اقىن اقبەرەن ەلگەزەك جۋىردا «Ult.kz» (http://ult.kz/?p=1092) سايتى ارقىلى سىنشى، ادەبيەتتانۋشى امانگەلدى كەڭشىلىك مىرزاعا حات جولداعان بولاتىن. اڭگىمە بۇگىنگى ادەبيەت، ادەبيەتتەگى جاستار، اقىندار تۋرالى ەدى. الايدا، حات  اۆتورلارىنىڭ اراسىنداعى پىكىر الماسۋ داۋعا ۇلاسىپ كەتتى. ءبىز كەشە امانگەلدى كەڭشىلىكۇلىنىڭ «جاس الاش» گازەتىندە جاريالانعان ماقالاسىن  (http://abai.kz/post/view?id=3049) وقىرمان نازارىنا ۇسىندىق. ەكى جاق تەڭ سويلەسسىن دەگەن ەسەپپەن ەندى اقبەرەننىڭ نازىن دا «Abai.kz» اقپاراتتىق پورتالىندا كورسەتۋدى ءجون دەپ تاپتىق.

ءبىزدىڭ قوعامدا وركەنيەتتى پىكىرتالاس، ءوز كوزقاراسىن مادەنيەتتى تۇردە جەتكىزۋ دەگەن دۇنيە اتىمەن جوق ەكەن عوي. ينتەللەكتىسى جوعارى دەپ جۇرگەن زيالىم ماسەلەنىڭ بايىبىنا بارماي (بارعىسى كەلمەي) بەتالباتى سويلەپ، باسىڭا بار نەگاتيۆىن توككەن كەزدە، يران-عايىپ اعامنىڭ "مەنىكى نە تالتاڭ وسى؟" دەگەن ءسوزى ەسىڭە تۇسەدى ەكەن.

مەن وعان حات جولداي وتىرىپ، ادەبيەتتەگى پروتسەسستەر (ونىڭ جەكە باسىنا قاتىستى ءبىر ءسوز جوق!) توڭىرەگىندە پىكىرىمدى ايتقان بولاتىنمىن. بۇل كادىمگى ەپيستوليارلىق جانر فورماتىنداعى پىكىر الماسۋ ەدى. ول كىسى بولسا، مەنىڭ جەكە باسىما ءتىل تيگىزىپ، سوزدەرىمدى تەرىس اينالدىرىپ، جوقتى بارداي ەتىپ، مەنى ءبىر جاعىمسىز، ماقتانقۇمار، تاعى باسقا وعان عانا ەلەستەيتىن پاتشاعارلىق كەيىپتە كورسەتىپ وتىر.

وقىمىستى، زيالى دەگەن ادامنىڭ مىنەز-قۇلقى وسىنداي بولسا، وزگەگە قالاي رەنجيسىڭ؟ ءبىز ءالى ونداي پىكىر الماسۋ دەڭگەيىنە جەتپەگەن ەكەنبىز. سونى بىلمەگەن ەكەم. وكىنىپ وتىرمىن.

«قايران ءسوزىم قور بولدى...»

Abai.kz