«استانا ارلاندارى» بۇكىلالەمدىك بوكس سەرياسى اياسىنداعى كەزەكتى جەكپە-جەگىن قاراعاندىدا «اقش نوكاۋتشىلارىمەن» وتكىزدى.

52 كەلى سالماقتا جۇدىرىقتاسقان ميراس جاقىپوۆ قارسىلاسى برەنت ۆەنەگاستى 3:0 ەسەبىمەن ايقىن جەڭدى. قوس بوكسشى دا اشىق تاكتيكا ۇستانعاندىقتان، باسەكە وتە قىزىقتى ءوتتى. 60 كەلىدە جاراقاتىنا بايلانىستى ءبىر جىل دەمالىس الىپ، شارشى الاڭعا قايتا ورالعان ەرجان ءمۇساپىروۆ  دانيەل مونتگومەريدى 2:1 ەسەبىمەن ۇتتى. قارسىلاستار بۇكىل راۋند بويىنا بىرىنەن-ءبىرى ايقىن باسىم تۇسە الماي، تورەشى داۋىستارىنىڭ ناتيجەسى بويىنشا عانا جەڭىمپازدى انىقتادى.

ال 81 كەلى سالماقتا بوكستاسقان ء«بىزدىڭ حورۆات» حرۆوە سەپ قارسىلاسى ستي نەلسوندى ايقىن باسىمدىقپەن جەڭدى (ەسەپ 3:0). 69 كەلىدەگى اسلانبەك شىمبەرگەنوۆ «قازاقستان تۋرالى «بورات» فيلمىنەن باسقا تۇك تە بىلمەيمىن» دەپ، قازاق جانكۇيەرلەرىن اشىندىرعان برايان تسەباللودان 2:1 ەسەبىمەن باسىم ءتۇستى. ايتا كەتۋ كەرەك، بۇل – اسلانبەكتىڭ «استانا ارلاندارى» ساپىنداعى العاشقى جەكپە-جەگى بولاتىن. اۋىر سالماقتا جۇدىرىقتاسقان تاعى ءبىر حورۆات لەگيونەرى – فيليپپ حرگوۆيچ قارسىلاسى برەندون گلەنتوندى تەحنيكالىق نوكاۋتپەن جەڭىپ كەتتى.

ياعني، «اقش نوكاۋتشىلارى» 5:0 ناتيجەسىمەن ۇتىلىپ، بەينەلەپ ايتقاندا، وزدەرى نوكاۋت بولدى. ەندى «ب» توبىندا «استانا ارلاندارى» كوش باستادى. ولار قاڭتاردا «باكۋ وتتارىن» جەڭگەن ەدى (3:2). «ارلاندارىمىزدىڭ» ەندىگى قارسىلاسى – «پۋەرتو-ريكو داۋىلدارى». كەزدەسۋ 14 اقپاندا قاراعاندىدا وتپەك.

اباي-اقپارات.