الماتى قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا قاشقىن بانكير مۇحتار ءابىليازوۆ پەن ونىڭ سىبايلاستارىنا قاتىستى قىلمىستىق ءىستى قاراۋ ودان ءارى جالعاسۋدا. سوتتىڭ بۇگىنگى وتىرىسىندا مۇحتار ءابىليازوۆتىڭ «ءبىر كۇندىك» كومپانياسىنا ميللياردتاعان نەسيەلەردى بەرۋگە قاتىستى قىلمىستىق كەستەسى جاريا بولدى. اتاپ ايتارلىعى، بتا بانكتەن نەسيەگە بەرىلگەن ميللياردتار  قايتارىلماعان، تۇپتەپ كەلگەندە مۇحتار ءابىليازوۆتىڭ جەكە شوتىنا ءتۇسىپ وتىرعان.

2007 جىلدىڭ تامىز ايىندا ءابىليازوۆ «كامەنسكوە پلاتو» جاۋاپكەرشىلىگى شەكتەۋلى سەرىكتەستىگىنىڭ جارعىلىق كاپيتالىنىڭ 99 پايىزدىق ۇلەسىن ساتىپ الۋ جونىندە جالعان مامىلەنى ىسكە اسىرادى. ۇلەستى الاياق بانكيردىڭ وففشورداعى «Gambac Limited» كومپانياسى ساتقان.

الايدا، ارادا ءبىر اي ۋاقىت وتكەندە ءابىليازوۆ ءوزىنىڭ باقىلاۋىندا ۇستاعان «ميترا كومپانياسى» اتتى جاڭا كاسىپورىن قۇرىلادى. سول كەزەڭدە ءابىليازوۆتىڭ نۇسقاۋىمەن «ميترا كومپانياسى» جاۋاپكەرشىلىگى شەكتەۋلى سەرىكتەستىگىن بتا بانك 17,5 ميلليارد تەڭگەگە قارجىلاندىرادى. اتاپ ايتارلىعى، بىرنەشە ميللياردتاعان نەسيەنى الۋ ءۇشىن م. ءابىليازوۆ «كامەنسكوە پلاتو» جشس-ءنىڭ ۇلەسىن ساتىپ الادى. ول الاياقتىق ارەكەتىن ىسكە اسىرۋ ماقساتىندا «كامەنسكوە پلاتو» جشس-ءىن بار-جوعى 101 مىڭ تەڭگەگە ساتىپ الىپتى.

بۇل قارىزدى ماقۇلداۋ كەزىندە بتا بانكتىڭ نەسيە كوميتەتىنىڭ مۇشەلەرى قارىز الۋشىنىڭ قايتادان قۇرىلعان اكتيۆى جوق كومپانيا ەكەنىنە نازار اۋدارماعان. ويتكەنى، ولار قارىز الۋشىنىڭ ءابىليازوۆتىڭ وزىنە تىكەلەي باعىنىشتى كومپانيا ەكەنىن الدىن-الا بىلگەن.

2007 جىلدىڭ قاراشا ايىندا مۇحتار ءابىليازوۆ پەن «ميترا كومپانياسى» اراسىندا «كامەنسكوە پلاتو» جشس-ءنىڭ ۇلەسىن ساتىپ الۋ-ساتۋ تۋرالى مامىلە جاسالادى. ال، اتالعان قاراجات ءابىليازوۆتىڭ بانكتەگى جەكە شوتىنا اۋدارىلعان. ول وسى اقشانى بتا بانكتىڭ اكتسيالارىن ساتىپ الۋعا جۇمساعان كورىنەدى.

وسىنداي كەستە (بتا بانكتەن نەسيەگە العان اقشاعا بانكتىڭ اكتسيالارىن ساتىپ العان) بويىنشا مۇحتار ءابىليازوۆ بتا بانكتىڭ نەگىزگى اكتسيونەرى بولىپ شىعا كەلگەن. مۇنداي قىلمىستىق كەستەنىڭ كومەگىمەن ءابىليازوۆ كەم دەگەندە ەكى ەسە پايداعا كەنەلگەن. بىرىنشىدەن، ونىڭ بتا بانكتەگى ۇلەسى ۇلعايادى، ەكىنشىدەن، ول ۇرلاعان اقشاسىنىڭ تولىعىمەن ءىزىن جاسىرىپ وتىرعان.

2008 جىلدىڭ قىركۇيەك ايىنا دەيىن مۇحتار ءابىليازوۆ باعالى قاعازداردى ساتۋدان قىرۋار پايداعا كەنەلەدى. كەيىنىرەك تاپقان تابىسىن 156 ميلليون اقش دوللارىنا ءوزىنىڭ «Johnson Quality Products» وففشورلىق كومپانياسىنا ساتۋ تۋرالى شەشىم قابىلدايدى. ايتارلىعى، بۇل دا بتا بانكتەن العان نەسيە اقشالار بولاتىن.

سايىپ كەلگەندە م. ءابىليازوۆ 156 ميلليون اقش دوللارىن «Trasra Kommercbank» لاتۆيالىق بانكىنىڭ كومەگىمەن «Forest Management LTD» وففشورلىق كومپانياسىنىڭ شوتىنا اۋدارادى. ول اقشاعا شەتەلدەن قۇنى قىمبات جىلجىمايتىن مۇلىك ساتىپ الادى.

ايتا كەتەلىك، قاشقىن بانكير مۇحتار ءابىلازوۆتىڭ قىلمىستىق ءىسى بويىنشا باستى سوت وتىرىسى اعىمداعى جىلدىڭ 3-ءىنشى ساۋىرىندە باستالدى. سوت وتىرىستارىنا ءۇش مەملەكەتتىك ايىپتاۋشى، سوتتالۋشىلاردىڭ قورعاۋشىلارى جانە بتا بانكىنىڭ وكىلى قاتىسۋدا. قىلمىستىق ءىستىڭ جالپى كولەمى 2 224 تومنان تۇرادى. ايىپتاۋشىلار تىزىمىندە 200-دەن استام كۋاگەرلەر بار. مۇحتار ءابىلازوۆتىڭ ءوزى العاشقى سوت وتىرىسىنان باستاپ سوتقا كەلگەن جوق. ونىڭ مۇددەسىن سوتتا مەملەكەت بەلگىلەگەن قورعاۋشى انجەليكا اجىعۇلوۆا قورعاۋدا.

Abai.kz