الما كاكىشەۆا – «ءجۇز جىلدىق ماحابباتتى» عانا ەمەس، «كوشكىن­دى» دە، «يمپەرياداعى كەش» پەن «تاڭسۇلۋدى» دا قويعان رەجيس­سەر. رەجيسسەر قويعان ءاربىر سپەك­تاكل­دىڭ كوتەرگەن جۇگى ءارتۇرلى.
سولاردىڭ اراسىندا «ءجۇز جىلدىق ماحابباتتىڭ» جۇگى رەجيسسەر ءۇشىن اۋىرلاۋ بولىپ تۇر. دراماتۋرگ پەن رەجيسسەردىڭ اراسىندا كەلىسىم بولدى ما؟ رەجيسسەر اۆتور ايتقان سىن-ەسكەرتپەلەرگە قالاي قارادى؟ سپەكتاكل وزگەرىسكە ءتۇ­سە مە؟ كوڭىلىمىزدى كۇپتى ەتكەن ساۋال­دارىمىزدى رەجيسسەردىڭ وزىنە قويدىق.

– «ءجۇز جىلدىق ماحاببات» سپەكتاكلىن قوي­دىڭىز. بىراق سپەكتاكلدىڭ ەكىنشى اكتىسى اۆتوردىڭ كوڭىلىنەن شىقپادى. دراماتۋرگ دۋلات يسابەكوۆ «سوزدەرىمدى وزگەرتتى، وقيعا مۇلدەم باسقا» دەگەن سىن ايتۋدا. پەسا نەگە اۋىتقىپ كەتتى؟

– دۋلات اعاعا ماعجاندى پەسا رەتىندە جازىپ الىپ كەلگەنى ءۇشىن ريزامىن. پەسا بولەك نارسە، ال ماعجاننىڭ ساحنالىق بەي­نەسى – مۇلدەم باسقا دۇنيە. ماسەلەن، كيىم دي­زاي­نەرىن الىپ قارايىقشى. وعان ءبىر كويلەكتەن بىرنەشە كيىم شىعارۋ قاجەت. ول ۇنەمى ءبىر عانا كيىم ۇلگىسىمەن ءومىر سۇرمەيدى. ءاردايىم وزگە ۇلگىلەردى دايىنداۋعا ارەكەت ەتەدى. سول سياقتى مەنىڭ دە ەكىنشى اكتىم ءبى­رىنشى اكتىدەگىدەن مۇلدەم بولەك. سپەك­تاك­ل­دىڭ باسىنان اياعىنا دەيىن زىليحانى سويلەتە بەرمەيمىن عوي.

– پەسا بويىنشا ەكىنشى اكتىدە نەگىزگى باسىمدىق زىليحاعا بەرىلۋ كەرەك پە؟

– ەكىنشى اكتىدە دە زىليحا بولۋى كەرەك. ونىڭ ءبارىن ءىس-ارەكەت ارقىلى شىعارۋعا تىرىستىم. ونسىزدا وقيعانىڭ ءبارى زىليحا ارقىلى ءوربيدى. دۋلات اعا «ماعجاننىڭ ولەڭدەرى كوپ وقىلدى» دەپ كىنا ارتادى. ماعجان تۋرالى سپەكتاكل قويامىن دا، ولەڭدەرىن قالاي وقىتپايمىن؟!

– اۆتور ەكىنشى اكتىدە «ماعجاننىڭ ديپلوم الۋ كەشى كورسەتىلۋ كەرەك ەدى» دەيدى. ءسىز دۋەلدى كورسەتۋگە كۇش سالعانسىز. نە سەبەپتى؟

– پەسادا گوركي بريۋسوۆتان «بۇل كىم؟» دەپ سۇرايدى. سوندا بريۋسوۆ «ول ۇزاق اڭگىمە» دەپ باستايدى. سول ۇزاق اڭگىمەنى بريۋسوۆ گوركيگە ايتىپ بەرۋى كەرەك. بىراق مەن سول ۇزاق اڭگىمەدەن قاشتىم. نەگىزى، ساحنادا اڭگى­مەنىڭ كوپ بولعانى دۇرىس ەمەس. كورەرمەندى جالىقتىرىپ جىبەرەدى. ساحنا كوبىرەك ءىس-قيمىلعا قۇرىلسا، ونىڭ ناتيجەسى دە جاقسى بولادى. سپەكتاكل كورەرمەنمەن بىرگە ءجۇرۋى كەرەك. سوندا عانا سپەكتاكلدىڭ عۇمىرى ۇزاق بولادى. ءارى ءىس-ارەكەت ارقىلى بەرىلسە، ماع­جان كورەرمەننىڭ ەسىندە ۇزاق ساقتالادى. «اقىن دا ءبىر بالا عوي، ايعا ۇمتىلعان». زىلي­حا نەگە وسىلاي دەيدى؟ ويتكەنى ماعجاننىڭ مىقتى ەكەنىن بىلەدى.

