قازاقتىڭ عاسىرلار بويى جالعاسىپ كەلە جاتقان رۋحاني مۇرالارىنىڭ ءبىرى "قوزى كورپەش پەن بايان سۇلۋ" جىرىن ناسيحاتتاۋعا تىيىم سالۋ كەرەك دەيدى تانىمال سازگەر جارىلقاسىن داۋلەت. ونەر يەسى مۇنداي ويىن "اسىل ارنا" تەلەارناسىنا بەرگەن سۇحباتىندا ايتقان. بۇل تۋرالى baq.kz اقپاراتتىق پورتالى جازادى.

"قوزى كورپەش، بايان سۇلۋ دەگەن كىمدەر؟ قوزىنى قودار ءولتىرىپ تاستاعان سوڭ، بايان دا وزىنە قول جۇمساپ ءولدى دە، ءبىر مولاعا كىردى. ءوزىن-ءوزى ءولتىرىپ، جانازاسى شىقپاي، ءبىر مولاعا جاتقان ادامدى كىمگە ۇلگى قىلىپ وتىرمىز؟" دەگەن سازگەر جارىلقاسىن داۋلەت مۇنداي ەپوستىق كەيىپكەرلەردى ماحاببات سيمۆولى رەتىندە قاراستىرۋعا بولمايدى دەپ سانايدى. 
سازگەردىڭ ويىنشا، بۇل كەيىپكەرلەر جاستارعا كەرى تاربيە بەرەدى. 
ء"بىز وسكەلەڭ ۇرپاقتى سۋيتسيدكە ءوز قولىمىزبەن يتەرمەلەپ جاتقان جوقپىز با؟ بىرەۋ ءولىپ، سونىڭ ارتىنان ەكىنشىسى ءوزىن ولتىرسە، ەرلىك پە؟" - دەيدى ول. 
سازگەر ءوزىنىڭ سۇحباتىن "ماحابباتتى ۆالەنتينگە ءبىر، قوزى كورپەشكە ءبىر تىقپالاپ قادىرىن كەتىرمەي، ەكەۋدىڭ اراسىندا جاسىرىن ۇستاپ، ايالاپ، باعالى ەتكەنىمىز دۇرىس", - دەپ اياقتاعان.

Abai.kz