3 اقپان كۇنى ساعات 16.00-دە  ۇلتتىق اكادەميالىق كىتاپحانادا ايەك-مارجاننىڭ «الامان» اتتى كىتابىنىڭ تۇساۋكەسەرى وتەدى. كىتاپ «فوليانت» باسپاسىنان شىقتى. بۇعان دەيىن  مارجان ەرشۋ «ايەك» دەگەن پسەۆدونيممەن «شىراق» (2004), «پىراق» (2008) اتتى كىتاپتارىن شىعارعان ەدى.

ادەبيەت الەمىنە ايەك دەگەن اتىمەن ەنگەن مارجان امانقوسقىزى ەرشۋ - فيلولوگيا عىلىمدارىنىڭ كانديداتى، حالىقارالىق تۇركىتىلدەس ەلدەر پوەزيا فەستيۆالىنىڭ لاۋرەاتى، قازاقستان جازۋشىلار وداعى مەن ەۋرازيا جازۋشىلار وداعىنىڭ مۇشەسى (تۇركيا). ونىڭ «داريعا عۇمىر، جىر-جۇرەك»، «تاڭعى شىق»، «جاپىراق-عۇمىر»، «شىراق»، «پىراق»، «ەرىك قۇرمانعاليەۆ»، «وراز بي» اتتى كىتاپتارى وقىرمان قاۋىمعا جاقسى تانىس. بۇل كىتاپقا اقىننىڭ ءار جىلدارى جازعان شىعارمالارى (پوەزيا، دراما، پروزا، اۋدارما، ادەبي–سىن ماقالالارى) ەنگەن. سونىمەن قاتار اقىن اڭگىمەلەرىنىڭ تۇرىك تىلىندەگى نۇسقالارى دا ەنىپ وتىر.

كىتاپتىڭ مۇقاباسىن بەزەندىرگەن – سۋرەتشى، قر سۋرەتشىلەر وداعىنىڭ مۇشەسى، قر مادەنيەت قايراتكەرى كاميلا جاپالوۆا. «الامانعا» العىسوز جازعان كسرو جانە قر حالىق ءارتىسى، كسرو مەملەكەتتىك سىيلىعىنىڭ لاۋرەاتى، ەڭبەك ەرى بيبىگۇل تولەگەنوۆا بىلاي دەپتى: «مارجان ەرشۋدىڭ ولەڭى وقىعان ادامىن ويلاندىرادى ەكەن. بۇل – جاقسى قاسيەت. مەن ادەبيەت زەرتتەۋشىسى بولماسام دا، ولەڭ تۋرالى ءوز تۇسىنىگىم بار. مارجاننىڭ ءباسپاسوز بەتىندە جاريالانىپ جاتاتىن شىعارمالارىن وقىپ جۇرەمىن. ماعان ونىڭ جازبالارى ۇنايدى. يساتاي – ماحامبەت، قۇرمانعازى، دينا، سۇيىنعارا، تورەمۇرات باتىر، ءايشابيبى مەن قاراحان، حيۋاز دوسپانوۆا، باۋىرجان مومىشۇلى، توقتار اۋباكىروۆ، الاشورداشى وراز تاتەۇلى، سيرەك داۋىسقا يە ەرىك قۇرمانعاليەۆ، ت.ب. حالقىمىزدىڭ تاريحي تۇلعالارى جايلى جازعان شىعارمالارى قازاق ادەبيەتى مەن مادەنيەتىنىڭ ءورىسىن كەڭەيتەتىن شىرايلى تۋىندىلار دەر ەدىم».

كىتاپتىڭ «ەكى قىزدىڭ پىكىرى» اتتى بولىمىندە بەلگىلى ادەبيەتتانۋشى قالامگەرلەر ايگۇل كەمەلباەۆا مەن گۇلزادا نيەتقاليەۆانىڭ ايەك-مارجاننىڭ شىعارماشىلىعى تۋرالى ماقالالارى بەرىلگەن. 

اباي-اقپارات.