اقش-تىڭ رەسەيدىڭ مۇناي-گاز بەن بانك سەكتورلارىنا جاڭا سانكتسيا سالۋى قازاقستان ەنەرگەتيكا مينيسترلىگىنىڭ الاڭداۋشىلىعىن تۋدىرا باستادى. Tengrinews.kz سايتىنىڭ حابارلاۋىنشا، قازاقستان ەنەرگەتيكا مينيسترلىگى قازىر سانكتسيالاردىڭ كاسپي تەڭىزىنىڭ رەسەيلىك بولىگىندە "قازمۇنايگاز" كومپانياسى ىسكە اسىرىپ جاتقان جوباسىنا تيگىزۋى مۇمكىن قاۋپىن زەرتتەپ جاتىر.

قازاقستان پرەزيدەنتى نۇرسۇلتان نازارباەۆ 7 تامىزدا پرەمەر-مينيستر باقىتجان ساعىنتاەۆپەن كەزدەسۋىندە كومىرسۋتەگى مەن شيكىزات باعالارىنىڭ قۇبىلۋىنا جانە باتىس ەلدەرىنىڭ رەسەيگە سالعان سانكتسياسىنىڭ ىقتيمال سالدارىنا بايلانىستى قازاقستان ەكونوميكاسىنا قاۋىپ بارىن مالىمدەگەن.

قازاقستان ەنەرگەتيكا مينيسترلىگى سانكتسيالار قاراشىعاناق جوباسىنا اسەر ەتپەيدى دەپ بىلەدى، بىراق اكتسيا پاكەتىنە رەسەي يەلىك ەتەتىن كاسپي قۇبىر تارتۋ كونسورتسيۋمىن كەڭەيتۋ جوسپارىنا قاۋىپ ءتونۋى مۇمكىن دەپ بولجايدى.

اقش پرەزيدەنتى دونالد ترامپ بيىل 2 تامىزدا رەسەيگە قارسى جاڭا ەكونوميكالىق سانكتسيالار سالاتىن زاڭعا قول قويدى. سول كۇنى قازاقستاننىڭ ايىرباس پۋنكتەرىندە دوللار باعامى 343 تەڭگەگە دەيىن كوتەرىلدى.

Abai.kz