قوستاناي جۇرتى كەيىنگى كەزدە «قالامىز ماسكەۋگە ۇقسايتىن بولادى» دەپ قۋانىپ، قالپاقتارىن اسپانعا اتىپ ءجۇر. ماسكەۋ دەگەنى، ارينە، ارتىقتاۋ ياعني تىم اسىرەلەۋ بولار، الايدا كەلەسى جىلى شاھاردىڭ قاق ورتاسىندا كورشىمىزدىكىنەن ەشبىر كەم ەمەس قىزىل الاڭ بوي كوتەرمەك. بۇل حاباردى جاقىندا عانا وبلىس اكىمى ارحيمەد مۇقامبەتوۆتىڭ ءوز اۋزىنان ەستىپ، توبەمىز كوككە ەكى ەلى جەتپەي قالدى. «قالا ورتالىعىنداعى برۋسچاتكالار ابدەن ەسكەرگەن، ونىڭ ورنىنا قىزىلىن سالىپ، ناعىز قىزىل الاڭعا اينالدىرامىز» دەپ  سالتاناتتى تۇردە ۋادەسىن بەردى اكىم. ءبىزدىڭ اكىمنىڭ قاشاندا ءوز سوزىنە بەرىك ەكەندىگىن ەسكەرسەك، كەلەسى جىلى، اناۋ-مىناۋ ەمەس، قۇنى 430 ميلليون تەڭگە تۇراتىن  سول قىزىل الاڭدا ارمانسىز ءبىر قىدىراتىن بولامىز. ال ەگەر سونىڭ ءبىر بۇرىشىنا كرەملدىڭ شاعىنداۋ ءتۇرى مەن «كۇن كوسەم» جاتقان كەسەنەنى ورناتساق، ءتىپتى قاتىپ كەتەر ەدى. سوندا ءبىر قىزىل الاڭنىڭ جاي عانا كوشىرمەسىن ەمەس، ناعىز وزىندە جۇرگەندەي سەزىنىپ، مەرەيىمىز ءبىر ءوسىپ قالار ما ەدى... سوسىن كەلەشەك جاستارىمىز دا كورشىمىزدىڭ تاريحىنا ءسۇيسىنىپ، ناعىز ينتەرناتسيوناليست بولىپ وسسە، كەيبىرەۋلەردىڭ اسىل ارمانى ورىندالىپ تا قالار  بالكىم...

جالپى كورشىمىزگە كوزسىز ەلىكتەپ، سولارداعى جاقسى مەن جاماندى تالعامسىز قابىلداي بەرۋدە تەك قوستانايلىقتاردى عانا كىنالاۋ شىندىققا قيانات بولار. وزگەسىن بىلاي قويعاندا، الماتىدا جىبەك جولىن سول جەردە قىدىرىپ جۇرگەن جاستار عانا ەمەس، بىلايعى جۇرتتىڭ دا «ءبىزدىڭ اربات» دەگەنىن تالاي ەستىگەنىمىز بار. دەمەك، ەلىكتەۋ مەن سولىقتاۋ كوپشىلىگىمىزدىڭ بويىمىزعا ءسىڭىپ كەتكەن سىرقات بولسا كەرەك.

جايبەرگەن بولاتوۆ

قوستاناي

Abai.kz