يران پارلامەنتى ەلىندەگى ەرەۋىلدى جابىق تالقىلادى
يران پارلامەنتى 7 قاڭتاردا ۇكىمەتكە قارسى نارازىلىق اكتسياسىن جابىق ەسىك جاعدايىندا تالقىلادى. وندا جاپپاي تارتىپسىزدىكتىڭ سەبەبىن قاراعان.
ISNA اقپارات اگەنتتىگىنىڭ حابارلاۋىنشا، سەسسياعا يراننىڭ ىشكى ىستەر ءمينيسترى مەن قاۋىپسىزدىك كەڭەسى قاتىسۋ كەرەك بولعان.
سونىمەن بىرگە كۇن تارتىبىندە رەفورماشىل دەپۋتاتتاردىڭ ەرەۋىل كەزىندە قاماۋعا الىنعان قاتىسۋشىلارعا قۇقىقتىق كومەك كورسەتۋ جونىندەگى وتىنىشتەرى بولعان.
بيلىك ۇكىمەتتى قولدايتىن ميتينگتى بەس كۇن بويىندا جالعاستىردى. بۇل يراننىڭ بارلىق مەملەكەتتىك ارنالارىندا تولىقتاي كورسەتىلدى.
مەملەكەتتىك باق بيلىككە قارسى نارازىلىق شارالارى تولىعىمەن اياقتالدى دەپ اقپارات بەرىپ جاتقانىمەن، ازاتتىق راديوسىنىڭ سەنىمدى دەرەككوزىنە قاراعاندا، 6 قاڭتاردا يراننىڭ تەگەراندى قوسقاندا كەمىندە ون قالاسىندا ميتينگ جالعاسقان. الەۋمەتتىك جەلىلەردە پوليتسيانىڭ كوپتىگىنە قاراماستان اكتسيالار ءوتىپ جاتقانى كەڭ تارالدى.
ازاتتىقتىڭ پارسى قىزمەتىنە ("فاردا" راديوسى) تاكەستان، ەراك، سولەيمان، مەشحەد، كازۆين، رەشت، لاحيدجان جانە حومەيندە تۇنگى دەمونستراتسيالار وتكەنى جونىندە اقپاراتتار كەلدى. حومەين يسلام رەسپۋبليكاسىنىڭ نەگىزىن قالاعان اياتوللا رۋحوللا حومەينيدىڭ تۋعان جەرى.
جاپپاي ەرەۋىل كەزىندە كەمىندە 22 ادام قازا تاۋىپ، 1700-دەن استامى قاماۋعا الىنعان.
Abai.kz
