جەتى حان جەرلەنگەن ەجەلگى سارايشىق قالاسىنىڭ ورنىنان ءستاليننىڭ ءومىرى باياندالعان كىتاپ تابىلدى. بۇل تۋرالى جەرگىلىكتى جۋرناليست نۇرگۇل ىسماعۇلوۆا «حان وردالى سارايشىق» مەموريالدى كەشەنىنىڭ ديرەكتورى مولداش بەردىمۇراتوۆقا سىلتەمە جاساپ حابارلادى.

قىزىل ءتۇستى قالىڭ كىتاپ كيىزگە ورالعان كۇيى توپىراقتىڭ استىنان شىققان. 1949 جىلى ماسكەۋ باسپاسىنان تارالعان كىتاپتىڭ بىردە-ءبىر بەتى سارعايماي، سول كۇيىندە ساقتالىپتى. كىتاپتىڭ اۆتورىنىڭ كىم ەكەنى كورسەتىلمەگەن.

اقساقال تۋىندىنىڭ نەلىكتەن بۇلاي جاسىرىلعانىن تاپ باسىپ ايتۋ قيىن ەكەنىن جەتكىزدى:

 «1953 جىلدان كەيىن قاراپايىم حالىق سول كەزدەگى ساياسي احۋالعا، قۋعىن-سۇرگىنگە بايلانىستى كۇدىك تۋدىرماس ءۇشىن كومىپ تاستاعان بولۋى كەرەك. بولماسا، ونىڭ بالالىق شاعىنان باستاپ باياندالعان جازبانى جاناشىرلىقپەن جاسىرعان بولۋى مۇمكىن» ، – دەيدى ول.

 ايتا كەتەلىك، قازىرگى تاڭدا جايىق سۋى شايىپ بارا جاتقان قالانى ساقتاپ قالۋ ءۇشىن وزەننىڭ جاعاسى بەكىتىلىپ جاتىر. بۇعان دەيىن اتىراۋ وبلىسىنىڭ اكىمى نۇرلان نوعاەۆ بۇل جوباعا 1,5 ميلليارد تەڭگە بولىنگەنىن مالىمدەدى. جۇمىس 2018 جىلى اياقتالۋى ءتيىس. سونىمەن قاتار، بيىل مادەنيەت جانە سپورت مينيسترلىگى سارايشىقتى قالپىنا كەلتىرۋ ءۇشىن 100 ميلليون تەڭگە بولەتىنىن حابارلادى. شاھاردىڭ ورنىن تۋريستىك ورتالىققا اينالدىرۋ جوسپارلانعان.

كونە قالانىڭ ورنى اتىراۋ قالاسىنان 45 شاقىرىم جەردە جايىق وزەنىنىڭ جاعاسىندا ورنالاسقان. التىن وردانىڭ ساياسي، ەكونوميكالىق ورتالىقتارىنىڭ ءبىرى بولعان قالا قاسىم حاننىڭ تۇسىندا قازاق حاندىعىنىڭ استاناسى اتاندى. جىبەك جولىنىڭ بويىندا تۇرعان مۇندا 7 حان جەرلەنگەن. ولار: موڭكە، توقتاعۋ، جانىبەك، ءامىر وقاس، قاسىم حان، شيح ماماي جانە ءجۇسىپ حاندار.

Abai.kz