«جەبەۋ» رەسپۋبليكالىق قوعامدىق بىرلەستىگى ەلباسىنىڭ «بولاشاققا باعدار: رۋحاني جاڭعىرۋ» باعدارلاماسى اياسىندا عالىم، شىعىستانۋشى، تاريح عىلىمدارىنىڭ دوكتورى ءنابيجان مۇقامەتحانۇلىنىڭ دايىنداپ باسپاعا ۇسىنۋىمەن ايگىلى عالىم، تاريحشى نيعىمەت مىڭجانيدىڭ «تاڭدامالى ماقالالار»، ايگىلى تاريحشى، قوعام جانە مەملەكەت قايراتكەرى زاردىقان قيناياتۇلىنىڭ «تاريحقا كوزقاراس»، «نايمان حاندىعى: تاريحى جانە مادەنيەتى ءحىى-ءحىح عع.» اتتى كىتاپتارىن شىعارىپ وتىر.

نيعىمەت مىڭجانيدىڭ قازاقتىڭ تاريحىن، الەۋمەتتىك شارۋاشىلىعىن، ەتنوگرافياسىن، ءتىلى مەن ادەبيەتىن جانە فولكلورىن زەرتتەگەن ەڭبەكتەرىنىڭ عىلىمي جانە پراكتيكالىق قۇندىلىعى قازىر دە جويىلعان جوق. ەلباسىنىڭ «بولاشاققا باعدار: رۋحاني جاڭعىرۋ» يدەياسى بويىنشا ەلىمىزدە قولعا الىنىپ جاتقان ۇلتتىق قۇندىلىقتارىمىزدى جاڭعىرتۋ يگى شارالارىنا سايكەس، عالىمنىڭ قازاقستاندا جارىق كورمەگەن ەڭبەكتەرى اراسىنان تاڭداپ  الىنعان عىلىمي ماقالالار توپتاماسى كىرگەن. جيناقتان عالىمنىڭ قازاق تاريحى، الەۋمەتتىك شارۋاشىلعى، ءتىلى، ءدىنى، ءاپسانالارى مەن فولكلورى جايلى جازعان قۇندى دا قىزىقتى ماتەريالداردى كورۋگە بولادى.

زاردىقان قيناياتۇلىنىڭ «تاريحقا كوزقاراس» اتتى جيناعىندا اۆتوردىڭ 1996-2015 جىلدارى قازاقستان باسپاسوزىندە جاريالانعان عىلىمي ماقالالارى، كەلەلى سۇحباتتارى مەن ەستەلىكتەرى ەنگىزىلگەن. جيناق ەكى تومنان تۇرادى. جيناقتان عالىمنىڭ تاريحقا جاڭا عىلىمي وي-تۇجىرىمدارىن، قوعامدىق-ساياسي كونتسەپتۋالدىق وتكىر پىكىرلەرىن، تاريحي تۇلعالار تۋرالى، كوزى كورگەن بەلگىلى ادامدار جايلى جازعان قۇندى دا قىزىقتى ماتەريالداردى وقي الاسىزدار.

«نايمان حاندىعى: تاريحى جانە مادەنيەتى ءحىى-ءحىح عع.» - ءحى-ءحىىى عاسىرلاردا التاي، حانعاي ارالىعىندا سالتانات قۇرعان نايمان حاندىعىنىڭ تاريحى مەن مادەنيەتىنىڭ قۇندى مۇرالارىن زەرتتەۋگە ارنالعان العاشقى مونوگرافيا. زەرتتەۋ جەلىسى قازاقتىڭ نايمان تايپاسىنىڭ ءحىح عاسىرعا دەيىنگى تاريحي وقيعاسىن قامتيدى. مونوگرافيادا نايمان حاندىعىنىڭ ساياسي قۇرىلىمى، ەتنودەموگرافياسى، نانىم-سەنىمى، مادەنيەتى، شارۋاشىلىعى مەن تۇرمىس سالتى جان-جاقتى تالدانعان. قازاق مەملەكەتتىلىگى تاريحى قازىردە زەرتتەلۋ ۇستىندە. قازاق مەملەكەتتىلىگىنە نايمان ۇلىسىنىڭ قوسقان وزىندىك ۇلەسى بار. اۆتوردىڭ كوپ جىل ىزدەنىستەرىنىڭ ناتيجەسىندە مەملەكەتتىلىك تاريحىمىزداعى اقتاڭداقتارىنىڭ ءبىر پاراسى بۇتىندەلىپ، «رۋحاني جاڭعىرۋ» باعدارلامامىزدىڭ اياسىنان جارىق كورىپ وتىر.

اتالعان ءۇش كىتاپتىڭ تۇساۋى 2017 جىلدىڭ 26 جەلتوقسانىندا قر ۇلتتىق كىتاپحاناسىنىڭ ۇلكەن زالىندا كەسىلەدى.

كىتاپتاردىڭ تۇساۋىن قازاقستاننىڭ حالىق جازۋشىسى قابدەش ءجۇمادىلوۆ، تاريح عىلىمدارىنىڭ دوكتورى،  قر ۇعا اكادەميگى مامبەت قويگەلدى، تاريح عىلىمدارىنىڭ دوكتورى، قر ۇعا اكادەميگى حانگەلدى ءابجانوۆ كەسەدى.

مەكەن-جايى: الماتى قالاسى اباي كوشەسى 14, ابىلاي حان داڭعىلى قىيىلىسى.

وتەتىن ۋاقىتى: 26 جەلتوقسان ، 2017 جىل.

باستالۋى: 10:00

«جەبەۋ» رەسپۋبليكالىق قوعامدىق بىرلەستىگى

Abai.kz