بيلىك ءبىر جىلدىڭ كوممۋالدىق قىزمەت اقىسىن الدىن الا جيناۋ سەبەبىن تۇسىندىرمەدى. ازاتلىك راديوسى دەرەككوزىنىڭ مالىمەتىنە قاراعاندا، ايماقتارداعى كوممۋنالدىق قىزمەت وكىلدەرى جوعارىدان تۇسكەن اۋىزشا تاپسىرمانى العا تارتىپ وتىر.

گازبەن قامتۋ، ءورت ءسوندىرۋ قىزمەتى، ەلەكتر، سۋمەن قامتۋ قىزمەتتەرى ءۇيدى-ءۇيدى ارالاپ، 2018 جىلدىڭ اقىسىن جيناپ ءجۇر.

جەرگىلىكتى بيلىك وكىلدەرى ءاربىر وتباسىنان گاز ءۇشىن 20 مانات (شامامەن 6 دوللار), سۋعا 24 مانات جانە ەلەكتر قۋاتىنا 30 مانات تالاپ ەتتى، دەپ حابارلادى ازاتلىكتىڭ ايماقتاعى دەرەككوزى.

"ەشكىم سەنىڭ جاعدايىڭ مەن شاعىمىڭا قۇلاق اسپايدى. تولەي الماساڭ، 100-دەن 420 ماناتقا دەيىن ايىپپۇل سالادى", - دەدى داشوعىز تۇرعىنى.

2017 جىلدىڭ اياعىندا تۇركىمەنستاندا حالىقتىڭ 25 جىل بويى تۇتىنعان جەڭىلدىكتەرىنىڭ بارلىعى الىپ تاستالىندى. بۇعان قوسا 1 قاراشادا تۇركىمەنستاندا كوممۋنالدىق قىزمەت تاريفتەرى كوتەرىلدى.

Abai.kz