پاۆلودار وبلىسىنىڭ اقتوعاي اۋداندىق سوتى مونعوليادان كەلىپ جۇرگەن قانداسىمىزعا «دومبىرا ساتپاق بولدى» دەگەن ايىپپەن جازا قولدانىپ، ءبىر تاۋلىككە قاماپ تاستاپتى. اۋداندىق سوتتىڭ ءباسپاسوز قىزمەتى قانداسىمىزدىڭ دومبىرا ساتۋ ءۇشىن ارنايى رۇقسات قاعازى بولماعان دەگەن مالىمەت تاراتتى. سوندا، دومبىرا ساتۋ ءۇشىن دە ارنايى رۇقسات كەرەك پە؟.. «ەستىمەگەن ەلدە كوپ» دەمەكشى، قىتايدىڭ ساپاسىز كيىم كەشەكتەرىن ساتاتىندارعا جول بار دا، ۇلتتىق اسپاپتى ساۋدالاۋعا بولماعانى ما؟ مونعوليانىڭ باي-ولكە ايماعىندا دومبىرانى ەرەكشە ورنەكتەپ ويۋلاپ جاسايدى. قازاقتىڭ ۇلتتىق اسپابىن ءوز قازاعىنا اكەپ ساتقاندا تۇرعان نە بار؟ بۇيتە بەرسە دومبىرا تارتۋعا دا ارنايى رۇقسات الۋ كەرەك بولار. ايتپاقشى، ونداي جاعداي شىمكەنت قالاسىندا بولدى عوي. 2013 جىلى جازدا اباي ساياباعىندا دومبىرا-party وتكىزبەك بولعان جاستاردى پوليتسيا قۋىپ تاراتىپ ەدى. بالكىم، دومبىرانى تورىمىزگە ءىلىپ قويۋ ءۇشىن دە رۇقسات الۋىمىز كەرەك شىعار!..

ەسەنبەك ساناتۇلى,

Abai.kz

دەرەككوز:www.oinet.kz