قورقامىن... جاڭا جىلدىڭ جاقىنداعانى جۇرەگىمە ۇرەي ۇيالاتادى. نەگە دەيسىز بە؟ مۇمكىن ءسىز ءۇشىن جاڭا جىل ۇلكەن مەيرام، عاجايىپقا تولى كەز شىعار، بىراق مەن ءۇشىن ولاي ەمەس. ويتكەنى وسى ءبىر قارعىس اتقىر مەرەكەگە دايىندىق باستالا سالىسىمەن، ادامدار توپ-توبىمەن كەلىپ مەن سەكىلدى شىرشالاردى كەسە باستايدى. كەيىننەن ۇيلەرىنە اكەلىپ، ۇستىمىزگە قىتايدىڭ سالپىنشىقتارىن تاعىپ، شوشاق-شوشاقتارىن ءىلىپ بەرەكەمىزدى قاشىرادى. جارقىراعان ءتۇرلى-ءتۇستى شامدارى تاعى بار.

سول بالەكەتتىڭ كەسىرىنەن ورتەنىپ كەتەم بە دەپ زارەم ۇشادى. بالالار بولسا مەنى شىر اينالىپ ءان سالىپ، بي بيلەپ ءماز. تۋرا ءبىر سايقىمازاق تاۋىپ العانداي. ول ول ما، قالانىڭ قاق ورتاسىنا اپارىپ قوياتىندارى دا بار. جانىڭنان وتكەن ءاربىر جان سۋرەتكە ءتۇسىپ تىنىم بەرمەيدى. شىرشامەن تۇسكەن سۋرەتتى Instagram, Facebook-كە سالۋ قازىر «مودا». وعان دا كوندىك.

الايدا مەن ءبىر نارسەنى تۇسىنبەيمىن. وسى قازاقتار جەلتوقسان باستالماي جاتىپ شىرشامەن ارپالىسقانشا، نەلىكتەن تاۋەلسىزدىك كۇنىنە دايىندىققا سونداي ىجداعاتتىلىقپەن كىرىسپەيدى؟ جاپ-جاسىل ەتىپ ءبىزدى مەرزىمىنەن بۇرىن قويعانشا، حالقى ءۇشىن وزدەرىن قۇربان ەتكەن جانداردىڭ سۋرەتتەرىن ءىلىپ، رۋحىنا قۇرمەت بىلدەرسە نۇر ۇستىنە نۇر بولار ەدى. نەگە وسى تۋرالى ويلانبايدى ەكەن... اي، بىراق، ولاردىڭ ويلانۋعا دا ۋاقىتتارى جوق قوي. ويلانىپ وتىراتىن بولسا، كىم شىرشانى بەزەندىرەدى؟ كىم داستارحانعا تاماق الادى؟

تاماق دەمەكشى، ءبىر اي بۇرىن جاڭا جىلعا دەپ توڭازىتقىشتى تولتىرىپ قويادى، بىراق جاڭا جىل جەتەم دەگەنشە تاماقتىڭ ءبارى ءبىتىپ، كەيىن كەرى بازارعا جۇگىرەدى. ءۇيتىپ-ءبۇيتىپ جاڭا جىلدى دا قارسى الادى.  سودان سوڭ مەنىڭ قاجەتىم بولماي، ءبىر قاراسام قوقىستا جاتامىن. جىل سايىن كورەتىنىم وسى. سوندا بۇنى ءومىر دەۋگە كەلە مە؟..

قۋانىش جۇباندىقوۆ

Abai.kz