سوڭعى ۋاقتا ايتىسقا قاتىستى ءارتۇرلى اڭگىمەلەردىڭ شەتى شىعىپ ءجۇر.اقىن، ايتىستىڭ كوشىن قىرىق جىل سۇيرەگەن ءجۇرسىن ەرماننىڭ "جاس الاش" گازەتىنە شىققان سۇحباتىنان كەيىن قوعام ايتىستى الدە ءبىر ءدىني توپپەن بايلانىسى بارلار اينالشىقتاپ ءجۇر ەكەن دەگەن ءسوز تارادى. قىزۋ تالقى بولدى.

ال بۇگىن رەكداكتسيامىزعا ايتىسكەر اقىن، قازاقستاننىڭ حالىق اقىنى اسەلحان قالىبەكوۆانىڭ ءجۇرسىن ەرمانعا جازعان ءۇشبۋ حاتى كەلىپ ءتۇستى.

جۇرسىنگە

جالعان دەگەن جىن ۇرعان،

جاڭىلدىردى حالىقتى.

بورەنەدەي عۇمىردان،

بودەنەدەي قالىپتى.

ۋاقىت ءبارىن تەزدەتتى،

نە بار ەندى قويمايتىن.

ايتىس ەمەس كەز جەتتى،

اقىرەتتى ويلايتىن.

كوكىرەگىنەن ءمان كەتسە،

جەلمايا دا جەلمەيدى.

ءسىز بەن بىزدەر ولسەك تە،

ايتىس ەندى ولمەيدى.

ءدانىن ەگىپ بالدارعا،

قاناعات پەن اقىلدىڭ.

ايتىس دەگەن ورمانعا،

شىبىق شانشىپ جاتىرمىن.

بولادى ولار جان-جاقتى،

رۋحاني تۇلعا سامعايتىن.

اقشا دەگەن الباستى،

اينالدىرا المايتىن.

ءناپسى دەگەن بۇزىقتى،

سىندىراتىن سىزعىشتاي.

قۇمارلىق پەن قىزىقتى،

قورىمايتىن قىزعىشتاي.

ار-نامىسىن تۇلعانىڭ،

اياق-استى ەتپەيتىن.

تارى شاشقان مىرزانىڭ،

تاۋىعى بوپ كەتپەيتىن.

تاپساڭ دا اتتىڭ باسىنداي،

التىنعا جەرىك بۇل جالعان.

بايىماپتى اقىن شاشۋباي،

ءجۇزدى بەرىپ مىڭدى العان.

الەمگە اشىپ تەرەزە،

شىن جۇلدىزدار جانادى.

شەن شەكپەن، بايلىق دارەجە،

وزدەرى ىزدەپ تابادى.

جولىن بايلاپ قاساڭ ساز،

تۇرمايدى ولار سىي تىلەپ.

اۋەلدەن-اق جاسامپاز،

جان ازىعى حيكمەت.

شاكىرتتەرىم ەرجەتىپ،

قايراتتى تازا رۋحتى.

دومبىرامەن تەربەتىپ،

ۇلىقتايدى ۇلتتى.

الما اعاشتاي گۇلى كوپ،

مەن سولارمەن بىرگەمىن.

كوك تيىندىق قۇنى جوق،

ۇلدە مەنەن بۇلدەنىڭ.

اي ءجۇرسىن-اي، ءجۇرسىن-اي،

ءبىر كەزدەگى دوسىمنىڭ.

داۋ-دامايدى تىنشىماي،

قولدان جاساپ وتىرسىڭ.

-ايت، ايت دەسەڭ ۇرەتىن،

قايت، قايت دەسەڭ قايتاتىن.

مەنشىگىڭە كىرەتىن،

مىقتىلارعا ايت اقىل.

وزگەردى ءومىر جاي تۇستەن،

وتكەننىڭ ءباسى تولەنگەن.

قوشتاسساڭ دا ايتىسپەن،

قوشتاسپايسىڭ ولەڭمەن!

اسەلحان قالىبەكوۆا

قازاقستاننىڭ حالىق اقىنى

Abai.kz