– كورەرمەن رەتىندە بىزگە دە ۇناماعان تۇسى – جاستاردىڭ ماعجاندى مويىنعا مىنگىزىپ الىپ، ساحناعا شىققانى بولدى. ماعجاندى مويىنعا كوتەرۋ ارقىلى ونىڭ بەينەسىن ارزانداتىپ العان جوقپىز با؟

– ماعجاننىڭ جيىرما جەتىگە دەيىنگى تاعدىرىن جاقسى بىلەمىز. قالعان ءومىرىنىڭ ءبارى تۇرمەدە ءوتتى. ماعجاننىڭ بەينەسى كوبىرەك زىليحانىڭ اۋزىمەن ايتىلادى. بىراق ونىڭ ءبارىن زىليحا ءبىرىنشى اكتىدە ايتىپ قويدى. ونى ەكىنشى اكتىدە تاعى ايتقىزا بەرمەيمىز عوي. «ماعجاندى نەگە مويىنعا مىنگىزىپ العان؟» دەيسىز. وسى ارقىلى ماعجان بەينەسىن اسپانعا كوتەرگىم كەلدى. ءبىز ونى كوزى تىرىسىندە توبەمىزگە كوتەرە الماي كەتكەن شىعارمىز. سوندىقتان ونى حالقى موينىنا سالىپ، الديلەسىن دەدىم. ەسەنيننىڭ ولەڭىنىڭ ورنىنا ساكەننىڭ ءانىن ايتقىزدىم. بۇل دا مەنىڭ الاش ارىستارىنا جاساعان ەرەكشە قۇرمەتىم ەدى. ەسەنيندى دە جاقسى كورەم. ولەڭدەرىن كوپ وقىدىم. ول تۋرالى تۇسىرىلگەن فيلمدەردىڭ ءبارىن قاراپ شىقتىم. الايدا ماعان الاش ارىستارىنىڭ ولەڭدەرى، اندەرى قىمبات. سول سەبەپتى دە، ولەڭدى دە وقىتتىم، ءاندى دە ايتقىزدىم.

– سپەكتاكل العاش كوركەمدىك كەڭەسكە ۇسىنىلعان كەزدە پىكىر ەكىگە جارىلدى ما؟

– كوركەمدىك كەڭەستىڭ بىرنەشە مۇشەسى بار. ولاردىڭ كوپشىلىگى سپەكتاكلدىڭ كور­كەمدىك دەڭگەيىنە جوعارى باعا بەردى. سەنسەڭىز، ولار­دىڭ ەشقايسىسىنا بارىپ، «مەنىڭ سپەك­تاكلىم مىقتى» دەپ ايتا المايمىن عوي. ولار­دىڭ وزدەرىنىڭ بەرگەن باعاسى. سپەكتاكل ءۇش رەت قويىلدى. ءاربىر قويىلىم انشلاگپەن وتۋدە.

– كورەرمەن ماعجان ءۇشىن سپەكتاكلگە بارعانىن جوققا شىعارا المايمىز عوي. قالاي ويلايسىز؟

