. بۇل تۋرالى قر پرەزيدەنتتىگىنە كانديداتتاردى مەملەكەتتىك ءتىلدى ەركىن مەڭگەرگەندىگىن انىقتاۋ جونىندەگى لينگۆيستيكالىق كوميسسيانىڭ توراعاسى مىرزاتاي جولداسبەكوۆ مالىمدەدى.

- ءۋاليحان ءابىشۇلى سىناق بارىسىندا «تاۋەلسىز مەملەكەتتەردىڭ دوستاستىعى: تاريحى مەن بۇگىنى» اتتى تاقىرىپتا شىعارما جازدى. مەنىڭ تاڭقالىپ وتىرعانىم، ءۋاليحان ءابىشۇلى تاقىرىپتى تۇسىنبەدى. ول ءوز شىعارماسىندا رەسەيگە بوداندىق، قازاقستاننىڭ قىتايمەن تاتۋ قارىم-قاتىناسىمىز تۋرالى جازعان. ۇمىتكەر شىعارمادا 23 قاتە جىبەردى. اتاپ ايتساق، تىنىس بەلگىسىنەن 11, ەملەدەن 5, ستيليستيكالىق 7 قاتە كەزدەستى. ەلىمىزدىڭ پرەزيدەنتى ەڭ ساۋاتتى ادام بولۋى ءتيىس. سوندىقتان كوميسسيا ءۋاليحان قايساروۆتى ۇمىتكەرلەر قاتارىنا لايىق ەمەس دەپ تانىپ وتىر، - دەدى مىرزاتاي جولداسبەكوۆ.

سونداي-اق، پرەزيدەنتتىككە ءوز كانديداتۋراسىن ۇسىنعان ۋ.قايساروۆ شىعارماشىلىق جۇمىستارمەن قاتار، مانەرلەپ وقۋدان دا سىناق تاپسىرا الماعان. بۇل جايلى كوميسسيا توراعاسى «سىناق كەزىندە ءماتىن وقۋعا ءىلياس ەسەنبەرليننىڭ «الماس قىلىش» ەڭبەگىنەن ءۇزىندى بەرىلدى. بىراق، ءۋاليحان ءابىشۇلى ءوزى وقىعان ءماتىننىڭ مازمۇنىن تۇسىنبەدى. اتالعان ەڭبەكتە كەزدەسەتىن «جىلىشىراي»، «تارتۋ-جورالعى»، «سويىلىن سوعۋ» ءتارىزدى سوزدەردىڭ ماعىناسىن ايتىپ بەرە المادى»، - دەپ وتىر.

ايتپاقشى، مەملەكەتتىك ءتىل قايساروۆ ءۇشىن «اسۋ اسپاس تاۋعا» (سۇلتانماحمۇت) اينالعان سياقتى. 2011 جىلى وتكەن پرەزيدەنتتىك سايلاۋ ۋاقىتىندى دا ءۋاليحان مىرزا وسى قازاق تىلىنەن سۇرىنگەن ەكەن. ول كەزدە ۇمىتكەر جازعان شىعارمادان لينگۆيستيكالىق كوميسسيا 28 قاتە تاپقان بولاتىن. جاقىندا پرەزيدەنتتىكتەن ءۇمىتى بارىن جاسىرماعان ءۋاليحان ءابىشۇلى ارادا وتكەن 5 جىل ىشىندە انا ءتىلىن جەتىك مەڭگەرىپ، بۇل جولعى ەمتيحاننان قاتەلەسپەيتىنىن ايتقان ەدى. ناتيجەسى...

سونداي-اق، قايساروۆ مىرزا بۇگىنگى كۇننىڭ باستى تالقىلاۋىنا اينالعان ءوز ازاماتتىعىنا بايلانىستى شىققان داۋدى «تەحنيكالىق قاتە» دەپ تۇسىندىرۋگە تىرىسقان ەدى. الايدا، شامالى ۋاقىتتان كەيىن ول انكەتانى ءوز قولىمەن تولتىرعانىن راستاپ، وسك تاراپىنان قانداي ءبىر زاڭ بۇزۋشىلىق ورىن الۋى مۇمكىن ەمەستىگىن ايتتى.

اباي-اقپارات.