حابارلاسۋدىڭ تەتىكتەرى كوبەيگەن سايىن ينفورماتسيا جان-جاقتان تولاسسىز اعىلۋدا...كەلىپ جاتقان حات-حاباردىڭ كەيبىرەۋىنە كوزىڭ تۇسەتىنى بار. ۆاتساپتان كەلگەن ءبىر ۆيدوباياندا ءدىني ۋاعىزدان ءۇزىندى جىبەرىلىپتى. ىشىندە قادىر ءتۇنى تۋرالى ايتا كەلىپ، "...سوڭعى ون كۇندە قاپى قالما، اسىرەسە تاق كۇننىڭ تۇنىندە. ۇيىقتاماي كۇت، عيباداتپەن وتكىز! قادىر تۇنىنە جولىعاسىڭ دا 83 جىلدىڭ ساۋابىنا يە بولاسىڭ، سونسوڭ قالعان ون ءبىر ايدا ۇيىقتاي بەر!" دەپ قالدى. ويلانىپ قالدىم... ادام اۋىزدان شىققان ءاءربىر سوزگە جاۋاپ بەرۋگە ءتيىس. ەگەر ول ءدىن ادامى بولسا تىپتەن. ايتۋشىنىڭ ارعى جاعىندا جامان ويى بولماسا دا، ويلانباي سويلەپ، ورىنسىز مىنەز كورسەتكەنى اقيقاتقا قيانات.

الماتى الاتاۋدىڭ بوكتەرىنە ورنالاسقان، تيان-شاننىڭ سىلەمىندەگى ءبىر بيىكتىڭ اتى "اباي شىڭى" دەپ اتالادى. باسىنا شىققىسى كەلگەن كىسى ەڭ اۋەلى ەتەگىنە بارىپ باسىنداعى بوركى تۇسەردەي شالقاسىنان قاراپ بيىككە كوز سالادى. قولىنداعى كومەكشى تاياعىن جەرگە تىرەپ، اياعىن نىق باسىپ ورلەي باستايدى... سۋ جاعالايدى، سايدى ورلەيدى، قياعا جارماسادى، جارتاستان جارماسىپ وتەدى، بۇتا-بۇرگەننەن ۇستاپ شىڭعا ورمەلەيدى... سالىپ قويعان داڭعىل جول جوق. جازا باسىپ تايىپ كەتسە جازىم بولادى. ونىڭ ۇستىنە سول كۇنى كەلىپ تاۋعا تارتقان ادام دىمى قۇرىپ ورتا جولدان قايتادى. شىڭعا شىعۋ ءۇشىن ۇزاقتان بەرى دايارلىعى، جاتتىعۋى بولعان جان عانا الدىنداعى "اباي شىڭىنا" القىنباي شىعا الادى.

سول سەكىلدى "قادىر ءتۇنىن" كورۋ مۇسىلماندىقتىڭ شىڭى! ول عيباداتتىڭ بيىگى، تاقۋالىقتىڭ تارازىسى، ىجداعاتتىلىقتىڭ، اينىماس نيەتتىڭ تاباندىلىعى. مىڭ ايدان قايىرلى(83 جىل) قۇلشىلىقتىڭ ساۋابىنا جەتۋ ون ءبىر اي ۇيىقتاپ، ون كۇن ۇيىقتاماي اسىعىپ-اپتىعىپ جۇگىرگەن كىسى جەتەتىن جەڭىس ەمەس.
قۇران رامازان ايىندا تۇسكەن، وسى ايداعى قادىر تۇنىندە العاشقى اياتى اللادان جەتتى. ارداقتى پايعامبارىمىز(س.ع.س) ول تۋرالى حاديستەرى ارقىلى ۇممەتتەرىنە جەتكىزدى. ۇزدىكسىز، تۇراقتى، تاباندىلىقپەن ىقىلاس تانىتىپ نيەت ەتىپ عيباداتىن جالعاستىرعان قۇل سول ءبىر ءساتتى كورىپ، قادىر ءتۇنىنىڭ نىعمەتىنە بولەنەدى.

الگى "اباي شىڭىنا" بەتتەگەن ادامنىڭ بىردەن تاۋ باسىنا ۇشىپ بارىپ قونا سالمايتىنى سەكىلدى، قادىر ءتۇنىن كورەتىن مۇسىلماندا مىڭ مەحنات، ءجۇز جۇگىنىستەردەن ءوتىپ اللانىڭ راحىمىنا جەتەدى. ء"دىن وتە نازىك، قىپ-قىزىل شوق سەكىلدى، ۇستاساڭ قولىڭ كۇيەدى، ۇستاماساڭ يمانسىز كەتەسىڭ".

ءيا، اللا سىزدەرگە تاباندى تاقۋالىق، اداسپايتىن تۋرا جول، ۇزدىكسىز عيبادات ءناسىپ ەتسىن! قادىر ءتۇنىنىڭ شاپاعاتى شاڭىراقتارىڭىزدى نۇرعا بولەسىن!

داۋلەتبەك بايتۇرسىنۇلى

Facebook-تەگى پاراقشاسىنان