قىتاي شوۆينيزم يدەيالارىنىڭ تارالۋىنا ساياسي پلاتفورمانى ءوزىمىز جاساپ بەرىپ وتىرمىز. بۇلاي دەۋىمىزگە سەبەپ Facebook الەۋمەتتىك جەلىسىندە «قىتايلىقتار قازاقستاندىق ۇلت رەتىندە قر حالقى اسسامبلەياسىنىڭ مۇشەلىگىنە ءوتىپ جاتىر» دەگەن اقپارات تاراپ جاتىر. ەگەر بۇل اقپارات راس بولسا، اسسامبلەياعا قازاقستاندىق ۇلت وكىلى رەتىندە قىتايلىقتارعا كۆوتا ارقىلى ورىن بەرىلەتىن بولسا، قىتاي ءۇشىن «حالىقتار اسسامبلەياسى» اياسىندا ەتنوس، ۇلت رەتىندە پارلامەنتكە، ودان ءارى ەل بيلىگىنە وتۋلەرىنە مول مۇمكىندىك اشىلادى.

قىتاي وكىلدەرى ءوزىن-ءوزى بيلەۋ تۋرالى تالاپتارىن شىعارا وتىرىپ –  قازاقستاندىق ۇلت رەتىندە وزدەرىن مويىنداتۋدى، اسسامبلەيا اياسىندا قىتاي مۇددەسى تۇرعىسىنان جەر نارىعى قۇقىقتىق قاتىناستارىن قالىپتاستىرۋ ارقىلى شارۋاشىلىق جۇرگىزۋدى، اۋماقتىق اكىمشىلىك باسقارۋ ورگاندارىن قۇرۋدى، بىرتە-بىرتە «قىتاي ۇلتىنىڭ» ەتنيكالىق جانە گەوگرافيالىق اۋماعىن زاڭداستىرۋدى، وزدەرىن مەملەكەتتىك ساياسي قاتىناستاردىڭ بىرەگەي سۋبەكتىسى رەتىندە تانىتۋدى كوتەرەدى. مەملەكەتتىك ءتىلدىڭ ءبىرى بولىپ قىتاي ءتىلى ەنەدى. مۇشەلىك ءوز جالعاسىن تاۋىپ، قىتايلىقتار بارلىق وبلىستارداعى "اسسامبلەيا" مۇشەلىنە كىرەدى. وسىلايشا قازاقستاندىق دەڭگەيدە الىپ كۇشكە اينالادى.

ءبىز قىتاي ءشوۆينيزمى يدەيالارىنىڭ تارالۋىنا ساياسي پلاتفورمانى ءوزىمىز جاساپ بەرىپ وتىرمىز. ەگەر قىتايلاردى قازاقستانداعى دياسپورا رەتىندە مويىنداپ، اسسامبلەيا مۇشەلىگىنە وتكىزەتىن بولساق، ولاردىڭ وتارشىلدىق نيەتتەرىنىڭ جاندانۋىنا، قازاقستاندى قىتايلاندىرۋعا جول اشىپ بەرەمىز. تاۋەلسىزدىگىمىزدىڭ تۇبىنە جەتىپ تىنامىز. زاڭداستىرۋ جولىمەن «ۋنيتارلى مەملەكەتتى قولدان كوپ ۇلتتى ەتۋ» - ساياسي قاتەلىك.

قازاقتىڭ ۇلتتىق مەملەكەتىن قىتايلاندىرۋدى كوزدەگەن كۇشتەر باس كوتەرىپ كەلە جاتىر. الەۋمەتتىك مۇددەلەردى ۋشىقتىرۋدى كوزدەگەن قىتايلىق قيمىل-ارەكەتتەر وسىلايشا قولداۋ تاباتىن بولسا، قازاق مەملەكەتىنىڭ كۇيرەۋىنە كۋا بولامىز. مۇنى قىتاي قازاقتىڭ ءوز قولىمەن، ءوز زاڭىمەن جۇزەگە اسىرادى. ەگەردە قازاق حالقى ءوز جەرىندە "جەتكشى ۇلت" رەتىندە ەكونوميكالىق جانە ساياسي بيلىگى قولىندا بولا تۇرىپ ۇلتتىق مەملەكەت قۇرا المايتىن بولسا، قۇردىمعا كەتەمىز. بۇعان جول بەرۋگە بولمايدى!

ن.قوشامانۇلى

Abai.kz

.