– ارينە، كوپشىلىك ماعجاندى كورۋگە كەلەدى. ماعجان بولماسا، زىليحا دا بولماس ەدى. سپەكتاكلدى كورگەلى بەرى كورەرمەننىڭ اراسىندا اقىنعا دەگەن ەرەكشە قۇرمەت، ەرەكشە ىقىلاس پايدا بولدى. قازىرگى جاس­تار­دىڭ كوبى كىتاپ وقي بەرمەيدى. ءتىپتى ولاردىڭ اراسىندا ماعجاننىڭ ولەڭدەرىن وقىماعان­دارى دا بار. سپەكتاكلدى كورگەننەن كەيىن، ولەڭدەرىن تىڭداعاننان كەيىن اقىننىڭ كىتاپ­تارىن ىزدەي باستادى. مۇنىڭ ءوزى – ۇلكەن جەتىستىك. ماعجان گوركيدەن وقىسا، ونىڭ ءومىرى باسقا ءوربيتىن ەدى. ونىڭ سورى دا، باعى دا بريۋسوۆتان وقىعانىندا بولىپ تۇر عوي. ماعجان – ءوزىنىڭ تاعدىرىن بولجاپ قويعان اقىن. جالپى، الاش قايراتكەرلەرىنىڭ بويىندا ءبىر عانا ارمان بولدى. ول – تاۋەلسىز الاش ەلىن قۇرۋ. سول ازاتتىق جولىندا كۇرەستى. عۇمىرلارىن سارپ ەتتى. مەن نەگە ماعجاندى قويعىم كەلدى؟ ءبىرىنشى سپەكتاكل قابىل­دان­باي قويعاننان كەيىن، نامىستاندىم. «ماع­جاندى نەگە قويا المايمىز؟» دەگەن نامىس بولدى بويىمدا. تاعى دا قايتالاپ ايتام، ماعجان بولماسا، زىليحا دا بولماس ەدى. ارينە، زىليحا دا وسال ايەل ەمەس. ارقاي­سىمىز زىليحانىڭ الدىندا باس يۋگە ءتيىسپىز. ول – ماعجاندى ەرەكشە سۇيگەن، ەرەكشە قادىر تۇتقان جان.

– پرەمەرادان كەيىنگى اۆتوردىڭ سىزگە قويىپ وتىرعان تالاپتارى قانداي؟

– اۆتور ماعان، «بريۋسوۆتىڭ سوزدەرىن وزگەرتىڭىز» دەپ وتىر. ونى وزگەرتۋ قيىن ەمەس. بۇل سپەكتاكلدە بريۋسوۆتىڭ بولۋى دا زاڭ­دىلىق. ماعجاننىڭ بريۋسوۆتان وقىعاندىعى ماعان دا قاتتى اسەر ەتتى. ينتەلليگەنتسيا وكىل­دەرى وزدەرىنىڭ قوعامدا قۇبىلىس بولا­تىنىن ەرەكشە سەزەدى. بريۋسوۆ تە – قوعامنىڭ وزگەرەتىنىن الدىن الا سەزگەن ادام. دۆوريان­دىق الەمنىڭ ءبىتىپ، باسقا قوعام كەلەتىنىن بىلسە دە، ولار وتانىن ساتقان جوق. «ەست چتو-تو پوزورنوە ۆ موششي پريرودى». بريۋسوۆتىڭ وسى ءسوزى ماعان قاتتى ۇنايدى.

– سپەكتاكلدە بريۋسوۆتىڭ سوزدەرىن نەگە ورىسشا الدىڭىز؟

– دۋلات اعانىڭ پەساسىنىڭ ماتىنىندە دە ورىسشا تىركەستەر بار. «گورە وت ۋما»، «گورە وت بەزۋمستۆا». مەن ونى ويلاپ تاپقام جوق. بريۋسوۆ، تسۆەتاەۆا، ەسەنين – ورىس ادەبيە­تىنىڭ كلاسسيكتەرى. بريۋسوۆ قانداي مىقتى ادام بولعان؟! دۇنيە-مۇلكى جەتىپ تۇرعان جان نەگە شەتەلگە كەتىپ قالمادى؟ ونىڭ ءولىمى دە بەلگىسىز. ءوز ۇيىندە ولگەن دەسەدى. بىراق قان دەگەن بار ەمەس پە؟ قان ەشقايدا جىبەرمەيدى. ماعجان دا سولاي. ول ورىسشىل ورتادا وقىپ، ءبىلىم العانىمەن، قازاقى ورتاسىنان الىستاپ كەتە العان جوق. بۇكىل ولەڭدەرى قازاق توپىرا­عىنا ارنالدى.

– «دۋلات يسابەكوۆتىڭ ەمەس، ءوزىمنىڭ ماع­جانىمدى قويدىم» دەيسىز. ءبىر كەزدەرى ساتى­بالدى نارىمبەتوۆ ءوزىنىڭ مۇستافا شوقايىن قويىپ ەدى. سوندا حالىقتىڭ ماعجانىن كىم قويادى؟

– «مەنىڭ ماعجانىم» دەلىنگەنىمەن، ەلدىڭ، حالىقتىڭ ماعجانى عوي ول. ونى جەكە-دارا بولشەكتەپ، «مەنىكى» دەپ ايتۋعا بولماس.

