كەشە «كتك» تەلەارناسىنان كورسەتىلگەن دەرەكتى فيلمدە كۋاگەرلەر (مۇحامەتقالي وسپانوۆ، ەرمەك شاياحمەتوۆ، بايمۇرات ساقتاعانوۆ، سەرگەي نەپروپەكين) مۇراتحان توقماديدىڭ الاياقتىق جاساۋ، ادامدارعا قوقان-لوقى كورسەتۋ، رەكەتتىك، رەيدەرلىك جولمەن باسقا بىرەۋلەردىڭ بيزنەسىن تارتىپ الىپ، بايىعانى تۋرالى جاسىرماي ايتتى.

مىسالى، م.توقماديدىڭ كۇزەتشىلەرىن دايىنداعان مۇحامەتقالي وسپانوۆ ءبىر كۇندە ەكى-ءۇش جەرگە «رازبوركاعا» باراتىندارىن اڭگىمەلەدى. ول كەيىنىرەك مۇراتحانمەن ات قۇيرىعىن ۇزگەنىنە شۇكىرلىك ەتەدى.

ەرمەك شاياحمەتوۆ – قاراپايىم جۇرگىزۋشى. 8 جىلعا جازىقسىز سوتتالىپ، تۇرمەگە وتىرىپ شىققان ەرمەك ءوزىن سوتتاعاندارعا مۇراتحاننىڭ تاپسىرىس بەرگەنىن اشىق ايتتى. ال الىپ بازانىڭ بۇرىنعى قوجايىنى بايمۇرات ساقتاعانوۆقا م.توقمادي: «ەگەر ءوزىڭنىڭ، وتباسىڭنىڭ اماندىعىن ويلاساڭ، قۇجاتقا تەز قولىڭدى قوي!» دەپ قوقان-لوقى جاساعان. ب.ساقتاعانوۆ بازاسىن قورىققانىنان مۇراتحانعا بەرۋگە ءماجبۇر بولادى. م.توقمادي بۇل جەردەن «قازسترويستەكلو» اتتى ەلىمىزدەگى ۇلكەن شىنى شىعاراتىن زاۋىت اشادى.

الايدا، بۇل زاۋىتقا مۇراتحاننىڭ دوسى – سەرگەي نەپروپەكين 1 ملن. اقش دوللارىنان استام قارجىسىن سالادى. زاۋىت اياعىنان تىك تۇرعان سوڭ، ول بار ۇلەسىنەن قاعىلىپ، جەر سيپاپ قالادى.

ءشارىپحان قايسار

Abai.kz