ساقالدى جىگىتتىڭ تاكسي ۇستاعان قىزدى الداپ كەتكەنىن جازعان ءبىر پوستتى وقىپ قالدىم. اۆتورى الگى تاكسيستى «ساقالدى» دەپ ەرەكشە اتاپ ءوتىپ، ونىڭ استىنا كوممەنت جازعاندار شابىنا شىبىق تيگەن ات سەكىلدى مۇسىلماننىڭ ءبارىن قارعاپ-سىلەپ كەتىپتى. وقىپ وتىرىپ، تاڭ قالدىم.

ءيا، ساقالدىنىڭ ءبارى كەرەمەت مۇسىلمان ەمەس. قازاق وندايدا «ادام الاسى ىشىندە» دەيدى عوي. ارام نارسەنى ويلاستىرىپ ءجۇرىپ ادەيى ساقال قويىپ الاتىندارى دا بار. بىراق مەنىڭ ءبىر قايران قالعانىم، ەلدىڭ ءبارى ساقالدىلاردى ءدال سولاي جاراتىلا سالعان وزدەرىنەن بولەك ءبىر كاستا سياقتى ەتىپ سۋرەتتەپ جاتىر ەكەن. قاراقتارىم-اۋ، ولار دا ءوز ىشتەرىڭنەن شىققاندار ەمەس پە! ول ءبىر بولەك ۇلت ەمەس، بولەك ءناسىل ەمەس، وسى قوعامنان شىققان، پسيحولوگياسى دا وزدەرىڭدەي الا-قۇلا قاۋىم.

ءبارىڭ ءبىر ورتادانسىڭدار. ءبىر-بىرىڭنەن ايىرماشىلىعىڭ – بىرەۋىڭدە ساقال بار، بىرەۋىڭدە ساقال جوق. بىرەۋىڭ ناماز وقيسىڭ، بىرەۋىڭ ءالى ساجدەگە جىعىلماي جۇرگەن جانسىڭ. بىرەۋىڭ اۋرەتتى جاپقان ۇزىن شورتى كيسەڭ، ەندى ءبىرىڭ مينيۋبكا كيگەن قىزدار قۇساپ تىرتيعان شورتىمەن ءجۇرسىڭ. ولاردىڭ اراسىندا دا ادۆوكاتتار، جۋرناليستەر، بيزنەسمەندەر پەن قۇرىلىستا ىستەيتىن قاراپايىم ادامدار بار. ولار دا ءوز اراسىندا «تۋرا جولدا جۇرگەندەر» مەن «اداسقاندار» بولىپ بولىنەدى. سوندىقتان ساقالدىلاردى قورقىنىشتى قاۋىم قىلىپ سۋرەتتەۋدىڭ قاجەتى جوق.

ولار دا كەشە عانا سەندەر سياقتى اقاڭنان ۇرتتاپ قويىپ، تەمەكى مەن كاليان شەگىپ، قىزداردى «قۇلاقتان تەپكەندى» وتە جاقسى كورەتىن جاندار بولعان. كەيىن سوسىن دىنگە بەت بۇرىپ، وسىنداي «اۋرۋدىڭ» ءبارىن ارتقا تاستاعان. جاڭاعىداي الاياق «ساقالدىلار» ارا-تۇرا ءسىزدى الداپ كەتىپ جاتسا، ولار سولاردىڭ وسىنداي جاقسى جاعىن ءبىلىپ، جۇرتتىڭ سەنىمىنە كىرۋ ءۇشىن ادەيى ساقال قويىپ الادى. وسى، بار بولعانى! ايتپەسە، ونداي ساقالسىز الاياقتاردان بىلايعى كۇندە دە اياق الىپ جۇرە المايمىز عوي! ءبىر جاقسىسى، وتىرىك ساقال قويىپ العان مۇنداي الاياقتار اندا-ساندا عانا، ىلۋدە ءبىر كەزدەسىپ قالىپ جاتادى...

جولىمبەت ماكىش

Facebook-تەگى پاراقشاسىنان