– ارينە، ماعجاندى قويۋ كەز كەلگەن رە­جيسسەرگە وڭاي تيمەسى انىق. كوپشىلىكتىڭ تارا­پىنان وسىنداي سىن بولاتىنىن سەزدىڭىز بە؟

– كورەرمەن تاراپىنان ماعان سىن ايتىلا قويعان جوق. كوپشىلىك مەن قويعان ماعجاندى ازىرگە جىلى قابىلداۋدا. اۆتور تاراپىنان عانا ايتىلعان سىن بار. ونىڭ ءوزى ماتىنگە قاتىس­تى ايتىلىپ وتىر. مەنىڭ رەجيسسەر رە­تىن­دە مىندەتىم – سپەكتاكلدى جاساۋ. ساحنادا ميزانستسەنالار سويلەۋ كەرەك. «وبرازدى كورۋ» دەگەن بولادى. ماسەلەن، كوشەدە اعاش قۇلاپ جاتىر. ءسىز قۇر قۇلاعان اعاشتى كورەسىز. ال مەن ودان باسقا دۇنيەنى ەلەستەتۋىم مۇمكىن عوي. سول سياقتى، پەسادان دا رەجيسسەر ءبىر­نارسەنى اڭعارادى اۋەلى. سول ءوزى بايقاعان، ءوزى اڭعارعان دۇنيەسىن ساحناعا الىپ شىعادى. ساحنانىڭ ءوزىنىڭ ءتىلى بار. سول ءۇندى مەن شى­عارۋىم كەرەك. ول ءىس-قيمىل ارقىلى، مۋزىكا ارقىلى سويلەۋى مۇمكىن. تەاتر – سينتەزدىك ونەر. مىسالى، الىپ بايتەرەكتى مادەنيەت دەپ الايىق. ونىڭ بىرنەشە تارماعى بار. ونىڭ ءبىر تارماعى – ونەر. ءبىر تارماعى – ادەبيەت، ءبىر تارماعى – باق. ونەردىڭ ءوزى بىرنەشە بولىككە بولىنەدى. ول – بالەت، ول – تەاتر، ول – بي، ول – وپەرا. ءبارىنىڭ ءوزىنىڭ ءتىلى بار. تەاتردىڭ ادەبيەتتەن بولەكتىگى دە وسىندا، ياعني ساحنا تىلىندە سويلەۋىندە. ال مەن بولسام، سول تەاتردى ءوز تىلىندە سويلەتكىم كەلدى. ءىس-ارەكەتسىز، ميزانستسەنالارسىز ساح­نانى قالاي سويلەتەم؟! بۇل جەردە باستى ءرول پەسادا عانا تۇرعان جوق قوي. اۋەلگى قويىلعان سپەكتاكل ءىس-ارەكەتتەن گورى، اڭگىمەگە كوبىرەك قۇرىلعان ەدى. وندا قيمىل-قوزعالىس از بولعاندىقتان، كوركەمدىك كەڭەستەن وتپەي قالدى. ال ءبىز ءىس-ارەكەتكە كوبىرەك كوڭىل ءبولىپ ەدىك، تاعى دا سىنعا ۇشىرادىق. ميكەلاندجەلو ءبىر كۇنى بازاردان ءوتىپ بارا جاتىپ، دۇكەننىڭ الدىنداعى ۇلكەن ءبىر تاستى كورەدى. سۋرەتشى تاستى تاماشالاپ، ۇزاق تۇرىپ قالادى. دۇكەن­نىڭ ساتۋشىسى سۋرەتشىنىڭ جانىنا كەلىپ: «وسى تاستى ەشكىم العىسى كەلمەيدى. ەگەر ءسىز الار بولساڭىز، مەن تاستى تەگىن بەرەيىن. ۇيىڭىزگە الىپ كەتىڭىزشى» دەيدى. ميكەلاند­جەلو تاستى ۇيىنە الىپ كەتەدى. ءبىر جىل وتكەن­نەن كەيىن ۇلى تۋىندىسىن جاساپ شىعارىپ، ۇلكەن الاڭعا اكەلىپ قويادى. ءمۇسىندى كورۋگە ەلدىڭ ءبارى جينالادى. اراسىندا الگى ساتۋشى دا بار. سوندا ساتۋشى: «ەشكىم الماعان تاستى سەن الىپ، قالايشا مىنانداي ونەر تۋىندى­سىن جاساپ شىعاردىڭ؟» دەپ سۇرايدى. سوندا ميكەلاندجەلو: «تاستىڭ قاسىنا كەلىپ تۇرعانىمدا، ماعان يسۋس كەلىپ: «مەنى مىنا تاستان شىعارشى» دەپ سىبىرلادى» دەيدى. سول سياقتى سپەكتاكلدى قويماس بۇرىن، پە­سا­مەن تانىسىپ وتىرعانىڭىزدا، كوز الدىڭ­ىز­عا جاڭا ءبىر دۇنيەلەر پايدا بولا باستايدى. سپەكتاكلدى ويشا جوبالاي باستايسىز. ول ماعجان بولا ما، ول الدە باسقا كەيىپكەر مە، ونى ەستي ءبىلۋ كەرەك. تۆورچەستۆونىڭ قۇندى­لىعى دا وسىندا. جايدان-جاي ەشتەڭە تۋماي­دى. ماعجاننىڭ ءبىرىنشى قويىلىمى كور­كەم­دىك كەڭەستەن وتپەي قالعاننان كەيىن، مەنىڭ نامىسىم ويانعانى راس. ماعجانعا ەرەكشە ماحابباتىم وياندى. «ءجۇز جىلدىق ماحاببات­تى» شىن جۇرەگىممەن، ەرەكشە ماحابباتىممەن قويدىم. مەن مۇنى اشىق ايتا الامىن.

