ۇكىمەت باسشىسى باقىتجان ءابدىرۇلى ساعىنتاەۆ جامبىل وبلىسىنداعى ءىرى ينۆەستيتسيالىق جوبالاردى ارالاپ كوردى، دەپ حابارلايدى "اباي اقپارات" اگەنتتىگى.

جۋالى اۋدانىنداعى قۋاتتىلىعى 50 مۆت-قا دەيىنگى، ورتالىق ازياداعى ەڭ ءىرى كۇن ەلەكتر ستانساسى «بۋرنوە سولار – 1»-ءدى ارالاۋ كەزىندە باقىتجان ساعىنتاەۆقا وڭىردە جاڭارتىلاتىن ەنەرگيا كوزدەرىن دامىتۋ كەلەشەگى تۋرالى باياندالدى.

ەكى جىل بۇرىن شەتەلدىك ينۆەستورلارمەن بىرلەسىپ ىسكە قوسىلعان «بۋرنوە سولار – 1» ستانساسى بۇگىنگى تاڭدا 2,2 ملرد تەڭگەدەن استام سوماعا 73,18 ملن كۆت/ساع ەلەكتر ەنەرگياسىن وندىرەدى، بۇل بولجامدى كورسەتكىشتەردەن 10%-عا جوعارى. بۇدان وزگە، جىل سوڭىنا دەيىن قۋاتتىلىعىن 100 مۆت-عا دەيىن ارتتىرۋ كوزدەلىپ وتىر، ول قازاقستاننىڭ وڭتۇستىك وڭىرلەرىنىڭ ەنەرگيا قاجەتتىلىگىن تولىقتاي قامتاماسىز ەتۋگە مۇمكىندىك بەرەدى.
«بۋرنوە سولار-1» جشس باس ديرەكتورى نۇرلان قاپەنوۆتىڭ ايتۋىنشا، اتالعان ستانسا — ەكولوگيالىق تۇرعىدان قاۋىپسىز جوبا. سەس ىسكە قوسقان ۋاقىتتان باستاپ، ۇزدىكسىز، اپاتسىز، جابدىقتىڭ ىستەن شىعۋىنسىز جۇمىس ىستەپ تۇر.

جالپى ەلىمىزدە قازىرگى تاڭدا جيىنتىق قۋاتتىلىعى 335,8 مۆت بولاتىن جاڭارتىلاتىن ەنەرگيا كوزدەرىنىڭ 55 نىسانى قىزمەت كورسەتىپ تۇر. جەك نىساندارىنىڭ ەلەكتر ەنەرگياسىن ءوندىرۋ كولەمى ۇلعايتىلۋدا، 2017 جىلى ءوسىم 13,5%-دى قۇرادى.

سارىسۋ اۋدانىندا قۇنى $950 ملن تۇراتىن، «ەۋروحيم–تىڭايتقىشتار» جشس كولەمدى ينۆەستجوباسىن ىسكە اسىرۋ مىسالىندا، پرەمەر-مينيستر باقىتجان ساعىنتاەۆقا وڭىردە حيميا ونەركاسىبىن دامىتۋ تۋرالى باياندالدى.
جامبىل وبلىسى اكىمىنىڭ ورىنباسارى عالىمجان ءابدىرايىموۆتىڭ ايتۋىنشا، حيميا ونەركاسىبى جامبىل وبلىسىندا اسا دامىعان سالالاردىڭ ءبىرى. ءوڭىر ونەركاسىبىندەگى حيميا ءونىمىنىڭ ۇلەسى 24,6%-عا تەڭ.

«ەۋروحيم–تىڭايتقىشتار» باسشىسى دميتري ۆالىشەۆ ءوز كەزەگىندە حيميا كەشەنىن دامىتۋ كەلەشەگى تۋرالى ايتىپ بەردى.

زاۋىت قۇرىلىسى جوبالىق قۋاتتىلىعى جىلىنا 1,4 ملن توننادان استام بولاتىن مينەرالدى تىڭايتقىشتار ءوندىرىسىن ىسكە قوسۋعا مۇمكىندىك بەرەدى. ءونىمدى ورتالىق ازيا ەلدەرىنە، رەسەيگە، قىتايعا ەكسپورتتاۋ جوسپاردا بار.
جوبا ىسكە اسىرۋدىڭ ەكىنشى ساتىسىندا تۇر. ىسكە قوسۋ وپەراتسيالارىن 2020 جىلى باستاپ، جوبانىڭ تولىق قۋاتتىلىقپەن شىعۋى — 2021 جىلعا جوسپارلانعان. قازىرگى تاڭدا جوسپارداعى $750 ملن ينۆەستيتسيانىڭ $203 ملن-نان استامى سالىنعان.

جالپى ەلىمىزدە وسى جىلدىڭ 10 ايىندا حيميا ونەركاسىبى ونىمدەرىنىڭ وندىرىسىندە وڭ قارقىن بايقالادى. ءوسىم جوسپارداعى 3%-دان اسىپ، 4,8%-دى قۇرادى.

تاقىرىپقا تۇزدىق: قر يندۋستريالدى-يننوۆاتسيالىق دامۋ مەملەكەتتىك باعدارلاماسى اياسىندا جامبىل وبلىسىندا جالپى ينۆەستيتسيالار كولەمى 159 ملرد تگ بولاتىن 53 كاسىپورىن ىسكە قوسىلعان، 6 200-گە جۋىق جاڭا جۇمىس ورنى اشىلعان. وڭىرگە ينۆەستيتسيالار تارتۋ ماڭىزدى باسىمدىقتاردىڭ ءبىرى بولىپ قالا بەرمەك.
2017 جىلدىڭ باسىنان بەرى وڭىردە ونەركاسىپتىك ءوندىرىس كولەمى 226,9 ملرد تەڭگەنى، ناقتى كولەم يندەكسى — 100,6% قۇرادى. نەگىزگى كاپيتالعا ينۆەستيتسيالار كولەمى 130,7 ملرد تەڭگەنى قۇرادى، بۇل وتكەن جىلدىڭ وسى كەزەڭىندەگى كورسەتكىشتەردىڭ 100,9% قۇرايدى.

Abai.kz