مۇرات ەسجان

- وسى كۇنى كەز-كەلگەن جوبانى ىسكە اسىرۋ ءۇشىن از بولسىن، كوپ بولسىن، قارجى كەرەك. اقش-تا بولسا، ءتىپتى دە. دەمەك، ءبىزدىڭ جاساعالى جاتقان شورت ءفيلمىمىز تۋرالى دا “بۇلار وعان اقشانى قايدان الادى” دەگەن ساۋال تۋاتىنى زاڭدى.
شەتەلدە، قازىر بىزگە دە كەلىپ جاتىر، "crowdfunding" دەگەن نارسە بار. يدەياڭدى كوپشىلىكتىڭ قارجىلاندىرۋى. ارنايى سايتتان پاراقشا اشىپ، “مىنانداي-مىنانداي نارسە جاساعالى جاتىرمىز، قىزىقتىرسا، كومەك كورسەتىڭىز” دەگەن پرەزەنتاتسيالىق ۆيدەو جانە ءوزىڭىز تۋرالى اقپاراتتار سالاسىز. ۇناتقان جۇرت ءتۇرلى مولشەردە اقشا سالىپ، يدەيانىڭ جۇزەگە اسۋىنا جاردەم بەرەدى. پاراقشاڭىز ءبىر اي اكتيۆ بولىپ تۇرادى، ءبىر اي ىشىندە جينالعان اقشانىڭ بەلگىلى ءبىر مولشەرى سايتقا قالادى دا، قالعانىن ءسىز الاسىز.

ءبىز دە وسى قوعامدىق قارجىلاندىرۋ ادىسىنە ارقا سۇيەگەلى تۇرمىز.

ءبيسميللاھ دەپ، وتكەندە ايتقان، قازاقشالاعاندا "اسار", اعىلشىنشالاعاندا "crowdfunding” شارامىزدى باستادىق. تومەندەگى سىلتەمەگە وتسەڭىزدەر، جوبامىز جايلى بەينەروليگىمىزدى تاماشالاپ، يدەيامىز تۋرالى تولىققاندى اقپارات الا الاسىزدار. سايت اعىلشىنشا، بىراق شاما كەلگەنشە قازاقشا اۋدارماسىن سىنالاپ سىيدىرۋعا تىرىستىق. قالاي بولعاندا دا، (ەگەر قاتەلەسپەسەم) Indiegogo سىندى الپاۋىت پلاتفورماداعى تۇڭعىش قازاقستاندىق ءھام ىشىندە قازاق تىلىندە اقپاراتى بار كامپانيا (كومپانيا ەمەس) بولىپ تۇر.

قىسقاسى، ءبىر اي مەرىزىم ىشىندە الاش پەن اقش-قا ساۋىن ايتىپ، فيلم تۇسىرۋگە كەرەكتى قاراجاتتى جيناۋىمىز قاجەت. ەگەر تومەندەگى جوبا-جوسپارىمىز كوڭىلدەن شىعىپ، ەپتەسەم، سەپتەسەم دەگەن نيەت تۋىپ جاتسا، مارxابات! Indiegogo-داعى پاراقشامىزدىڭ ەسىگى ءاردايىم اشىق. ارينە، كومەكتىڭ ۇلكەن-كىشىسى بولمايدى. كەز-كەلگەن كولەمگە كەپكى شەشىپ، زور العىس ايتۋعا دايىنبىز. قۇرعاق قاسىق اۋىز جىرتادى دەسەڭىز، سالىنعان سوماعا بايلانىستى سوڭىرا سيمۆوليكالىق قايتارىمى دا بولادى. سايتتا ول تۋرالى دا اقپارات بار. ودان بولەك، وسى سىلتەمەنى الەۋمەتتىك جەلىدە ءبولىسىپ، كەڭىرەك تارالۋىنا ۇلەس قوسساڭىز دا ءبىزدىڭ جوباعا ۇلكەن قولداۋ بىلدىرگەن بولاسىز. ەندەشە، كەتتىك!

Abai.kz