– ماعجانعا دەيىن دە بىرنەشە سپەكتاكل قويعانىڭىزدى بىلەمىز. رەجيسسەرلىك مەكتەپتە ۇستازىڭىز كىم بولدى؟

– مەن ءوزىمدى ازەكەڭنىڭ، ءازىربايجان مامبەتوۆتىڭ شاكىرتىمىن دەپ ماقتانىشپەن ايتامىن. رەجيسسەرلىككە باتا بەرگەن ازەكەڭ. رەجيسسەرلىك جولعا وڭاي كەلگەم جوق. اۋەلى اسسيستەنت بولدىم. ءبىراز ۋاقىت رەجيسسەردىڭ كومەكشىسى بولىپ قىزمەت اتقاردىم. اكتريسا دا بولعان كەزىم بار. ازەكەڭ ءاربىر سپەكتاكل­دەن كەيىن قاسىنا وتىرعىزىپ الىپ، بىزبەن بىرگە تالقىلايتىن. ەشقايسىمىزدى دا بالا­سىنعان ەمەس. پىكىرىمىزدى اشىق ايتقانىمىزدى قالايتىن ەدى. ول كىسى ۇنەمى ماعان «ورىن­داۋشى بولما، سۋرەتكەر بول!» دەيتىن. بىزگە رەجيسسەرلىكتى ەمەس، سۋرەتكەر بولۋدى ۇيرەتتى. ونىڭ كەمەڭگەرلىگى دە، دانىشپاندىعى دا وسىندا.

– «كوشكىن»، «يمپەرياداعى كەش»، «تاڭ­سۇلۋ» قويىلدى. بۇل رەجيسسەرلىك جۇمى­سىڭ­ىزداعى العاشقى سىنىڭىز با؟

– «يمپەرياداعى كەشتى» قويعانىمدا سەرىك اسىلبەكوۆ حابارلاسىپ، «پەسانى وسىلاي كورگەنىڭ ۇنادى ماعان» دەپ ءوز پىكىرىن ايتىپ ەدى. «يمپەرياداعى كەشتى» اكتەرلەرىم شىن جۇرەگىمەن سەزىنىپ، قۋانىپ وينايدى. «تاڭسۇلۋدا» دا سولاي. كەز كەلگەن شىعارمانى قويۋ قانشالىقتى ازاپ بولسا، ول سپەكتاكل بىتكەننەن كەيىن ساعان سونشالىقتى تۆورچەست­ۆولىق ءلاززات سىيلايدى. كەيبىر قيىندىق تۋدىراتىن ساتتەر بولادى. ونىڭ ءوزى ۋاقىت وتكەننەن كەيىن مويىندالا باستايدى. مەن سوعان انىق سەنەمىن.

