ءيتتىڭ قىلشىعىنان تۇنعان قىلاۋداي جالت-جۇلت ەتكەن دۇنيە-اي. ولشەۋلى عۇمىر شاينەكتىڭ شۇمەگىنەن توگىلگەن شايداي-اۋ، سارىلداپ اعىپ بارىپ ەڭ سوڭىنا جەتكەندە قور ەتەدى دە، بىتەدى. بەلبەسىكتە ۋىز بولىپ شايقالىپ، تالبەسىكتە ءسابي ىڭگاسىمەن تەربەلىپ، ەلبەسىكتە ازامات بولىپ ەر جەتىپ، ماڭگىلىك جەر-بەسىگىنە ادام قالپىندا كەتتى.

قيماستىق سەزىم قيناعانىمەن ولشەۋلى ءومىردىڭ ءدام-تۇزىنىڭ بىتەرىنە ەشكىم اراشا بولا المايدى ەكەن عوي... اعا ۇرپاقتىڭ ىزىمەن كەلگەن، سولاردىڭ داستۇرىمەن، دارىسىمەن ءوسكەن بۇگىنگى تەاتر ونەرىنىڭ ۋىعىن كوتەرىپ تۇرعان نەگىزگى تىرەۋىنىڭ ءبىرى - قۇمان اعام دا الىس جولدىڭ ۇزاعىنا جول تارتتى. كوزدىڭ جاسىمەن، كوكىرەك جانىمەن ەگىلتىپ، قيماستارىنىڭ قابىرعاسىن سوگىلتىپ كەتتى.

انشوك ء(انۋار) پەن اشكون ء(اشىرالى) اعام، ۋايس، مەيىرمان اعالارىمدى ساعىندىڭ با، جان-اعاۋ؟ جاندارىنا شاقىرعان بولار. سوڭعى رەت اعام قوڭىراۋ شالىپ (ەكەۋمىز ءبىر سپەكتاكلدە ءبىر رولدە ويناۋشى ەدىك...) "رۇقسات بەرسەڭ، وسى جولى ءوزىم ويناسام",- دەپ ءوتىنىپ ەدى. دۇنيەدەن وتەرىن بىلگەن ەكەن عوي... جۇدىرىقتاي جۇرەگىن ونەرگە، وزگەگە، وزىنە اياماي اۋىرتتى-اۋ. كورنەكى ونەردى كوركەيتەتىن كوركەم ادامدار بولادى. بىراق سوعان ءمان بەرۋگە قۇلىقتى ەمەسپىز. قازاقتىڭ ارعى-بەرگى تاريxىندا تالاي جاقسىلار ءوتتى عوي. بىراق، اعا، ءسىزدىڭ ورنىڭىز مەن ءۇشىن ەرەكشە. ساxنا - تۇلعالاردىڭ تۇعىرى. بىراق اكتەر بىتكەن تۇلعا ەمەس. ساxناعا شىققاننىڭ ءبارى ساڭلاق ەمەس. ءسىز كينو مەن تەاتر ونەرىن تەل ەمگەن ناعىز ساڭلاقسىز. ءبىزدىڭ قوعام اتاقپەن اۋىرىپ جاتقاندا ءسىز ءوزىڭىز سۇيگەن تەاتر مەن ونەردىڭ ديدارىنا داق تۇسىرمەۋدىڭ امالىن ىزدەۋشى ەدىڭىز. سازعا دا، انگە دە، جانى قۇمار، جان-اعاۋ، سىزدەن الارىمىز كوپ ەدى، قايتەيىن...

تىرلىگىمدە قادىرىڭە جەتە الماسام كەش، اعا. جاقسى ادامنىڭ ولگەن كۇنى بولمايدى، اعا، تەك تۋعان كۇنى بولادى. سوعان سەنەم... كۇنشىعىس ەلىنە تۋرا ءسىز ومىردەن وتكەن كۇنى ءوزىڭىز سۇيگەن ونەردىڭ تۋىن قۇلاتپاۋ ءۇشىن، قازاقتىڭ مەرەيىن اسىرۋ ءۇشىن الدىن الا جوسپارلانعان ىسساپارعا كەتىپ بارا جاتقانىمىز وسىنىڭ دالەلى... قازاق xالقى، قازاق تەاترى باردا ءسىز ولمەيسىز. رۋxىڭىز ەلمەن بىرگە جاسايدى.

قاتال ۋاقىت جەر باسىپ جۇرگەن پەندەسىن كوزدەن جاسىرسا دا، ونىڭ قوعام يگىلىگىنە سىڭىرگەن ەڭبەگىن تىعىپ تاستاۋعا دارمەنسىز. سىزدىڭ ساxناداعى بەينەڭىز xاس شەبەردىڭ قولىنان شىققان مۇسىندەي بولىپ، كوزكورگەندەردىڭ كوڭىل-قيالىندا جارقىراپ تۇرماق.

...ماعجانىمدى ەرەكشە جاقسى كوردىڭىز. "دايىن اكتەر عوي، وقۋدىڭ نە كەرەگى بار وعان!؟ رەجيسسەرلىككە بەرۋىڭ كەرەك ەدى", - دەۋشى ەدىڭىز جاناشىرلىقپەن... "اي، بەكجان، شال بولىپ جاقسىلاپ ءبىر بوقتاشى مەنى! اقساقال ابىزداردى ساعىنىپ ءجۇرمىن",- دەۋشى ەدىڭىز. ەندى مەن ءسىزدى ساعىنام... ساعىنتاسىز ءالى... ەڭ وكىنىشتىسى، ءوزىڭىز جاقسى كورگەن باۋىرىڭىزدان ءبىر ۋىس توپىراق بۇيىرمايتىنى... جالعان دۇنيە-اي... باقۇل بولىڭىز، اعا...

بەكجان تۇرىس

Facebook-تەگى پاراقشاسىنان