تۇرعىن ءۇي قۇرىلىس جيناق بانكىنىڭ باسشىسى حابارلاعانداي، بىرنەشە قۇرىلىس كومپانياسى بانكپەن ىنتىماقتاستىق جاساۋعا جانە دەپۋتات پەرۋاشەۆتىڭ ۇسىنىسى بويىنشا شاعىن كولەمدى باسپانا تۇرعىزۋعا دايىن. 

«قازاقستاننىڭ تۇرعىن ءۇي قۇرىلىس جيناق بانكى» اق ءتورايىمى ءلاززات يبراگيموۆا informburo.kz بەرگەن سۇحباتىندا بانكتىڭ ماجىلىسمەن ازات پەرۋاشەۆتىڭ ۇسىنىسى بويىنشا اۋىل تۇرعىندارىنا ارنالعان شاعىن كولەمدى باسپانالاردى قارجىلاندىرۋعا دايىن ەكەنىن مالىمدەدى.

"بۇل حابارلامانى وقىعان كەزدە، بۇل، ەڭ الدىمەن، اۋىلدىق جەردەن كەلگەن جاستارعا ارنالعان باسپانا قۇرىلىسى ەكەنىن انىق ءتۇسىندىم. ولار كەلگەندە، ءتىپتى، تۇرعىن ءۇي قۇرىلىس جيناق بانكىدە اقشالارىن جيناعان كۇننىڭ وزىندە، ءۇش جىلدىڭ ىشىندە نەبارى ميلليون تەڭگەگە جۋىق قانا قاراجات جيناي الادى. پارتيانىڭ ۇسىنىسى شاعىن كولەمدى باسپانا قۇرىلىسىن قاراستىرۋعا باعىتتالعان ەدى، ياعني، اۋدانى شاعىن 17-18 شارشى مەتر شەگىندەگى پاتەرلەر", – دەپ ول دەپۋتاتتىڭ ۇسىنىسىنا قاتىستى ءوز پىكىرىن ءبىلدىردى.

بانكىگە ماجىلىسمەن ازات پەرۋاشەۆتىڭ جاتاقحانالار جونىندە ۇسىنىسىن قولداپ، بىرنەشە قۇرىلىس كومپانياسى ءوتىنىش ءبىلدىرىپ جاتىر.

"بىزگە، سونىڭ ىشىندە الماتى بويىنشا دا، قۇرىلىس كومپنيالارىنان بىرنەشە ۇسىنىس كەلىپ ءتۇستى. قازىر ءبىز ولاردى قاراستىرۋدامىز. ءبىزدىڭ ويىمىزشا، ءار سالىمشىنى جەكە قاراستىرىپ، ولاردى توپتارعا بولگەن دۇرىس بولار ەدى. سونىمەن قاتار، بىزدە تىم تومەن تولەم قابىلەتىنە يە حالىق ساناتى دا كەزدەسەدى، ولار ايىنا 20 000-30 000 تەڭگە كولەمىندەگى از سومامەن جيناۋعا عانا مۇرشاسى بار. بىراق حالىقتىڭ بۇل ساناتىن دا ەسكەرۋسىز قالدىرۋعا بولمايدى", – دەپ حابارلادى ءلاززات يبراگيموۆا.

ول تۇرعىن ءۇي قۇرىلىس جيناق بانكى بۇل باعىتتا قۇرىلىس كومپانيالاردىڭ ۇسىنىستارىن قاراستىرۋعا دايىن ەكەنىن اتاپ ءوتتى.

"ازىرشە جاريا ەتەتىندەي ناقتى جوبا جوق", – دەپ ناقتىلادى ءتورايىم.

«اق جول» پارتياسىنىڭ كوشباسشىسى ازات پەرۋاشەۆتىڭ «نۇرلى جول» مەملەكەتتىك باعدارلاماسىنا «كوممۋنالدىق ۇيلەر» قۇرىلىسىن ەنگىزۋ تۋرالى دەپۋتاتتىق ساۋالى جەلىدە قىزۋ تالقى تۋدىردى. كوپتەگەن قازاقستاندىقتار ماجىلىسمەننىڭ ۇسىنىسىنا قارسى شىعىپ، الەۋمەتتىك جەلىدە ءبىراز سىنعا الدى.

كەيبىرەۋلەرى ونىڭ ۇسىنىسىن ءتىپتى دە، اس ءۇيسىز جانە اجەتحاناسىز پاتەر قۇرىلىسى دەپ بۇرمالاپ، مۇنداي پاتەرلەردە دەپۋتاتتاردىڭ وزدەرىنە تۇرۋدى ۇسىندى. ءبىر تاۋلىك وتكەن سوڭ، ازات پەرۋاشەۆ باق-تا تاراتىلعان اقپاراتقا قارسى تۇسىنىكتەمە بەرىپ، ءوزىنىڭ ناقتى نەنى مەڭزەگەنىن ايقىنداپ بەردى.

Abai.kz