قازاق قوعامىندا قارجىلىق ساۋاتتىلىق وتە تومەن. ءتىپتى، جوق دەۋگە بولادى. ءبىزدىڭ قاراجات جايلى تايىز پىكىرىمىز وسى ماماندىققا دەگەن نەمقۇرايلىقتان دا بولۋى كادىك. تۇيسىگىمىزدە قارجى، اقشا اتاۋىنا قاتىستى ءسوزدى تەك قانا بۋحگالتەر عانا ايتۋى ءتيىس سياقتى. ال، قازاقتىڭ قالىپتى تۇسىنگى مىناۋ: اقشانىڭ جۇرگەن جەرى ارام… اقشامەن جۇمىس ىستەگەننىڭ ءبارى قۋ مەن سۇم. راس، سوۆەت وداعىنىڭ تۇسىندا دا، قازىر دە ەڭ كوپ ءىستى بولاتىندار - وسى ماماندىق يەلەرى. يا، ەكى قوعامدا دا وبحسس پەن قارجىپول وتە بەدەلدى ءارى سۇستى بولعان… قارجىلىق ساۋاتىلىعىمىزدان تومەندىگىنەن ءبىزدىڭ بارلىق جەكە قۇجاتىمىز وتاندىق بانكتەردىڭ نەسيە پورتفەلىندە ىجداعاتتىلىقپەن ساقتالىپ تۇر. وسى ساۋاتسىزدىق پەن بىلىمسىزدىكتىڭ كەسىرىنەن ءاربىر ەكىنشى جەرلەسىمىز جوعارعى پايىزدى نەسيەگە توي ىستەپ ءجۇر…

ەلىمىزدەگى قارجىلىق ساۋاتتىلىقتىڭ دەڭگەيىن انىقتاۋدا ءبىز قوعامدى 3 توپقا ءبولىپ قاراستىرۋىمىز كەرەك سياقتى. ءبىرىنشى توپ (مۇمكىن ۇستەم تاپ؟) - ميلليوندار مەن ميللياردتاردى اينالىمدا ۇستايتىن ءارى قازىناسىن قازاقستاننان تىس ەلدە ساقتايتىندار. بۇلار تۋرالى ايتا المايمىز. وعان قۇلقىمىز دا سوقپايدى. ەكىنشى توپ: ازداعان داۋلەتى بار ادامدار، قىسقاسى… ولاردىڭ قاتارىندا كاسىپكەرلەر، فەرمەرلەر، ءتىپتى شەنەۋنىكتەر دە بار. ال، ءۇشىنشى توپ – مەملەكەتتىك بيۋدجەت پەن جالدامالى ەڭبەك نارىعىنان تابىس تاباتىن، سونىسىنان سالىق تولەيتىن، سونىسىمەن اۋلەتىن اسىرايتىن قوعامدىق ارميا! يا، بانكتەردەن ەڭ كوپ نەسيە الىپ قويعانداردىڭ دا قالىڭ شوعىرى وسى توپقا جاتادى. ەندى وسى توپتىڭ قايسىنا قارجىلىق ساۋاتتىلىقتى كوتەرگەن دۇرىس؟ ارنايى مامانداردىڭ نانىن تارتىپ جەۋگە قولىمىز قىسقا، بىراق، وي قوسۋعا قاقىلىمىز. بىزدىڭشە، الدىمەن ورتاڭعى بۋىننان باستاۋ كەرەك سياقتى. ويتكەنى، وتاندىق قارجى ينستيتۋتتارىنىڭ نەگىزگى تۇتىنۋشىلارى - وسى توپ. ءبىر قاراعاندا بۇل توپتىڭ ساۋاتتىلىعى جەتكىلىكتى سياقتى كورىنەدى. انىعىندا، جاقىندا بولعان دەۆالۆاتسياعا دەيىن ءبىز ءوزىمىزدى سولاي سەندىرىپ كەلىپپىز.

ەسىمىزگە بىلتىرعى وقيعانى ورالتايىق. اقش دوللارى قىمباتتاپ شىعا كەلگەن كۇندەردەگى وتاندىق بانكتەرگە جاسالعان «sms-شابۋىلدى» ەسكە تۇسىرەلىك. يا، وتانداستارىمىز ءبىز ويلاعانان الدەقايدا اۋقاتتى ەكەن… جۇرتتىڭ اقشاسى… جۇرتتىڭ اقشاسى! بىراق، مىڭداعان ادامداردىڭ قارجىلىق ساۋاتسىزدىعى رەسمي قۇرىلىمدارعا ەمەس، ۇزىنقۇلاققا قاتتى سەنەتىندىگىن بايقاتتى. راس، ءبىر جاعىنان بانك تاڭداۋدا انىق تاڭداۋ جاساۋ كەرەكتىگىن دە ءبىلىپ العانىمىز ءجون. تەك، ادامداردىڭ ءوزى تاڭداعان بانكتىڭ مەنەدجەرىنە ەمەس، الدەكىمنىڭ ۇيالى تەلەفونىنان جولدانعان حاتقا سەنىم ارتقاندىعى كىمدى ويلانۋى ءتيىس ەندى؟ مۇمكىن، بۇل بۇقارانىڭ مەملەكەتكە دەگەن سەنىمى جايلى دا ويلانۋعا باستايتىن ساۋال شىعار؟.. تاعى ايتامىز، بىزدىكى - تالداۋ ەمەس، وي تاستاۋ.

ق.مۇقامەتقالي.

اباي.kz