– «ءجۇز جىلدىق ماحاببات» ساحنادا ازىرگە ءۇش رەت قويىلدى. كەلەسى قويىلىمدا دراماتۋرگ­تىڭ كورسەتكەن كەمشىلىكتەرىن تۇزەپ، قايتا قوياسىز با؟

– وعان مەندە قازىر ۋاقىت جوق. قازىر يوناس ۆايتكۋس سپەكتاكل قويىپ جاتىر. اۋباكىر راحيموۆتىڭ قويىلىمى ازىرلىك ۇستىندە. ءارى وزگەرتەتىن دە ارتىق دۇنيەنى كورىپ وتىرعام جوق. دراماتۋرگتىڭ سىن-ەسكەرت­پەلەرىن قاراپ، ماتىنگە وزگەرىس ەنگىزىلۋى مۇمكىن. ونىڭ وزىندە بريۋسوۆتىڭ سوزىنە عانا تۇزەتۋلەر جاسالاتىن شىعار. مۇنىڭ ءبارى ءبىر كۇندە جاسالاتىن شارۋا ەمەس. ونىڭ مۋزىكا­سىن قوسۋىڭ كەرەك، ارلەۋىڭ كەرەك دەگەندەي. بۇل قوسىمشا جۇمىستى تالاپ ەتەدى.

– رەجيسسەر رەتىندە پتۋشكينانىڭ، ۆاي­ت­كۋس­تىڭ رەپەتيتسياسىنا قاتىسىپ كوردىڭىز بە؟

– تەاتر ءبىر قازاندا قايناي بەرمەۋى كەرەك. وزگە ەل رەجيسسەرلەرىنىڭ دە قويىلىمدارىن كو­رۋىمىز كەرەك. ول ءوزىڭىزدى سالىستىرۋعا جاق­سى. ولاردىڭ قويىلىمدارىنىڭ دەڭگەيى قانداي، ءسىزدىڭ قويىلىمدارىڭىزدىڭ دەڭگەيى قانداي؟ مىنە، وسى تۇرعىدان كەلگەندە، نەدەن بيىك ەكەنىڭىزدى، نەدەن تومەن ەكەنىڭىزدى باي­قايسىز.

– قازاق رەجيسسەرلەرىنە شەتەلدەردەن ۇسىنىس تۇسە مە؟ ماسەلەن، سىزگە وزگە تەاترلار­دان شاقىرتۋ بولدى ما؟

– كونياعا بارعانىمىزدا، تۇركسوي-دىڭ توراعاسى دۇيسەن قاسەيىنوۆ ۇسىنىس جاساعان ەدى. ول كىسى يران-عايىپتىڭ «قور­قىتىن» كونيادا قويۋىمدى وتىنگەن. ازىرگە ۇسىنىس قانا. بۇل بولاشاقتىڭ ەنشىسىندەگى دۇنيە دەپ ويلايمىن.

– كەيدە سپەكتاكلدىڭ ءساتسىز شىعۋى رەجيس­سەرگە عانا ەمەس، اكتەرلەرگە دە بايلانىستى دەگەن پىكىرلەر بار. بۇعان قالاي قارايسىز؟

– «سپەكتاكلگە كوڭىلى تولماپتى» دەپ ءجيى ايتادى. وسى ءسوز ماعان ۇنامايدى. سپەكتاكل­دىڭ ءساتتى بولۋى اكتەردىڭ دە كوڭىل كۇيىنە باي­لانىستى ەمەس. ول كورەرمەننىڭ دە وزىنە تىكە­لەي بايلانىستى. كەيبىر كورەرمەن تەاترعا كوڭىلسىز كەلۋى مۇمكىن. ونىڭ ناشار كوڭىلىنە سپەكتاكل اسا جاقسى اسەر ەتە قويماسى بەل­گىلى. جاقسى كوڭىل كۇيمەن كەلىڭىزشى، سپەك­تاكل­دەن ەشقانداي كەمشىلىك بايقاماي­تى­نىڭىزعا سەرت بەرەمىن. سوندىقتان «انا سپەكتاكلگە كوڭىلى تولمادى، مىنا سپەكتاكل ناشار ەكەن» دەپ بىرجاقتى پىكىر ايتقاندارمەن كەلىسپەيمىن. ءارى ءبىر عانا پرەمەرانى كورىپ، باعا بەرۋگە بولمايدى. ءبىر قويىلىمدى بىرنەشە رەت تاماشالاعان ابزال. سوندا عانا سپەكتاكلدىڭ ءمانىن ۇعاسىز، سوندا عانا ناقتى باعا بەرە الاسىز.

اڭگىمەلەسكەن گۇلزينا بەكتاس

دەرەككوزى: «ايقىن» گازەتى