سوڭعى كەزدە ەلىمىزدە وزەكتى بولىپ جۇرگەن تاقىرىپ – مىندەتتى الەۋمەتتىك مەديتسينالىق ساقتاندىرۋ. 2017 جىلعى 5 ساۋىردەن باستاپ  «ەمحاناعا تىركەل دە، ستاتۋسىڭدى انىقتا!» اتتى كامپانياسى باستالعان بولاتىن.  جاڭادان ەنگىزىلگەلى جاتقان بۇل جۇيەنى تالدىقورعان قالاسىندا ەرەكشە تۇردە تۇسىندىرەتىن پرومواكتسيا ءوتتى. پرومواكتسيا تالدىقورعان قالاسىنىڭ جاستار ساياباعىندا «ەمحاناعا تىركەل دە، ستاتۋسىڭدى انىقتا!» ۇرانىمەن ءوتتى.

جاستار ساياباعىندا سەرۋەندەپ جۇرگەن حالىقتىڭ نازارىن فلەشموبپەن وزىنە قاراتقان جاستار مەن مەملەكەتتىك مەكەمە قىزمەتكەرلەرى  الەۋمەتتىك مىندەتتى مەديتسينالىق ساقتاندىرۋدىڭ شارتتارىن، ونىڭ ماقساتىن تۇسىندىرەتىن جارناما پاراقشالارىن ۇلەستىردى.

«ءبىز بۇل شارانى بەلسەندى ءارى اسەرلى تۇردە وتكىزۋ ماقساتىندا فلەشموب فورماتىن تاڭدادىق. مىندەتتى الەۋمەتتىك مەديتسينالىق ساقتاندىرۋعا قاتىسۋ ءۇشىن الدىمەن ءوز ستاتۋسىڭىزدى انىقتاۋىڭىز كەرەك. ونى حالىققا قىزمەت كورسەتۋ (تسون), جۇمىسپەن قامتۋ ورتالىقتارىنان بىلە الاسىز. قوعامىمىزدا ءار ازامات ءوزىنىڭ ستاتۋسىن ەمحاناعا بارماي-اق ەلەكتروندى ۇكىمەت ارقىلى دا تاڭداي الاتىن مۇمكىندىگى بارىن ءبىلۋى قاجەت»، - دەيدى شارانى ۇيىمداستىرۋشىلاردىڭ ءبىرى جاننا ارىنبەكوۆا.

قالالىق  جاستار ساياباعىندا، فونتانننىڭ جانىندا  تاقىرىپقا سايكەس فلەشموبتى تالدىقورعان قالاسىنىڭ مەديتسينالىق كوللەدجىنىڭ ستۋدەنتتەرى بيلەدى. فلەشموبتىڭ اسەرلى بولعانى سونداي، بيلەپ جۇرگەن ستۋدەنتتەرمەن قوسا سەرۋەندەۋگە كەلگەن تالدىقورعاندىقتار دا قولداي كەتتى.   وسىنداي اسەرلى فلەشموبپەن ەلدىڭ نازارى اۋعان شارادا مىندەتتى الەۋمەتتىك ساقتاندىرۋدىڭ شارتتارى ءتۇسىندىرىلدى.

ۇيىمداستىرۋشىلار مۇنداي شارالاردىڭ ماڭىزدىلىعىن دا ايتتى. «وسىنداي پرومواكتسيالاردىڭ ارقاسىندا حالىق كەڭىنەن اقپاراتتاندىرىلادى»، - دەيدى وبلىستىق دەنساۋلىق ساقتاۋ باسقارماسىنىڭ ءبولىم باسشىسى گۇلنار ءجۇنىسوۆا.

«بۇگىنگى  پرومواكتسياعا 150-دەن استام ازامات قاتىستى. ەگەر جاۋىن جاۋماسا قاتىسۋشىلاردىڭ سانى بۇدان دا كوپ بولار ەدى. ءبىز شاراعا بارلىق ازاماتتاردىڭ قاتىسا الۋىن الدىن الا ويلاستىرىپ، حالىق كوپ جينالاتىن قالالىق ساياباقتى تاڭدادىق.  پرومواكتسياعا نەگىزىنەن جاستار قاتىستى، دەگەنمەن ەلىمىزدىڭ بولاشاعى جاستار ەمەس پە؟! جالپى وسىنداي شارالار حالىقتى تەزىرەك اقپاراتتاندىرۋعا، دەنساۋلىق ساقتاۋ سالاسىنداعى جاڭالىقتاردى ەڭ بىرىنشىلەردىڭ قاتارىندا بىلۋگە كومەكتەسەدى»، - دەدى گۇلنار راحيمبەكقىزى.

Abai.kz