استاناداعى قر ۇلتتىق اكادەميالىق كىتاپحاناسىندا الاشوردا ۇكىمەتى مەن  الاش اۆتونومياسىنىڭ 100 جىلدىعىنا وراي  «ەل-شەجىرە» قوعامدىق قورى شىعارعان عالىم-جازۋشى تۇرسىن جۇرتبايدىڭ «دۆيجەنيە الاش» اتتى 3 تومدىق قۇجاتتار جيناعى مەن بولات ءمۇرسالىمنىڭ «الاشوردا» فوتوالبومىنىڭ  تانىستىرىلىمى ءوتتى.

جيناقتار «سامۇرىق-قازىنا» اق قولداۋىمەن جارىق كورىپ وتىر. ءىس شاراعا قوعام قايراتكەرلەرى، وتاندىق عالىمدار، زيالى قاۋىم وكىلدەرى قاتىستى. ولاردىڭ اراسىندا تاريح عىلىمدارىنىڭ دوكتورى، ستامبۋل قالاسىنداعى ميمار سينان كوركەم ۋنيۆەرسيتەتىنىڭ  پروفەسسورى ابدۋاحاپ قارا، جۋرناليست، «الاشوردا» فوتوالبومىن قۇراستىرۋشى بولات ءمۇرسالىم، «Samruk-Kazyna Trust» الەۋمەتتىك جوبالاردى دامىتۋ قورىنىڭ رەسمي وكىلى ليما دياس بار.

كەزدەسۋدىڭ مودەراتورى «الاشوردا» ۇشتومدىق جيناعىنىڭ اۆتورى، قازاقستان رەسپۋبليكاسىنىڭ ەڭبەك سىڭىرگەن قايراتكەرى، فيلولوگيا عىلىمدارىنىڭ دوكتورى، پروفەسسور ت.جۇرتباي دا بولدى.  «الاش» يدەياسى – مەن ءۇشىن ماڭگىلىك يدەيا بولىپ سانالادى. ول قازاق حالقىنىڭ قۇندىلىقتارىن ءون بويىنا ساقتاعان يدەيا بولعاندىقتان، مەن سونىڭ اياسىندا تاربيەلەندىم. ءبىز «سامۇرىق-قازىنا» قورىنا جانە ونىڭ باسشىسى ومىرزاق شوكەەۆ مىرزاعا جيناقتى جارىققا شىعارۋعا قارجىلاي قولداۋ كورسەتكەنى ءۇشىن العىس بىلدىرەمىز»، – دەدى ت.جۇرتباي.

ت.جۇرتبايدىڭ «دۆيجەنيە الاش» اتتى 3 تومدىق جيناعى مۇراعاتتاعى قۇپيا قۇجاتتار مەن سوت ماتەريالدارى نەگىزىندە قۇراستىرىلعان. اۆتور بۇل دەرەكتى شىعارىلىمدى دايىنداۋعا كوپ ەڭبەك جۇمسادى. وندا ۇلتتىق قاۋىپسىزدىك كوميتەتىنىڭ مۇراعات ماتەريالدارى نەگىزىنە انىقتالعان 1927-1932 جانە 1937-1938 جىلدارداعى «الاش» پارتياسى جانە «الاشوردا» ۇكىمەتى  قايراتكەرلەرىنىڭ تەرگەۋ ءىسى تۋرالى جازىلعان.

ب.ءمۇرسالىمنىڭ «الاشوردا» فوتوالبومىنا سيرەك تاريحي سۋرەتتەر جيناقتالعان، الاش ارىستارىنىڭ ءومىرى مەن قىزمەتى فوتودەرەكتەر ارقىلى كورسەتىلگەن. «دۆيجەنيە الاش» جيناعى مەن «الاشوردا» فوتوالبومى وقىرماندار مەن زيالى قاۋىم وكىلدەرى تاراپىنان ۇلكەن سۇرانىسقا يە بولادى دەپ كۇتىلۋدە.

«ءبىز وسى جوبانى ىسكە اسىرۋعا اتسالىسقانىمىزعا قۋانىشتىمىز. «Samruk-Kazyna Trust» الەۋمەتتىك جوبالاردى دامىتۋ قورى «الاش» قوزعالىسىنىڭ مۇراسىن جيناقتاپ، ونى كەيىنگى ۇرپاققا اماناتتاۋدى ءوزىنىڭ باستى مىندەتتەرىننىڭ ءبىرى سانايدى. بۇل جيناقتاردا جاريالانعان ماتەريالداردىڭ تاريحشىلارعا، زەرتتەۋشىلەرگە، ستۋدەنتتەرگە مول پايداسى تيەرى ءسوزسىز»، – دەيدى «Samruk-Kazyna Trust» الەۋمەتتىك جوبالاردى دامىتۋ قورىنىڭ رەسمي وكىلى ليما دياس.

كەزدەسۋدىڭ قاتىسۋشىلارى اتاپ وتكەندەي، «دۆيجەنيە الاش» كىتابى مەن «الاشوردا» فوتوالبومى الداعى ۋاقىتتا حح عاسىرداعى قازاق تاريحىنىڭ سەنىمدى دەرەككوزى رەتىندە پايدالانىلۋى مۇمكىن.

اباي-اقپارات