نەگە ءبىز؟
- نەگە ءبىز ءوز كەمشىلىگىمىزدى تۇزەتپەي، وزگەدەن كەمشىلىك ىزدەۋگە قۇمارمىز؟
- نەگە ءبىز بولىنگەندى جاقسى كورەمىز؟
- نەگە ءبىز ناۋرىز مەيرامىندا اعاش وتىرعىزىپ، جاڭا جىل مەرەكەسىندە قايتا كەسىپ الامىز؟
- نەگە ءبىز اتا-بابامىزدىڭ مىقتىلىعىن ايتامىز دا، سولارداي مىقتى بولۋعا تىرىسپايمىز؟
- نەگە ءبىز ۇل-قىزدارىمىزدىڭ تاربيەسىنە ەمەس، تاماعىنىڭ توق، كيىمىنىڭ كوك بولۋىنا كوپ كوڭىل بولەمىز؟
- نەگە ءبىز اراق پەن تەمەكىنىڭ زيان ەكەنىن بىلە تۇرا سول نارسەلەردەن ارىلا الماي كەلەمىز؟
- نەگە ءبىز وزگە ەلدەردىڭ جامان قىلىقتارىن تەز ۇيرەنىپ، جاقسى جاقتارىن ۇيرەنبەيمىز؟
- نەگە ءبىز سمارتفوننىڭ بەتىن ساعاتتاپ سيپاپ، كىتاپ وقۋعا كەلگەندە ۋاقىت تاپپايمىز؟
- نەگە ءبىز ادىلەتسىزدىكتى كورىپ تۇرساق تا ۇندەمەيتىن بولدىق؟
- نەگە ءبىز وزىمىزدەن باسقا ەشكىمگە كەرەك ەمەس انا تىلىمىزدە سويلەۋدى ار ساناپ، وزگەنىڭ تىلىندە سويلەۋدى ابىروي كورەمىز؟
- نەگە ءبىز «ىشىمە سىيعان قىزىم، سىرتىما دا سىيادى» دەپ، ءوز قىزىمىزدىڭ قايتىپ كەلۋىنە، «ەكىنشى رەت ۇيلەنگەندە تۇرعان نە بار ەكەن» دەپ ۇلدارىمىزدىڭ اجىراسۋىنا جول اشامىز؟
- نەگە ءبىز بىرەۋدى ماقتاساق جەر-كوككە سىيدىرمايمىز، ال جامانداساق جەرگە تىعىپ جىبەرەمىز؟
- نەگە ءبىز ەتەك-جەڭىن قىمتاپ، ارىن ساقتاعان اياۋلى قىزدارىمىزدى سىناپ، كۇن بەرمەيمىز دە، ەتەگىن اشىپ، ارىن ساتقان، ۇيدە وتىرىپ بالا تاپقان، ۇياتسىز قىزدارىمىزدىڭ ءىس-ارەكەتىنە بەيجاي قاراپ جۇرە بەرەمىز؟
- نەگە ءبىز ۋاقىتىم بوس ءوتتى دەپ ۋايىم جەمەيمىز؟
- نەگە ءبىز، ەركەكتەر وسەك ايتۋدا ايەلدەردەن اسىپ تۇسەمىز؟
- نەگە ءبىز بۇل دۇنيەنىڭ جالعان ەكەنىن بىلسەك تە، وسى ومىردە ماڭگى قالاتىنداي تايراڭداپ جۇرەمىز؟
- نەگە ءبىز بەتىمىزگە شىندىق ايتىلسا شەكە-باسىمىز تىرىسىپ، ماقتاۋ ەستىسەك ءماز بولامىز؟
- نەگە بىزدە جەمقورلار تەمىر توردىڭ ار جاعىنا توعىتىلىپ جاتسا دا، پاراقورلىقتىڭ پايىزى ازايماي تۇر؟
- نەگە وسى ءبىزدىڭ ەرتەڭىمىز تاۋسىلمايدى؟
مەنى وسى سۇراقتار مازالايدى. ال ءسىزدى شە، قادىرلى وقىرمان؟!
تۇراربەك سامەتۇلى
Abai.kz
