الماتى وبلىسى ءماسليحاتتىڭ كەزەكتەن تىس ءححىV سەسسياسى ءوتتى. وعان وبلىس اكىمى اماندىق باتالوۆ، وبلىستىق ءماسليحاتتىڭ حاتشىسى Cۇلتان دۇيسەمبينوۆ، باسقارما باسشىلارى، اۋدان، قالا اكىمدەرى مەن دەپۋتاتتار قاتىسىپ، سەسسيا جۇمىسىن وبلىستىق ءماسليحاتتىڭ دەپۋتاتى راحات يبرايموۆا جۇرگىزدى، - دەپ حابارلايدى اباي-اقپارات. 

كۇن تارتىبىندە قارالعان العاشقى ماسەلە الماتى وبلىسىنىڭ 2017-2019 جىلدارعا ارنالعان بيۋدجەتىنە وزگەرىستەر ەنگىزۋ جايى بولدى. بۇل تۋراسىندا وبلىستىق ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى جومارت ءامىرحانوۆ  بايانداما جاساپ،  وبلىس بيۋدجەتىن كىرىستەر بويىنشا 3,1 ملرد. تەڭگەگە ارتتىرۋ ۇسىنىلىپ وتىرعاندىعىن جەتكىزدى. «جالپى سيپاتتاعى مەملەكەتتىك قىزمەتكەر» 1 فۋنكتسيونالدىق توبى بويىنشا 496 ملن. تەڭگە سوماسىندا شىعىن كوزدەلۋدە. ونىڭ ىشىندە باسقارۋ ورگاندارىن ۇستاۋعا جانە ماتەريالدىق-تەحنيكالىق بازاسىن نىعايتۋعا 327 ملن. تەڭگە، عيماراتتى كوممۋنالدىق مەنشىككە ساتىپ الۋعا 196 ملن. تەڭگە باعىتتالۋدا. سونداي-اق، توتەنشە جاعدايلاردىڭ الدىن الۋ جانە جويۋ شارالارىن جۇرگىزۋگە، ءبىلىم، دەنساۋلىق ساقتاۋ سالاسىنىڭ اعىمداعى شىعىندارىنا قوسىمشا قاراجات ءبولۋ قاراستىرىلعان. بۇل قارجى بالاباقشالار اشۋعا، 100 ستۋدەنتكە جەرگىلىكتى بيۋدجەتتەن ءبىلىم گرانتىن تاعايىنداۋعا، 40 بىرلىك سانيتارلىق اۆتوكولىك ساتىپ الۋعا، ىلە اۋداندىق ورتالىق اۋرۋحاناسىنىڭ كۇردەلى جوندەۋ جۇمىستارىن جالعاستىرۋعا، ا جۇقپالى گەپاتيتكە قارسى ۆاكتسينا ساتىپ الۋعا، تاعى باسقا دا قاجەتتىلىكتەرگە جۇمسالماق.

الەۋمەتتىك سالا شىعىندارىنا دا 61,1 ملن. تەڭگە ءبولۋ جوسپارلانۋدا. تۇرعىن ءۇي-كوممۋنالدىق شارۋاشىلىعىنا 1,2 ملرد. تەڭگە قاراستىرىلىپ وتىر. بۇل قاراجات ەلدى مەكەندەردى اباتتاندىرۋعا، جارىقتاندىرۋعا، كوگالداندىرۋعا، سۋمەن قامتۋ جۇيەسىن جوندەۋگە، تۇرعىن ۇيلەردى جىلۋمەن قامتۋعا باعىتتالماق.  مادەنيەت سالاسىنا دا قوسىمشا 110,7 ملن. تەڭگە قاراستىرىلعان. ول قاراساي اۋدانىنىڭ شامالعان اۋىلىندا مۇراجايدىڭ اشىلۋىنا وراي 22 شتاتتىق بىرلىك ەنگىزۋگە، «رۋحاني جاڭعىرۋ» جوباسىن جۇزەگە اسىرۋ اياسىندا مادەني-كوپشىلىك شارالاردى وتكىزۋگە، مادەنيەت مەكەمەلەرىنىڭ ماتەريالدىق-تەحنيكالىق بازاسىن نىعايتۋعا جۇمسالماق. اۋىلشارۋاشىلىعى، كولىك جانە كوممۋنيكاتسيا، دەنە شىنىقتىرۋ جانە سپورت، ىشكى ساياسات سالالارىنا دا قوسىمشا قارجى ءبولۋ قاراستىرىلعان.
بيۋدجەتكە ەنگىزىلىپ وتىرعان وزگەرىستەردى دەپۋتاتتار ءبىراۋىزدان قولداپ، داۋىس بەردى.

سەسسيادا  الماتى وبلىسىنىڭ 2016-2020 جىلدارعا ارنالعان دامۋ باعدارلاماسىن جاڭا رەداكتسيادا بەكىتۋ، تالدىقورعان قالاسىنىڭ قۇرامداس بولىكتەرىنە اتاۋ بەرۋ جانە قايتا اتاۋ، قالالار مەن ەلدى مەكەندەردىڭ اۋماقتارىن اباتتاندىرۋ قاعيدالارىن بەكىتۋ، تەكسەرۋ كوميسسياسى توراعاسىنىڭ جۇمىسىنا باعالاۋ جۇرگىزۋ بويىنشا وكىلەتتىكتەردى وبلىستىق ءماسليحات حاتشىسى س. دۇيسەمبىنوۆكە جۇكتەۋ تۋرالى ماسەلەلەر قارالدى.

قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ الماتى وبلىسى بويىنشا دەپارتامەنتىنىڭ باسشىسى سەرىكباي نۇرعيساەۆ ارنايى مونيتورينگ توبىمەن اتقارىلىپ جاتقان جۇمىس جانە «تسيفرلى قازاقستان – 2020» باعدارلاماسىنىڭ جۇزەگە اسىرىلۋى تۋرالى ەسەپ بەردى.

سەسسيا جۇمىسىن قورىتىندىلاعان وبلىس اكىمى اماندىق باتالوۆ بيۋدجەتكە ەنگىزىلىپ وتىرعان وزگەرىستەردى قۋاتتاعان دەپۋتاتتارعا العىسىن جەتكىزىپ، ەندىگى ماقسات وسى قارجىنى دۇرىس يگەرىپ، دىتتەگەن ماقساتتارعا جۇمساپ، قولعا العان ءىستى ءوز دەڭگەيىندە جۇزەگە اسىرۋ ەكەندىگىن اتاپ ءوتتى. ونى وبلىستىق باسقارما باسشىلارى مەن اۋدان، قالا اكىمدەرىنە ايرىقشا تاپسىردى.

Abai.kz