قوس جانارى سەمگەن ازامات «باستاۋ بيزنەس» جوباسىندا ءبىلىم الىپ، قارجىلاندىرۋعا قول جەتكىزدى. 

«باستاۋ بيزنەس» جوباسىنا قاتىسقان اندرەي زەلەۆسكي «پوليمەرلى قالدىقتاردى ءموبيلدى قايتا وڭدەۋ» جوباسىنا قارجىلاندىرۋ الادى. زاعيپ كاسىپكەر كۋرستا العان ءبىلىمى مەن اتالعان جوبانىڭ ارتىقشىلىعى تۋرالى پىكىر ءبىلدىردى.

ەسكە سالساق، «باستاۋ بيزنەس» جوباسى اۋىل تۇرعىندارىنىڭ ەكونوميكالىق بەلسەندىلىگىن ارتتىرۋعا باعىتتالعان. بۇل جۇمىسسىز جانە ءوزىن-ءوزى جۇمىسپەن قامتىعان ازاماتتارعا كاسىپكەرلىك نەگىزدەرىن وقىتا وتىرىپ، بيزنەس-جوبانى جۇزەگە اسىرۋعا مۇمكىندىك بەرەدى.

«مەن زاعيپتار قوعامداستىعى اتىنان مۇگەدەكتەر ماسەلەسى بويىنشا كەڭەستىڭ قۇرامىندامىن. مۇگەدەكتەردىڭ ماسەلەسىن ءبىر كىسىدەي بىلەمىن. بىراق ءار ادام وزىنە ءوزى شەكتەۋ قويادى. مەملەكەت باسشىسى ايتقانداي الدىمەن ءىس باستا. ءاردايىم وقىپ، ىزدەنىپ، دامۋ كەرەك. ونىڭ ۇستىنە، ۇلتتىق پالاتا كاسىپكەرلەر ءۇشىن جاعداي جاساپ وتىر. مىسالى «بيزنەس باستاۋ» جوباسى بويىنشا ءبىلىم العانىمدا، توپتاعى «نەگەش» مەن بولدىم، ءاربىر قىزىقتىرعان ساۋالىمدى قويۋدان قىسىلمادىم. بىلىكتى بيزنەس-جاتتىقتىرۋشىلاردىڭ ارقايسىمىزبەن جەكە-جەكە جۇمىس ىستەگەنى ءۇشىن العىس بىلدىرەمىن. ەندى جۇبايىم دا قوستاناي وبلىسىندا «بيزنەس باستاۋدا» ءبىلىم الىپ جاتىر. ول حيميالىق تازالاۋ سالاسىن تاڭداپ وتىر»، – دەپ ءبولىستى اندرەي زەلەۆسكي.

كاسىپكەر قوستاناي وبلىسى زاتابولسك اۋىلىندا  وقىتىلعان ەكىنشى لەكتىڭ قاتارىندا ءبىلىم الدى. بۇعان دەيىن دە ءتۇرلى باعدارلامالارعا قاتىسىپ، قارجىلىق ساۋاتتىلىعىن جەتىلدىرىپ، كاسىپكەرلىك نەگىزدەرى بويىنشا ءبىلىم العان ەكەن. ىزدەنە ءجۇرىپ جەكە كاسىبىن دە اشقان. دەگەنمەن، «باستاۋ بيزنەستىڭ» ارقاسىندا دامىپ، قر ءدىن ىستەرى جانە ازاماتتىق قوعام مينيسترلىگىنىڭ قولداۋىمەن وتكىزىلگەن بايقاۋدى جەڭىمپازى اتاندى.

