قر مادەنيەت جانە سپورت ءمينيسترى ارىستانبەك مۇحامەديۇلى مەن يران مادەنيەت جانە يسلامدىق باعدار ءمينيسترى رەزا سالەحي ءاميريدىڭ   تەگەراندا كەزدەسۋ3 بارىسىندا يران تاراپى قازاقستانمەن مۋزىكا، ونەر، تەاتر جانە كوركەم گالەرەيا اياسىندا بىرىگىپ جۇمىس اتقارا الاتىنىن ءمالىم ەتتى. ءوز كەزەگىندە قر مادەنيەت جانە سپورت ءمينيسترى ارىستانبەك مۇحامەديۇلى يراننىڭ قازاقستان ءۇشىن تاريحى مەن مادەنيەتىنىڭ ماڭىزدى ەكەنىن جەتكىزدى.  مينيسترلەردىڭ كەزدەسۋى تۋرالى  جەرگىلىكتى ParsToday اگەنتتىگى حابارلادى.

يران ءمينيسترىنىڭ ايتۋىنشا، يراندىق كينو الەم بويىنشا جوعارعى دەڭگەيدە جانە قازاقستانمەن بىرىگىپ كينو تۇسىرۋگە، كينو سالاسىندا ءبىلىم جۇيەسىن دامىتۋعا اتسالىسادى.

سونداي-اق، قازاقستاننىڭ يران ءۇشىن ورنى ايرىقشا ەكەنىن ايتا كەتىپ، يران پرەزيدەنتى حاسان ءروۋحانيدىڭ ەلباسى نۇرسۇلتان نازارباەۆتى ەرەكشە قۇرمەتتەيتىنىن دە جەتكىزدى. قازاقستانمەن قاي سالادا بولماسىن، سەرىكتەستىك قۇرۋعا دايىن ەكەندەرىن ايتتى.

«يران مەن قازاقستان سەرىكتەس بولۋ ءۇشىن ەشقانداي كەدەرگى جوق. ەكى جاق تا مۋزىكا، ونەر، تەاتر جانە كوركەم گالەرەيا اياسىندا بىرىگىپ جۇمىس اتقارا الادى»، – دەدى يران مادەنيەت جانە يسلام باعدار ءمينيسترى.

قر مادەنيەت جانە سپورت ءمينيسترى ارىستانبەك مۇحامەديۇلى دا يراننىڭ تاريحي ءتۋريزمى قازاقستان ءۇشىن اسا ماڭىزدى ەكەنىنە توقتالىپ، تۋريزم ورتالىقتارى: يسفاحان مەن شيراز قالالارىن تاماشالاۋ قازاقستاندىقتاردى ءسوزسىز قىزىقتىرادى دەدى..

Abai.kz