وتكەن جىل "سامۇرىق-قازىنا" ۇلتتىق ءال-اۋقات قورى ءۇشىن تابىستى ءارى جەمىستى جىل بولدى. ماسەلەن، اكتسيونەردىڭ ۇلەسىنىڭ شوعىرلاندىرىلعان تازا تابىسى 2016 جىلى 455 ملرد تەڭگە بولعان. بۇل تۋرالى «سامۇرىق-قازىنا» باسقارما توراعاسى ومىرزاق شوكەەۆ مالىمدەدى.

سىرتقى ەكونوميكالىق ورتانىڭ ەڭ قولايلى ەمەس شارتتارىندا جۇمىس ىستەۋگە تۋرا كەلگەنىنە قاراماستان، وتكەن جىل كومپانيا ءۇشىن جەمىستى بولعاندىعىن قور باسشىسى ايتتى.

"قىزمەتتىڭ ستراتەگيالىق نەگىزگى كورسەتكىشتەرى وسە باستادى. وسىلايشا، 2016 جىلدىڭ قورىتىندىسى بويىنشا اكتسيونەردىڭ ۇلەسىنىڭ شوعىرلاندىرىلعان تازا پايداسى 455 ملرد تەڭگەنى قۇراپ، 2015 جىلدىڭ كورسەتكىشىنەن 292 ملرد تەڭگەگە نەمەسە 1,8 ەسەگە اسىپ ءتۇستى. بۇل تابىس بازاسىن ارتتىرۋ جانە شىعىنداردى جۇيەلى تۇردە قىسقارتۋعا بايلانىستى", - دەپ اتاپ ءوتتى ول.

سونداي-اق، ءو.شوكەەۆتىڭ ايتۋى بويىنشا، قورىڭ نەگىزگى كورسەتكىشتەرى داعدارىسقا دەيىنگى دەڭگەيگە قايتا ورالدى.

«ستراتەگيالىق كورسەتكىشتەر – تازا اكتيۆتەردىڭ قۇنى – 2015 جىلدان بەرى 7% ءوسىپ، 6,8 ترلن تەڭگەدەن استامدى قۇرادى.  مەنشىكتى كاپيتالدىڭ تابىستىلىعى 2015 جىل قورىتىندىسى بويىنشا 3,3% كورسەتكىشتەن 2016 جىل قورىتىندىسى بويىنشا 5,5% -عا جەتتى»، - دەپ حابارلادى قور باسشىسى.

ول قوردىڭ ترانسفورماتسيا پروتسەسى جەتكىلىكتى دارەجەدە جىلدام جۇرگىزىلىپ جاتقاندىعىن ايتىپ، ءسوزىن جالعادى.

«بارلىق كومپانيالارىمىز دياگنوستيكا جانە ديزاين كەزەڭىن اياقتاپ، ىسكە اسىرۋ كەزەڭىنە ءوتتى. كومپانيالاردىڭ DCF-مودەلى ءبىزدىڭ كورپوراتيۆتىك ءتىلىمىز اتانىپ، وزىمىزدەن ناقتى كورىنىستە ءوسۋ قۇنىن تالاپ ەتەمىز. ترانسفورماتسيادا ءبىز ءۇش باعىتتا كەلە جاتىرمىز – ولار ادامدار، بيزنەس-پروتسەستەر جانە تەحنولوگيالار. بارلىق كومپونەنتتەرىن حالىقارالىق ستاندارتتارعا جەتكىزۋ كەرەك»،- دەپ ءسوزىن قورىتىندىلادى شوكەەۆ.