قادىرلى كوكسەرەك!

قۇرمەتتى باۋىرىم، سامات! تۇنەۋ كۇنى مەن اۋرۋحانا توسەگىندە جاتقانىمدا سەنىڭ فب ارقىلى جازعان حاتىڭدى وقىپ، قاتتى تەبىرەنىپ كەتتىم. سودان بەرى ءبىراز ۋاقىت وتسە دە وي قۇشاعىندا ءجۇرمىن. ماعان، "ارقادا كۇن جىلى بولسا، ارقار اۋىپ نەسى بار؟" دەگەن ءسوزدى ەشكىم ايتا الماس. سەمەيدەن مەن قاشىپ كەتكەن جوقپىن. قۋعان ەشكىم دە جوق. بالالار: "اكە، جانىمىزدا بولىڭىز!" - دەپ جاعداي جاساعان سوڭ، كەلگەنىم راس.

سەمەيدى ويلاۋ ءار قازاقتىڭ مىندەتى. تۋعان جەرىم ەمەس پە!؟ مەن نەگە ويلامايىن... العاشقى كەزدە تۇسىمدە ءجيى كورەتىنمىن. قازىر ءسال باسقاشالاۋ. سەنىڭ جاقسى قاسيەتىڭ "ادامعا - قۇرمەت" كورسەتە بىلەسىڭ. سەن ءۇشىن جامان ادام جوق. سەمەيدە مۇلدەم جوق. ول سەنىڭ ويىڭ. باسقالار باسقاشا ويلايدى. سەمەيدى مەن ۇمىتقان جوقپىن. ۇمىتپايمىن دا... ءوزىڭ بىلەسىڭ، مەن كىتابىمدى قۇشاقتاپ ەشكىمنىڭ الدىنا بارمايتىنىمدى. ماقتاۋ كۇتپەيمىن. جاس كەزىمدە ءبارى دە بولدى عوي. قازىرگى تىرلىك، مۇلدەم باسقاشا.

كوكسەرەگىم، سەمەيدە ءانشى-كۇيشىلەردى ايتپاعاندا، تالانتتار وتە كوپ. كوپ بولعانى جاقسى. مۇحتاربەك كاريموۆ، امانتاي يسين، اسان وماروۆ ت.ب. اعالارىمىز باس بولىپ، راحات التاي، قايرات سابىرباي، ءساتجان كارىپجانوۆ، ماقسات اۋباكيروۆ، ايجارىق ابىلقاسىموۆ، سەرىك جۇماتوۆ، مۇرات تاستاعانوۆ ت.ب. جىگىتتەردىڭ قالامى قۋاتتى دەپ بىلەمىن. باعالايمىن. پەندەشىلىكتەرى جوق، جۇرەگى تازا ازاماتتار. وسى تالانتتاردىڭ باسى قوسىلىپ، تىزە بۇگىپ، ىسكە كىرىسسە الدىمىزدا المايتىن اسۋ بولماس ەدى. ول ءۇشىن ادەبي ورتا كەرەك. ويلانىپ-ويلانىپ، امانشىلىق بولسا، "ناۋرىز" مەرەكەسىنە قارسى سەمەيدە ءبىر جيىن وتكىزسەك دەگەن ويىم بار... ماقساتىم - بارىمىزگە ورتاق ءبىر جۋرنال اشساق. بۇل ۇلكەن باستاما بولار ەدى. ءوزىڭ باسى-قاسىندا بولساڭ.

سەمەيىمە ارناپ مەن "ۇلكەن ءبىر جوبا جاساپ جاتىرمىن". ناۋرىزعا دەيىن ءبىتىپ قالار. تالانتتى ادامنىڭ جاۋى - ورىندى-ورىنسىز ماقتاۋ. جازعانى ءبىر بولەك. تۇسىنكسىز بولسا دا ادامداردى، قوعامدى "تابىندىراتىن" ادامدار بولادى. بۇل ۋاقىتشا...

...ءدىنىن، ءتىلىن قادىرلەگەن ادامعا قوعامنىڭ دا قۇرمەتى ەرەكشە. تالانتتى جاننىڭ "اقىرىن ءجۇرىپ، انىق باساتىن", قالامگەرلەردىڭ باعى جاناتىن كەز كەلدى بۇگىندە... اباي اتامىز ايتادى،
"اۋەلدە ءبىر سۋىق مۇز - اقىل زەرەك،
جىلىتقان تۇلا بويدى ىستىق جۇرەك.
توقتاۋلىلىق، قالىپتى، شىدامدىلىق -
بۇل قايراتتان شىعادى، بىلسەڭ كەرەك..." دەگەن ولەڭ جولدارىندا ءبىزدىڭ قاتارىمىزعا كەرەك اسىل ماعىنا بار.

ال، جارايدى، كوكسەرەگىم. امان بول، كەش جاۋاپ جازعانىما رەنجىمە...
سەمەيگە ءبىز كەرەك بولماساق تا، ءبىزدىڭ ارقا تىرەگىمىز - سەمەي!
سەمەيگە جانى اشيتىن ازاماتتارعا سالەم...

تالعات كەڭەسباەۆ

Facebook-تەگى پاراقشاسىنان