مينسك كەزدەسۋى ناتيجە بەرە مە؟
انە بولادى، مىنە بولادى دەپ تمد كەڭىستىگىن الا تايداي بۇلدىرە جازداعان نورماند فورماتىنداعى ايگىلى تورتتىكتىڭ مينسك كەزدەسۋى كەشە باستالىپ تا كەتتى. پۋتين مەن پوروشەنكونىڭ ەكەۋارا قول الىسۋىمەن باستالعان كەزدەسۋدە رەسەي، گەرمانيا، فرانتسيا جانە ۋكراينا ەلدەرىنىڭ باسشىلارى نە ماسەلەنى تالقىلادى؟ قانداي ۋاعدالاستىققا قول جەتكىزدى؟ كەزدەسۋدىڭ «كۇن تارتىبىنە» قويىلعان ۋكرايناداعى وڭتۇستىك-شىعىس پروبلەماسى شەشىلەتىن بولدى ما؟
«112 ۋكراينا» تەلەارناسىنىڭ حابارلاۋىنا قاراعاندا، مينسك كەزدەسۋىندە دونباسستاعى تەكەتىرەستى رەتتەۋ پروبلەماسىنا قاتىستى ماسەلەلەر تولىق شەشىمىن تاپقان كورىنەدى. ايتسە دە، ء«الى ەشكىم مويىنداي قويماعان» دونەتسك جانە لۋگانسك حالىق رەسپۋبليكالارىنىڭ اۋماعىنداعى رەسەي-ۋكراينا ەلدەرىنىڭ شەكاراسىنا باقىلاۋ جاساۋ ماسەلەسىنىڭ باسى اشىق قالىپ وتىر. سونداي-اق، مينسكىدەگى كەلىسسوز بارىسىندا اتالىپ وتىرعان شەكارالىق ايماقتارداعى شەكارا قىزمەتىنىڭ كادرلىق قۇرامىن مىندەتتى تۇردە جەرگىلىكتى تۇرعىندار اراسىنان جاساقتاۋ جونىندە ۇسىنىستار جاسالدى. مۇنىمەن قوسا وككۋپاتسيالانعان اۋماقتاردا «حالىقتىق ميليتسيا» قۇرامالارىن قۇرۋ مەن وسىناۋ ايماقتاعى جاڭا بيلىك وكىلەتتىگىنىڭ مەرزىمى ماسەلەسى دە كەزدەسۋ كەزىندە اكتۋالدى ماسەلەلەر رەتىندە قارالدى. «مينسكىدەگى كەلىسسوز اسا كۇردەلى جاعدايدا ءوتىپ جاتىر دەسەك تە، كەزدەسۋ قورىتىندىسى ءساتتى اياقتالادى دەپ ۇمىتتەنەمىز» دەدى اتالمىش تەلەارناعا بەرگەن تۇسىنىكتەمەسىندە ۋكراينا سىرتقى ىستەر مينيسترلىگىنىڭ وكىلى ەۆگەني پەرەبينيس مىرزا.
ەسىمىزگە تۇسىرە كەتەر بولساق، رەسەي، ۋكراينا، فرانتسيا پرەزيدەنتتەرى ۆلاديمير پۋتين، پەتر پوروشەنكو، فرانسۋا وللاند جانە گەرمانيا كانتسلەرى انگەلا مەركەل قاتىسىپ جاتقان نورماند فورماتىنداعى مينسك كەزدەسۋى كەشە توعىز ساعاتتان استام ۋاقىتقا سوزىلىپ، وندا نورماند تورتتىگى كەلىسسوز بارىسىندا كوتەرىلگەن ماسەلەلەردىڭ تازا تەحنيكالىق جاقتارىن تالقىلاعان بولسا، بۇگىن – ياعني، اقپاننىڭ ون ەكىسى كۇنى ۋكراينا جانجالىنا قاتىستى قۇجاتتارعا قول قويىلۋى مۇمكىن.
مارات ماداليموۆ.
اباي.kz
