الماتى وبلىسى ىلە اۋداندىق سوتىندا قىتايدان كەلگەن كاسىپكەر قوناي ماسيپحان مەن باقىتبەك تۇتۋباەۆ (اعاسى اسقار تۇتۋباەۆ تالدىقورعان قالاسى اكىمىنىڭ ورىنباسارى) اراسىندا وتكەن جۇما كۇنى 4-ءشى سوت وتىرىسى ءوتتى. بۇعان دەيىن كاسىپكەر ق. ماسيپحاننىڭ سۇحباتى مەن وسى ءىس تۋرالى ماقالالار اقپارات قۇرالدارىندا جاريالانعان بولاتىن. كاسىپكەر قر باس پروكۋرورى جاقىپ اسانوۆ مىرزادان دا اراشا سۇراپ، حات جازعان بولاتىن.

كاسىپكەر 2009 جانە 2015 جىلى بەرگەن قولحاتتارىندا اقشانى اسقار تۇتۋباەۆتان العانىن جازعان. ال سوتقا ونىڭ ءىنىسى باقىتبەك تۇتۋباەۆ بەرىپ وتىر. وسى ءىس بويىنشا كۋاگەر رەتىندە بىرنەشە رەت سوت اسقار تۇتۋباەۆتى شاقىرعان كورىنەدى. بىراق ءالى كۇنگە شەنەۋنىك سوتقا كەلگەن جوق. وتكەن جۇما كۇنى «31» تەلەارناعا تەلەفون ارقىلى بەرگەن سۇحباتىندا ا. تۇتۋباەۆ « ونىڭ الدىندا بولعانمىن، پوكازانيە بەرگەم. ىستە ءبارى بار...» دەپ انىقتاما بەرىپتى. ءبىز ايىپتالۋشىنىڭ قورعاۋشىلارىنان اسقار تۇتۋباەۆتىڭ سوتقا كەلمەگەنىن بىلدىك. ەگەر ارى تازا بولسا، ول نەگە سوتقا كەلمەيدى؟ نەگە سوتقا بارعانمىن دەپ وتىرىك ايتتى؟ سوتتان جالتارۋ شەنەۋنىكتىڭ زاڭدى سىيلاماۋى ەمەس پە؟

وسىنى بىلمەككە اسقار تۇتۋباەۆقا بىرنەشە رەت قوڭىراۋ شالىپ ەك، تەلەفون تۇتقاسىن كوتەرمەدى. تۇتۋباەۆتان باسقا ق. ماسيپحاننىڭ ۇستىنەن ارىز بەرۋشى 3 ادامنىڭ ەشبىر دالەلى جوق دەيدى قورعاۋشىلار.

ءبىز الداعى ۋاقىتتا تۇتۋباەۆ مىرزانىڭ وزىنەن سۇحبات الۋعا تىرىسامىز. ەگەر ايتار قانداي دا ءبىر ءۋاجى بولسا، ونى سايت بەتىندە جاريالاۋعا ءازىرمىز.

نۇرا ماتاي

Abai.kz