مەن ءۇشىن ەڭ ۇلكەن ۋايىم قوعام دا ەمەس، جۇمىس تا ەمەس، باسقا دا ەمەس، اكەمنىڭ كوزقاراسى بولدى. ويتكەنى، مەن ناماز باستاعانعا دەيىن اكەم ەكەۋمىزدىڭ پىكىرىمىز ەكىگە ءبولىنىپ كورگەن ەمەس ەدى. ارقاشان ويىمىز ءبىر جەردەن شىعاتىن. تەك ناماز باستاعاندا: “مەن سەنى الماتىعا ناماز ءۇشىن ەمەس، وقۋ ءۇشىن جىبەرگەنمىن. وقۋىڭدى وقى”، - دەدى. سوسىن “ناماز باستادىم دەگەنشە، ەرتەڭ وراندىم دەسەڭشى” دەپ تاعى ءبىر قويدى. ءدال سول ساتتە مەن ءۇشىن نامازعا رۇقساتى ماڭىزدى بولدى دا “جوق، پاپا. ناماز وقىسام بولدى. ورامال دەگەندى اۋزىما المايمىن”، - دەدىم. پاپام كۇماندانا “ونىڭ ءبارى ەتاپپەن كەلەتىن دۇنيە عوي. ءتۇپتىڭ-تۇبىندە ول اڭگىمەنى دە باستارسىڭ”، - دەدى كۇبىرلەپ. شىنى كەرەك، سول كەزدە اكەمنىڭ ارىدەن ويلاپ تۇرعانىن تۇسىنبەدىم. نامازعا رۇقسات العانىما ءماز بولدىم.

ارادا جىلدار ءوتتى. يمان تولىقتى. ءدىني ءبىلىم ءوستى. ورامالدىڭ قىز بالاسىنا پارىز ەكەنىن بىلگەننەن كەيىن، جان دۇنيەممەن تولىق تۇسىنگەن سوڭ “شاريعات ءشالىسىن” (اۋەزوۆ) جامىلۋدى ويلادىم. بىراق اكەمە بەرگەن باياعى ءسوزىم ويىمنان كەتپەدى. قاتتى قينالدىم. اكەمنىڭ دە جۇرەگىن اۋىرتقىم كەلمەدى. اللا تاعالانىڭ الدىنداعى مىندەتىمدى دە ويلادىم. ءوزىمدى قۇدايدىڭ الدىندا ەكىجۇزدى سەزىنبەگەن كۇنىم جوق شىعار... بار قولىمنان كەلگەنى اللادان دۇعا ەتۋ بولدى. اكەم مەنى تۇسىنسە، نامازعا كەلسە دەپ تىلەي بەردىم. اۋىلعا بارعان سايىن ءدىني كىتاپتاردى كوپتەپ اپارىپ، قالدىرىپ كەتەتىنمىن. ويتكەنى، اكەم كىتاپ وقىعاندى قاتتى جاقسى كورەدى. بىردە بولماسا، بىردە وقىپ قالار دەگەن وي عوي مەنىكى. تاعى بىردە اكەمە شاكارىم تۋرالى جازعان ديسسەرتاتسيامدى قالدىرىپ كەتتىم. ءسويتىپ، اۋىلعا ءبىر بارعانىمدا اكەم ديسسەرتاتسيامدى وقىعانىن، قاتتى اسەر ەتكەنىن، ەندى كابينەتىنە شاكارىمنىڭ ولەڭ كىتاپتارىن الدىرىپ، سونى وقىپ جاتقانىن ايتتى. تولستوي تۋرالى دا ءبىراز وي تولعادىق. ولاردىڭ ءناپسىسىن جەڭۋ جولىنداعى كۇرەستەرى، ءدىني كوزقاراستارى اكەمە اسەر ەتكەن بولىپ شىقتى. اقىلدى ادام عوي، ال ونداي جان ءتۇپتىڭ تۇبىندە اقيقاتتى تابادى ەمەس پە؟

اقىرى نە كەرەك، سول جولى ارامىزدا بۇل تۋرالى اڭگىمە بولماسا دا اكەمنىڭ مەنىڭ ورامالىمدى قابىلداۋعا دايىن ەكەنىن ۇقتىم. كوپ كەشىكتىرمەي، ورامالىمدى بىردەن تاعىپ الدىم. ەندى ول كەزدەگى قۋانىشتى سوزبەن ايتىپ جەتكىزە المايمىن. ەڭ باستىسى، جۇرەگىم تىنىشتىق تاپتى عوي...
سودان بەرى ومىرىمدە ورامالدىڭ كوپ پايداسىن كوردىم. ول - بولەك ءبىر پوستتىڭ جۇگى. كەيىنىرەك جازارمىن.

ال بۇگىنگى جازباما وسى الەۋمەتتىك جەلىدە ورامال تۋرالى كۇندە بولىپ جاتاتىن ايتىس-تارتىس سەبەپ بولىپ تۇر. ورامالدى ارۋلاردى ءجيى كىنالايتىن جاندار بۇل قادامعا ءبىزدىڭ دە وڭايشىلىقپەن بارماعانىمىزدى بىلسە دەيمىن. ارعى ايعانىم، زەرە، ۇلجانعا بارماي-اق قويايىق، بەرتىنگى بەيىمبەت پەن بەردىبەكتىڭ كەڭەستىك كەزەڭ كەلىپ، باسىنداعى ورامالىن قينالا شەشەتىن، كويلەگىنىڭ ەتەگىن قىسقارتپاۋعا بارىن سالاتىن كەيىپكەرلەرى ەستەرىڭىزدە شىعار؟! بىزدىكى دە سول انالارىمىز سەكىلدى ار-ۇياتىمىزدىڭ جولىنداعى كىشىگىرىم كۇرەس قانا...

مارفۋعا شاپيان

Facebook-تەگى پاراقشاسىنان