الاش قايراتكەرلەرىنىڭ جاپونداردى نەگە ۇلگى تۇتقانىن ەندى ءتۇسىندىم. بۇل جەردە تەحنولوگيالىق پروگرەستەن باسقا، ودان دا ءبىر كۇردەلى نارسە جاتقان ءتارىزدى.

ءيا، جاپوندار ازيا ەلدەرىنىڭ ىشىندە ەۋروپالىقتارمەن ءبىرىنشى بولىپ ءوندىرىس جاعىنان يىق تىرەستىرىپ دامىعان مەملەكەت. الاشتىقتاردى ەڭ الدىمەن جاپون حالقىنىڭ وزىندىك بولمىسى قىزىقتىرعان سەكىلدى.

جاپونيا ەشقاشان بىرەۋگە باعىنباعان مەملەكەت. ەكىنشى دۇنيەجۇزىلىك سوعىستا جەڭىلىپ قالعانىمەن، تاعى ەشكىمگە بودان بولعان جوق. سوعىستان كەيىن تەز ەس جيىپ، از ۋاقىتتا قايتادان ەكونوميكاسى دامىعان مىقتى مەملەكەتكە اينالىپ شىعا كەلدى. ساعى سىنعان جوق.

الاشوردالىقتاردى جاپونداردىڭ وسىنداي ءورشىل، جاسامپاز رۋحى قىزىقتىرعانداي بولىپ كورىنەدى. بىرەۋگە بودان بولعان ەلدە ءبارىبىر قۇلدىق مىنەز قالىپتاسادى. 99 قازاقتىڭ ءبىر ورىسقا بولا ورىسشا سويلەپ كەتەتىنى – تۋرا سونداي قۇلدىق پسيحولوگيا.

ءبىز قازىر كوزى قىسىق كورشىمىزدەن قاۋىپتەنەمىز. قىتايدان ورىستار دا سەسكەنەدى. ال بىراق سول قىتايلار جاپوندارمەن كەزدەسكەندە، اۋزىنان ءسوزى، قوينىنان ءبوزى ءتۇسىپ، كادىمگىدەي قالتىراپ قالادى ەكەن. ءبىر جاپون تۇرعان جەردە، ءبىر توپ قىتاي سونىڭ قيمىلىن باعىپ، تىپ-تىنىش تۇراتىن كورىنەدى.

ءبىز قازىر الاشوردالىقتاردى كۇنشىعىس ەلىنىڭ جەتىستىگىنە قىزىققان دەپ بىرجاقتى ويلاپ جۇرگەندەيمىز. مۇمكىن ولار جاپوننىڭ وسىنداي ەرەكشە مىنەزىن بىزدەن بۇرىن بايقاپ قويعان شىعار، كىم بىلەدى؟! ويتكەنى ولار رۋح ماسەلەسىن، ازاتتىق تاقىرىبىن وتە كوپ قوزعاعان ەدى عوي...

جولىمبەت ماكىش

Facebook-تەگى پاراقشاسىنان