اپامنىڭ قىسقا قايىرمالارى
"جاقسى ادامنىڭ جاقسىلىعىن ايتقىن، مەيىرلەنسىن. بىراق جاعىمپازدانىپ وتىرىك ماقتاما! ناشار ادامنىڭ جاماندىعىن بەتىنە باسساڭ دا، جالا جاپپا!". باۋىرجان مومىشۇلىنىڭ وسى سوزدەرىن اپام ماعان ءجيى ايتادى. جاي عانا ادامدىق بولمىسىڭدى ساقتاپ قالۋ ءۇشىن اتانىڭ وسى وسيەتىن تەرەڭىنەن تۇسىنسەڭ، جەتىپ جاتىر. توم-تومداپ كىتاپ وقۋدىڭ قاجەتى جوق.
ءاسىلى، ادامي بولمىس، ادامگەرشىلىك جايلى ايتقاندا... ءوزىڭنىڭ ادامي قاسيەتىڭنىڭ قاي جەرگە جەتىپ جىعىلاتىنىنا جاقسىلاپ ءبىر كوز جىبەرىپ العان ءجون، ءا...
***
بۇلار بار عوي - قۇمنىڭ ۇستىنە ساراي سالعاندار. ۋاقىت وتە كەلە قۇم سۋسيدى، ساراي قۇلايدى. اتاق دەگەن ءشوپتىڭ ۇستىندەگى شىق سەكىلدى، كۇن شىققان سوڭ-اق جوق بولىپ كەتەدى. اتاققا سەنۋگە بولمايدى...
***
زاۋالدى ۇمىتپاعان ءجون. ول سەنى تاپپاي قويمايدى.
***
قازاق جاراتۋشىنىڭ قۇدىرەتى شەكسىز ەكەنىن، اللانىڭ بارىن "قۇدايسىز قۋراي سىنبايدى" دەگەن ءبىر-اق اۋىز سوزگە سىيدىرىپ تاستاعان. قازىر تەحنولوگيانىڭ دامىعان زامانى، ادامزاتتىڭ قولىنان كەلمەيتىن دۇنيە جوق، ايعا دا ۇشتى، تاۋعا دا شىقتى، جاساماعان بالەسى جوق، سولاي ەمەس پە... بىراق جەردىڭ بەتىندەگى بارلىق عالىم اتاۋلى، بارلىق ادامزات جينالىپ ءبىر ءتۇيىر قۇمدى جاساي الا ما؟ جوق! ەندەشە، بۇل قۇدايدىڭ قۇدىرەتى ەمەي نە؟ جاراتقاندى ءتۇسىنۋ ءۇشىن وسى مىسال عانا جەتىپ جاتىر، جانىم. وسىنى تۇسىنسەڭ بولدى.
(زەينەپ اپامنىڭ ماعان ايتىپ جۇرەتىن اڭگىمەلەرىنىڭ ءبىرى.
ايگۇل بولاتحانقىزى
Facebook-تەگى پاراقشاسىنان
