ءبىز ءۇشىن ارحايزمگە اينالىپ بارا جاتقان ءبىر ءسوزدى بريتاندىق ساياساتكەر قايىرا ەسىمىزگە سالىپ وتىر. باقساق، «بيۋروكراتيا» تەرمينىن ايتىپ، جازۋدان الىپ تاستاعانىمىزبەن، قازىرگى قولدانىستاعى «كوررۋپتسيا»، ت.ب اتاۋلارى ونى الماستىرا المايدى ەكەن. اسىرەسە، ەلەكتروندى ۇكىمەت جۇمىسى قاۋىرت ىستەپ كەتكەن كەزەڭدە قوعامداعى قاعازباستىلىق پەن قۇجاتتىق ەنجارلىقتان وسى ارىلعانىمىز – ارىلعانىمىز-اق شىعار دەسكەنبىز عوي...

ولاي ەمەس ەكەن. قازاقستانداعى ۇلىبريتانيا ەلشىسى كەرولين براۋن حانىمنىڭ اڭعارۋىنشا، ءبىزدىڭ ەلدىڭ دامىعان وتىز ەلدىڭ قاتارىنا قوسىلۋىنا كەدەرگى كەلتىرەتىن سەبەپتىڭ ءبىرى... مەملەكەتتەگى بيۋروكراتيا بولۋى بەك مۇمكىن. ء«بىز قازاقستاننىڭ 2050 جىلدارعا دەيىن الەمدىك وتىزدىققا كىرۋىن قىزۋ قولدايمىز. بىراق، بۇل ەل ول ماقساتقا مەملەكەتتىك بيۋروكراتيانى جويىپ بولعاسىن عانا جەتەدى. سونداي-اق، قازاقستانداعى نارىقتىڭ اشىقتىعى كۇماندى. وسى ەكى كەمشىلىكتى ازايتۋ – ەلدى دامىعان مەملەكەتتەردىڭ جولىنا باستايدى... » دەپتى ەلشى.

بۇل جەردەگى سىننىڭ ساداعى ەلدەگى بيزنەستىڭ دامۋىنا قاتىستى بولسا كەرەك. ويتكەنى، تۇماندى البيوننىڭ اتقا مىنەرلەرى قازاقستانداعى بيزنەستىڭ دامۋىنا دەم بەرىپ، قول جەتىمدى نارىق جاعدايىن قالىپتاستىرۋعا ىقپال ەتپەكشى. وسى ماقساتتا «ۇلىبريتانيالىق كاسىپكەرلىك پالاتا» اشۋدى كوزدەيدى. «قازاقستان نارىعىندا جۇمىس ىستەپ وتىرعان بريتاندىق كاسىپكەرلەر جەتكىلىكتى. ولاردىڭ مۇددەسىن قورعاۋ اعىلشىن ۇكىمەتىنىڭ پارىزى. بريتاندىق كاسىپكەرلىك پالاتاسىنىڭ جۇمىسى قازاقستاننىڭ كاسىپكەرلىك پالاتاسىنىڭ قىزمەتى سياقتى جۇزەگە اسىرىلادى.» دەپ مالىمدەدى ۇلىبريتانيا ەلشىسى كەرولين براۋن.

اباي.kz