استانا. 26 قازان. قازتاگ – قازاقستان ۇكىمەتى 2011-ءشى جىلدىڭ 1-ءشى قاڭتارىنان باستاپ ەلگە سىرتتان اكەلىنەتىن اۆتوكولىكتەرگە ەكولوگيالىق تالاپتار ەنگىزەدى. بۇل تۋرالى كولىك جانە كوممۋنيكاتسيا مينيسترلىگىنىڭ ءباسپاسوز قىزمەتىنەن سەيسەنبى كۇنى حابارلادى.

2007-ءشى جىلى 29-شى جەلتوقساندا №1372 ۇكىمەت قاۋلىسىمەن بەكىتىلگەن «قر تەرريتورياسىندا اينالىسقا شىعارىلاتىن اۆتوكولىكتەردىڭ زياندى (لاستاعىش) شىعارىلىمدارىنا قويىلاتىن تالاپتاردىڭ»  تەحنيكالىق رەگلامەنتىنە ساي، رەسپۋبليكا تەرريتورياسىندا 2011-ءشى جىلدىڭ 1-ءشى قاڭتارىنان باستاپ اۆتوكولىكتەرگە شىعارىلاتىن زياندىق قالدىقتارر بويىنشا ەكولوگيالىق كەزەڭ – 3-كە (Euro-3)سايكەس تالاپتار ەنگىزىلەدى.  وسى كۇننەن باستاپ وسى تالاپتارعا ساي كەلمەيتىن اۆتوكولىكتەردىڭ ءوندىرىسى مەن سىرتتان اكەلىنۋىنە تيىم سالىنادى»، - دەلىنگەن قۇجاتتا.

بۇل رەتتە قازاقستان تەرريتورياسىندا بۇعان دەيىن دە قولدانىستا جۇرگەن اۆتوكولىكتەر ەكولوگيالىق كەزەڭ-3 تالاپتارىن قاناعاتتاندىرماسا دا تولىق توزىعى جەتكەنشە قولدانىستا بولا بەرەدى، - دەپ اتاپ كورسەتەدى ءباسپاسوز قىزمەتى.

قۇجاتتا كەلتىرىلگەن سايكەستىك كەستەسىنە ساي،  Euro-3تالاپتارىنا ەۋرووداق ەلدەرى مەن اقش-تا 2001-ءشى جانە ودان بەرگى جىلدارى شىعارىلعان، 2003-ءشى جىل مەن ودان بەرگى جىلدارى وڭتۇستىك كورەيادا شىعارىلعان، 2005 جانە ودان بەرگى جىلدارى جاپونيادا شىعارىلعان، 2008-ءشى جىلى جانە ودان بەرگى جىلدارى قىتايدا شىعارىلعان اۆتوكولىكتەر ساي كەلەدى.