وتكەندە "Abai.kz" اقپاراتتىق پورتالىندا ەكىنشى دۇنيەجۇزىلىك سوعىس ارداگەرى، ايتباي اۋباكىروۆتىڭ ەسىمىن قىزىلوردا قالاسىنا قاراستى  دوسان اۋىلىنداعى  مەكتەپكە بەرۋ تۋرالى  ماقالا جاريا بولدى. دالىرەك ايتساق، جەرگىلىكتى بەلسەندىلەر پورتال رەداكتسياسىنا ءۇشبۋ حات جولداپ، وزدەرىنىڭ تىلەكتەرىن بىلدىرگەن ەدى.

مىنە، ارادا كوپ ۋاقىت وتپەي-اق، قىزىلوردا وبلىستىق ىشكى ساياسات باسقارماسىنان رەسمي جاۋاپ كەلدى. وندا اتالعان ماقالاداعى ماسەلەمەن ءجىتى تانىسىپ، الداعى جىلى ايتباي اۋباكىروۆتىڭ ەسىمىن كوشەگە بەرۋ تۋرالى ۇسىنىستى قالالىق ونوماستيكا كوميتەتىنە جەتكىزەتىنىن ايتىپتى.

قازاقتا «ەرىم دەگەن ەلى بولماسا – ەلىم دەيتىن ەرى قايدان بولسىن» - دەگەن اتالى ءسوز بار. حالقىمىز قاشاندا ارداگەرىن ارداقتاپ، اقساقالى مەن قارياسىن قۇرمەتتەپ قاستەرلەي بىلگەن جۇرت.  وتكەنىمىزدى سانادان وشىرمەي، ءبىر كەزدەرى ەل ءۇشىن، جەر ءۇشىن ەڭبەك ەتكەن اعالار قاشاندا زور قۇرمەتپەن ەسكە الىنىپ، ءتۇرلى تانىمدىق شارالار وتكىزۋ ارقىلى كەلەشەك ۇرپاققا ونەگە ەتىپ كەلەدى.

سونىمەن قاتار، ولاردىڭ ەسىمدەرىن ۇلىقتاۋ، ماڭگى ەستە قالدىرۋ ماقساتىندا جۇرگىزىلەتىن شارالاردىڭ ءبىرى - نىساندارعا، كوشەلەرگە اتاۋ بەرۋ.

بۇل رەتتە، اتاۋ بەرۋگە ۋاكىلەتتى، كەڭەسشىلىك ورگان - وبلىستىق ونوماستيكا كوميسسياسى بولىپ تابىلادى.

وبلىستىق ونوماستيكا كوميسسياسىنىڭ قۇرامىنا عالىمدار، تاريحشىلار، مەملەكەتتىك ورگانداردىڭ، قوعامدىق جانە وزگە دە ۇيىمداردىڭ، بۇقارالىق اقپارات قۇرالدارىنىڭ وكىلدەرى ەنگىزىلگەن.

اتاۋ بەرۋدەگى تۇپكى شەشىمدى كوميسسيا مۇشەلەرى داۋىس بەرۋ ارقىلى قابىلدايدى.

2015 جىلى اتاۋ بەرۋ جۇمىسىنا موراتوري جاريالاندى. الايدا، 2015 جىلدىڭ  اياعىنا دەيىن ۇلى جەڭىستىڭ 70 جىلدىعىنىڭ ماڭىزدىلىعى مەن وزەكتىلىگىن ەسكەرە وتىرىپ، كەڭەس وداعى باتىرلارى مەن ۇلى وتان سوعىسى ارداگەرلەرىنىڭ ەسىمدەرىن كوشەلەرگە، وبەكتىلەرگە ت.ب. بەرۋ جۇمىسىن توقتامنان تىس ءبىر رەتتىك قانا جۇزەگە اسىرۋعا رۇقسات ەتىلدى.

وسى رەتتە، سىر وڭىرىنەن شىققان كەڭەس وداعىنىڭ باتىرلارى تايىمبەت كومەكباەۆتىڭ ەسىمى قارماقشى اۋدانىنداعى №250 مەكتەپكە بەرىلسە، قىزىلوردا قالاسىندا ورنالاسقان تاعزىم الاڭىنداعى «باتىرلار» اللەياسىنا ءبىلىس نۇرپەيىسوۆكە ارنالعان مەموريالدىق تاقتا ورناتىلدى.

سونداي-اق، قىزىلوردا قالاسى مەن اۋداندارداعى 93 كوشەگە، 2 مەكتەپكە وڭىرىمىزدەن ۇلى وتان سوعىسىنا قاتىسقان، بىرقاتار وردەندەر جانە مەدالدارمەن ماراپاتتالعان  ارداگەرلەرىمىزدىڭ ەسىمدەرى بەرىلدى.

ا. اۋباكىروۆ ەسىمىن مەكتەپكە بەرۋ تۋرالى ۇسىنىس وبلىستىق ونوماستيكا كوميسسياسىنىڭ قاراۋىنا 2016 جىلى كەلىپ ءتۇستى.

«قازاقستان رەسپۋبليكاسىنداعى ءتىل تۋرالى» قازاقستان رەسپۋبليكاسى زاڭىنىڭ ونوماستيكا جۇمىسىنىڭ كريتەريلەرىنىڭ 25-5 بابىنىڭ 5-تارماقشاسىندا اسا كورنەكتى مەملەكەت جانە قوعام قايراتكەرلەرىنىڭ، عىلىم، مادەنيەت قايراتكەرلەرىنىڭ جانە قازاقستان رەسپۋبليكاسى مەن الەمدىك قوعامداستىق الدىندا ەڭبەك سىڭىرگەن باسقا دا ادامداردىڭ ەسىمدەرىن بەرۋ قاراستىرىلعان.

اتالعان ۇسىنىس 2016 جىلعى 22 قاراشادا وتكەن وبلىستىق ونوماستيكا كوميسسياسىندا قارالىپ، كوميسسيا مۇشەلەرى تاراپىنان قولداۋ تاپپادى.

ارينە، ا. اۋباكىروۆ اعامىزدىڭ ەلدى قورعاۋداعى ەرلىك ىستەرى مەن بەيبىتشىلىك كەزەڭدەردەگى ەڭبەكتەرىن جوعارى باعالايمىز.

الداعى ۋاقىتتا ا. اۋباكىروۆ ەسىمىن كوشەگە بەرۋ جونىندە ماسەلەنى قالالىق ونوماستيكا كوميسسياسىنىڭ قاراۋىنا  قايتا ۇسىنعان ءجون دەپ ەسەپتەيمىز.

قازىرگى تاڭدا نەگىزگى الەۋمەتتىك نىساندارعا كىسى ەسىمىن بەرۋ ماسەلەسىندە تاريحي تۇلعالار مەن قازاقستاننىڭ بەرگى تاريحىندا جالپىۇلتتىق  دەڭگەيدە تانىلعان تۇلعالار ەسىمىن بەرۋ باسشىلىققا الىنۋدا.

ا. قايرۋللاەۆ

باسقارما باسشىسى 

Abai.kz