كەشە استانادا «ابۋ-دابي پلازا» قۇرىلىس كەشەنىنىڭ 400-گە جۋىق جۇمىسشىسى زاڭسىز جۇمىستان شىعارىپ جىبەرىلگەنى تۋرالى مالىمدەمە جاسادى. وزدەرىنىڭ ايتۋىنشا، ولار جۇمىستان شىعارۋ تۋرالى ەشقانداي ەسكەرتۋ الماعان. اتالعان قىسقارتۋلار جايىندا تەك جۇمىسقا كەلگەن كەزدە ءبىر-اق بىلگەن.

قۇرىلىسشىلار وسى شيەلەنىسكەن جاعدايدى شەشۋ ءۇشىن «نۇر وتان» پارتياسىنا جۇگىنگەن بولاتىن.

سوعان وراي كەشە ولار پارتيانىڭ استانا قالالىق فيليالى باسشىلىعىمەن كەزدەستى.

وسى ماسەلەگە قاتىستى «نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ ءوز پىكىرىن ءبىلدىردى. ونىڭ ايتۋىنشا، «نۇر وتان» استانا قالالىق پروكۋراتۋراسىمەن بىرلەسىپ جۇمىس ىستەۋدە. بۇگىندە قالالىق پروكۋراتۋرا بۇل شەشىمنىڭ قانشالىقتى زاڭدى ەكەنىن تەكسەرۋ ۇستىندە. ماسەلەنىڭ ءمانىن انىقتاۋ ءۇشىن استانا قالاسىنىڭ اكىمدىگى دە تارتىلعانىن اتاپ وتكەن ءجون.

«وسى ماسەلەنى وڭتايلى شەشۋ ءۇشىن بارلىق قاجەتتى جۇمىستار قولعا الىندى. بۇل جاعدايدى «نۇر وتان» پارتياسى ءوز باقىلاۋىندا ۇستايدى. مۇنداي ساتتە سابىرلىق تانىتۋدىڭ ماڭىزى زور. قالانىڭ قۇقىق قورعاۋ ورگاندارى مەن اكىمدىگى دە جۇمىس ىستەۋدە. وسىلاي كۇش بىرىكتىرۋ ارقىلى بۇل كەلەڭسىز جاعدايدىڭ وڭ شەشىلۋىنە سەنىم بىلدىرەمىن»، – دەدى ماۋلەن اشىمباەۆ.

Abai.kz