حاليدا مامانوۆا ستالينگە جازعان حاتىندا: «ەگەر حالىق جاۋى بولسام، ەندەشە مەنى شترافروتاعا جىبەرىڭىز. ءتىرى قالسام – مەنەن جانە تۋىستارىمنان بارلىق ايىپتاردى الىپ تاستاۋىڭىزدى سۇرايمىن»، – دەپ جازعان ەكەن...

مامان باي تۋرالى ايتىپ جاتۋدىڭ ءوزى ارتىق. رەۆوليۋتسيادان سوڭ مامان بايدىڭ تۇقىمىنان شىققان ون بەس ادام اتۋ جازاسىنا كەسىلەدى، وتىز التى وتباسى جەر اۋادى. حاليدانىڭ اكەسى ەسەنقۇل 58-ءشى ستاتيامەن، 1928 جىلى مال-مۇلكى تاركىلەنىپ، وزدەرى چكالوۆ قالاسىنا ايدالادى. ەسەنقۇل قارا جۇمىسقا تۇرادى، ايەلى فابريكاعا تىگىنشى بولىپ ورنالاسادى. التى بالانىڭ ۇلكەنى حاليدا ول كەزدە ون جاستا ەكەن. ايداۋدا ءجۇرىپ ەسەنقۇل قۇرت اۋرۋىنان كوز جۇمادى، ەكى كىشكەنە بالاسى شەتىنەيدى. قالعان وتباسى 1932 جىلى الماتىعا كوشىپ كەلەدى.

اۋەلى قىسقامەرزىمدى كۋرستاردا، مەدينستيتۋتتىڭ دايارلىق كۋرسىندا وقىعان حاليدا 1937 جىلى وسى وقۋ ورنىنىڭ ءبىرىنشى كۋرسىنا تۇسەدى. الايدا «بايدىڭ قىزى» دەپ قۋدالانىپ، وقۋدان شىعارىلادى. حاليدا ەسەنقۇلقىزى ءبارىبىر تىرمىسىپ ءجۇرىپ، وقۋىن قايتا جالعاۋعا مۇمكىندىك الادى.
حاليدانىڭ اناسى بولسا اركەز كەشكە جاقىن «اياق استى ايداۋعا الىپ كەتسە» دەپ قوس شابادانعا سالىنعان كيىمدەرىنىڭ ءبىر بۇرىشىنا كەشەگى ناندى الىپ، جاڭا نانمەن الماستىرىپ وتىرىپ، كۇن كەشىپ جاتادى. 1958 جىلعا دەيىن سول قاۋىپپەن ءجۇرىپتى.

1941 جىلى مەدينستيتۋتتى بىتىرگەندە سوعىس باستالادى. مەدينستيتۋت تۇلەكتەرىنە بىردەن لەيتەنانت دارەجەسى بەرىلسە دە، حاليداعا «بايدىڭ تۇقىمى» بولعانى ءۇشىن ول اتاق بەرىلمەيدى. ءتىپتى، مەدبيكە بولىپ جۇمىس ىستەۋىنە دە رۇقسات ەتپەي، قولىنا كۇرەك بەرىپ، ولىلەردى جەرلەۋ جۇمىسىنا جەگەدى. سول ۋاقىتتا حاليدا ستالينگە حات جازىپ، شترافباتقا اۋىسادى. ءسويتىپ حاليدا مامانوۆا بەرلينگە دەيىن ءتىرى جەتەدى. 1943 جىلى مەدقىزمەتتىڭ اعا لەيتانانتى اتاعى بەرىلىپ، 1945 جىلدان كەيىن ۇيىنە كاپيتان دارەجەسىندە ورالادى.

ودان ءارى قازاق مەديتسينالىق ينستيتۋتىنا قىزمەتكە تۇرادى. الايدا، عىلىمي جۇمىسىن قورعاۋعا رۇقسات بەرمەيدى. تەك ماسكەۋگە بارىپ مەديتسينا عىلىمىنىڭ كانديداتى دارەجەسىن قورعاپ كەلىپتى. 1959 جىلى اقتوبەدە مەدينستيتۋت اشىلىپ، وعان رەكتور بولىپ بارعان بايىرعى كۋرستاسى كافەدرا مەڭگەرۋشىلىگىنە شاقىرادى. وسى جەردە جيىرما جىلداي قىزمەت ەتەدى، دوكتورلىعىن قورعايدى.

اقتوبەدە جۇرگەندە ستۋدەنت جاستار اراسىندا حالىق اسپاپتار ءانسامبىلىن قۇرۋعا مۇرىندىق بولعانى ءۇشىن، وبكوم پارتيادا ۇلتشىلدىقپەن ايىپتالادى.

مەكسيكا مەن ورتالىق امەريكاعا شاقىرتۋ كەلگەندە كسرو سىرتقى ىستەر مينيسترلىگى رۇقسات بەرمەي، ەسەسىنە سوتسياليستىك بولگارياعا شىعۋىنا رۇقسات بەرگەن. اقتوبە دارىگەرلەرىنىڭ دەلەگاتسياسىنىڭ قۇرامىندا بولگارياعا اتتانعان حاليدانىڭ بىرنەشە كۇن دەمالىستان سوڭ سۋعا كەتكەن دەنەسى تابىلعان. سۋبمەدەكسپەرتتەر ونىڭ كەشقۇرىم سۋعا كەتكەنىن ايتادى. ال تۋىستارى، تانىستارى ونىڭ ءدال سول مەزگىلدە سۋعا تۇسكەندى ۇناتپايتىنىن تىلگە تيەك ەتەدى. مارقۇمنىڭ دەنەسىنەن كوگەرگەن ۇلكەن داق بايقالعان. ونى دارىگەرلەر سۋعا كەتكەندە بىردەڭەگە ۇرىپ الۋى مۇمكىن دەپ بولجام جاساعان. بالكىم، الدەكىم ۇرعان دا بولار؟ مارقۇمنىڭ دەنەسىن تەك ەكى اپتا وتكەن سوڭ عانا تۋىستارىنا بەرگەن...

حاليدا مامانوۆا تەك 1993 جىلدىڭ 14 ساۋىرىندە اقتالعان.

بۇگىن جۇمىسقا Igsatova Dina اپاي كەلگەن. سول كىسىمەن ۇزاق اڭگىمەلەستىك. حاليدا اپامىزدىڭ جاتقان جەرى جايلى، يمانى جولداس بولسىن.

قاراگوز ءسمادىل

Facebook-تەگى پاراقشاسىنان