«باستاۋ بيزنەس» ەڭ الدىمەن ءبىلىم بەردى. سەميناردا ەسەپتەۋدى ۇيرەتتى. مەن كاسسالىق اپپاراتپەن جۇمىس ىستەي المايتىنمىن. اقمارال ەسىمدى بيزنەس-جاتتىقتىرۋشى بارلىعىن ءتۇسىندىرىپ، ەلەكتروندى شوت-فاكتۋرا تۋرالى، بيزنەستى جۇرگىزۋ الدەقايدا جەڭىل بولاتىنىن ايتتى. مەن پوليمەرلى قوقىستاردى قايتا وڭدەۋمەن اينالىسامىن. باستى ماقساتىم جەر شارىن تازا ۇستاۋعا ۇلەس قوسۋ. وقۋ بارىسىندا جاڭا دۇنيەلەردى اشتىم. وقۋ كۋرسىنىڭ ەرەكشەلىگى تيىمدىلىگىندە. ماركەتينگ، كليەنتتىك بازا – ەندى بۇل تەرميندەرمەن تانىسپىن. اۋەل باستا جوبام ورىندالمايتىنداي كورىنەتىن. باعدارلامانىڭ ارقاسىندا شىنايى ءارى جۇزەگە اسىرۋعا بولاتىنىن ءبىلدىم. بۇگىندە ءونىمدى جەتكىزەتىن كومپانيالارمەن كەلىسىمشارت جاسادىم»، – دەيدى جاڭالىعىمەن بولىسكەن كاسىپكەر.

كۇندەلىكتى ومىردە پوليمەردەن جاسالعان بۇيىمدار وتە كوپ، الايدا وسى بۇيىمداردىڭ ءوندىرىسى ارتقان سايىن قالدىق تا كوبەيىپ كەلەدى. تۇرمىستىق قوقىستىڭ 20% پوليمەرلى زاتتار ءارى بۇل كورسەتكىش ۋاقىت وتكەن سايىن ءوسىپ وتىر.

بۇگىندە كاسىپكەر 600 000 تەڭگە قارجى الدى. ەندى وسى قاراجاتقا اۆتونومدى ۇساقتاعىش الادى. بىراق كاسىپكەردىڭ جۇمىس ىستەيتىن جەكە ورنى جوق، گاراجداردا، دوستارىنا تيەسىلى ورىنجايدا جۇمىس ىستەپ كەلەدى. بىراق، اندرەي زەلەۆكيدىڭ ايتۋىنشا، «اتامەكەن» قكپ قولداۋىمەن قوستاي وبلىسىنىڭ اكىمدىگىنە جۇگىنگەن. كوممۋنيكاتسياسى بار ارنايى ورىن بولىنسە، وقۋ-تاجىريبەلىك بازا سالۋدى قالايدى.

«مەنىڭ وندىرىستىك ورنىم ءوزىم ۇيرەنەتىن جانە وزگەلەردى دە وقىتىپ-ۇيرەتەتىن جەر بولعانىن قالايمىن. پلاستماسسا مەن پلاستيكتىڭ كوپتىگى سونشالىق، اتتاپ باسقان جەرىمىزدەن تابىلادى. بولاشاقتا وسى پلاستيكتەر قايتا وڭدەلەدى. مەن 7 ۇمىتكەردىڭ اراسىندا جەڭىمپاز اتاندىم. قۋانىشىمدا شەك جوق. شالعاي ايماقتاعى ازاماتتاردىڭ كاسىپ باستاۋىنا مۇمكىندىك بەرىپ وتىرعان «باستاۋ بيزنەسكە» العىس ايتامىن. ازاماتتار مىقتى بولسا – قازاقستان وركەندەيدى!» – دەپ سانايدى كاسىپكەر.

«باستاۋ بيزنەس» جوباسى كاسىبىن ەندى باستاعاندار مەن كاسىپكەرلىك بەلسەندىلىگى بار ازاماتتاردىڭ ءبىلىم الۋى ءۇشىن ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان مەملەكەتتىك باعدارلاماسىنا ەنگىزىلدى. 2017 جىلى 80 اۋداندا وقىتىلاتىن بولسا، 2018 جىلى 160 اۋدان قامتىلماق. بۇگىندە باعدارلاماعا قاتىسۋعا نيەت بىلدىرگەن اۋىل تۇرعىندارىنىڭ سانى كۇن ساناپ ارتىپ كەلەدى. بۇل ونىڭ تيىمدىلىگى مەن ناتيجەلىلىگىن كورسەتەتىنى ايقىن.

Abai.kz