قازاقستان نەگە جامان؟ ويتكەنى ءبىز، ادامدار، جاقسىلىقتى كورە بىلمەيمىز! قالاي دەيسىز بە، بىلاي: كەز كەلگەن باق سوعىس بولىپ جاتقان مەملەكەتتى كورسەتكەننەن جالىقپايدى، بىراق بەيبىتشىلىگى ۇزاق ۋاقىت بۇزىلماعان ەلدەردى ايىنا-جىلىنا ءبىر ايتادى. سەبەبى ادامدار پسيحولوگيالىق تۇرعىدان جاقسىلىقتى ەمەس، جاماندىقتى كورگەندى، ەستىگەندى ۇناتادى. نەگە؟

اراقسىز تويعا بارمايدى كوبىسى، كوڭىلسىز دەيدى. سوندا ىشىمدىك ءىشىپ، اقىل-ەستى جوعالتقان كوڭىلدى ەكەن كەي جان ءۇشىن. نەگە؟ مىسالى ءبىر ادامعا جءۇز مارتە جاقسىلىق جاساپ، ءبىر مارتە كومەك قولىن سوزا الماي قالدىڭىز دەيىك. ول ادام كوپتەگەن جاقسىلىعىڭىزدى ەمەس، ءبىر رەت كومەكتەسە الماي قالعانىڭىزدى بەتىڭىزگە باسادى. بەينە ءبىر الىپ اق قاعاز بەتىنەن كىشكەنتاي قارا نۇكتەنى ءبىرىنشى كورەتىن ىسپەتتەس. تۋرا ەكى دۇركىن التىن الىپ، بىراق كەيىن قوعام ەسىنە دە المايتىن يليا يليندەي كۇي كەشەسىڭ سونداي ساتتە.

ءبىز، ادامدار، سانانى تۇرمىس بيلەگەن ساتتە ءتىپتى جاقسىلىقتىڭ وزىنەن جاماندىق ىزدەيتىن بولدىق. قيىن-قىستاۋ زاماننىڭ وزىندە بابالارىمىز ەرتەڭگى كۇنگە ۇمىتپەن قاراي بىلگەن عوي. ال قازىر شە؟ ەكىنىڭ ءبىرى وي ءتىل ءبىتتى، جەر كەتتى، قىتاي ءبارىبىر جاۋلاپ الادى، رەسەي تاپتاپ تاستايدى.جوققا شىعارمايمىن، يا قاۋىپ بار، بىراق قاشان قاۋىپسىز زامان بولدى.

مەملەكەتتەردىڭ ءبىر بىرىنە قاۋىپ ءتوندىرۋى زاڭدىلىق. حاننىڭ باسىن حان الار شاۋىپ تۇرىپ، قاردىڭ باسىن قار الار جاۋىپ تۇرىپ. ەندەشە تونگەن قاۋىپتى تابيعي زاڭدىلىق دەپ قابىلداپ، بوس وتىرىپ جىلاي بەرگەنشە، شىعۋ جولىن ىزدەۋ كەرەك. قازاقستان سۋپەر ەمەس، كەمشىلىگى جەتەرلىك، بىراق مەن ونى شەكسىز سۇيەمىن. ويتكەنى ول مەنىڭ انام ىسپەتتەس. ءسىز اناڭىزدىڭ كەمشىلىگى بولسا دا شەكسىز سۇيەسىز عوي، ءدال سول سياقتى. سوندىقتان ەلىن سۇيەر بالا جاماندىعىن جات كوزىنشە جاسىرار، جاقسىلىعىن اسىرار. بۇگىن اۆتوبۋستا قازاق قارياسىنىڭ ورىس شالعا قازاقستاندى جەردەگى ەڭ توزاق مەملەكەت ەتىپ ايتىپ وتىرعان اڭگىمەسىنەن كەيىن تۋعان وي وسى. جاقسىلىقتى كورە بىلەيىكشى، از بولسا دا، سوندا عانا جان دۇنيەمىز كىرشىكسىز بولادى. تەك نەگاتيۆ ايتساق، ءوزىمىز دە نەگاتيۆكە اينالامىز. نە نارسەدە بالانس بولۋى شارت.

اسحات حاسەنعالي

Facebook-تەگى پاراقشاسىنان