جوعارعى پالاتانىڭ جالپى وتىرىسىندا پارلامەنت سەناتىنىڭ دەپۋتاتى قۋانىش سۇلتانوۆ ءبىر توپ ارىپتەستەرىنىڭ اتىنان پرەمەر-مينيستر كارىم ماسىموۆكە ساۋال جولدادى. وندا بىلاي دەلىنگەن:

جوعارعى پالاتانىڭ جالپى وتىرىسىندا پارلامەنت سەناتىنىڭ دەپۋتاتى قۋانىش سۇلتانوۆ ءبىر توپ ارىپتەستەرىنىڭ اتىنان پرەمەر-مينيستر كارىم ماسىموۆكە ساۋال جولدادى. وندا بىلاي دەلىنگەن:

«تاۋەلسىزدىگىمىزدىڭ 20 جىلدىعى قارساڭىندا بىردەن-ءبىر ەسكەرىلۋگە ءتيىستى ماڭىزدى شارالاردىڭ ءبىرى - مەملەكەتتىك رامىزدەر تۋرالى كونستيتۋتسيالىق زاڭىنىڭ ورىندالۋ بارىسىنا بايلانىستى بولماق. ۇستىمىزدەگى جىلدىڭ قاڭتار ايىندا، ول زاڭعا سوڭعى وزگەرىستەر ەنگىزگەنىمىزگە بەس جىل تولادى. زاڭدا رامىزدەرگە قۇرمەت كورسەتۋ ارقىلى قازاقستاندىق ازاماتتاردىڭ ءوز وتانىنا دەگەن قۇرمەتىن، سۇيىسپەنشىلىگىن، پاتريوتتىق رۋحىن تاربيەلەۋ باعىتىندا ۇكىمەت، اكىمدەردىڭ ناقتى شارالار قابىلداپ، جۇزەگە اسىرىلۋى كوزدەلگەن. يگىلىكتى ىستەر اتقارىلۋدا. الايدا كۇندەلىكتى ومىردە رامىزدەرگە بايلانىستى كەلەڭسىز جاعدايلار دا ۇشىراسىپ جاتادى.
كوپتەگەن ازاماتتار ءالى كۇنگە دەيىن مەملەكەتتىك ءانۇراننىڭ ءماتىنىن بىلمەيدى. سالتاناتتى جيىنداردا بۇقارا كوپشىلىكتىڭ، ءتىپتى مەكتەپ وقۋشىلارى مەن جوعارى وقۋ ورىندارىنىڭ ستۋدەنتتەرى دە ءوز داۋىستارىمەن قوسىلىپ ءانۇران ايتۋعا ۇيرەنبەگەن، ادەتتەنبەگەن. بارلىق ۇجىمداردا، ەل جينالعان كوپشىلىك شارالاردا تاسپاعا جازىلعان فونوگرامما ويناتىلادى. كوپشىلىك، ءتىپتى انت بەرەتىن مەملەكەتتىك قىزمەتكەرلەردىڭ وزدەرى دە گيمنگە ءجاي «ءان» دەپ قارايدى. ولاردىڭ ىشىندە كەيبىرەۋى زاڭدى نە مۇلدە وقىماعان، نە مويىندامايدى. ماسەلەن، ءبىر ءىرى شەنەۋنىك ءوزى قاتىناسىپ وتىرعان مارتەبەلى جيىننىڭ اشىلۋىندا، ءانۇران وينالعان ساتتە، قولىن كەۋدەسىنە قويۋدى پارىز ساناماعانىن ءوز كوزىممەن كوردىم. سونداي شەنەۋنىكتەردىڭ «كۇشەيىپ»، كوبەيىپ كەتكەنى سونشاما، ولار وزدەرىن زاڭنان جوعارى قويعىسى كەلەتىن بولۋى كەرەك.
جاقىندا قازاقستاننىڭ گاندبولشى قىزدارى ازيا چەمپيوناتىندا جەڭىسكە جەتىپ، كورەرمەندەردى قۋانتتى. وكىنىشكە قاراي، ولاردىڭ قۇرمەتىنە ءانۇران ورىندالعاندا، جەڭىمپاز قىزدار قاتار تۇرىپ، زاڭنىڭ تالابىنا سايكەس، نە تۋعا مويىن بۇرمادى، نە قولدارىن جۇرەك تۇسىنا قويمادى. قازاقستان رەسپۋبليكاسىنىڭ ءانۇرانى ورىندالعان ساتتەگى سۋرەت باسپاسوزدە جاريالاندى. وندا داۋلەت تۇرلىحانوۆ، تاعى باسقا ەكى ادام عانا قولدارىن كەۋدەسىنە قويدى، ال قالعان 23 اسپورتشى ءوز بەتتەرىنشە قاراپ تۇر. بۇل جاعداي، اسىرەسە، قازاق ەلىندە وتەتىن قىسقى ازيادا ويىندارىنىڭ قارساڭىندا كوپشىلىك كوڭىلىن الاڭداتارى حاق. جاس ۇرپاقتى، جاس سپورت شەبەرلەرىن وتانشىلدىققا، ءوز وتانىنىڭ پاتريوتى بولۋعا قالاي تاربيەلەمەكپىز ؟
ەجەلدەن امەريكا ازاماتتارى ءوز ءانۇراندارىن سوزىمەن ايتىپ، جۇرەك تۇستارىنا وڭ قولدارىن قويىپ، ماقتانىشپەن تۇراتىندارىن بۇكىل الەم بىلەدى، ءارى سوعان قۇرمەتپەن قارايدى. بۇل ءراسىم برازيليا، تاعى باسقا ەلدەردە قالىپتاسقان. باسپاسوزدە قىرعىزستان دا، وزبەكستان دا، ءوز زاڭدارىنا وسىنداي ەلەمەنت كىرگىزگەندەرىن وتانشىلدىق سەزىممەن جازدى.
وسىعان بايلانىستى، تاۋەلسىزدىگىمىزدىڭ 20 جىلدىعىنا قاتىستى وتەتىن شارالارىندا مەملەكەتتىك رامىزدەردىڭ پايدالانىلۋى، ولاردىڭ حالىقتى، اسىرەسە، جاستاردى وتانشىلدىققا تاربيەلەۋدە اتقارىپ جاتقان ناقتى جۇمىسى تۋرالى ۇكىمەت جازباشا تۇردە جاۋاپ بەرۋى قاجەت».
ەلىمىزدىڭ جوعارى پالاتاسىنىڭ جەتى سەناتورى قول قويىپ، ۇكىمەت باسشىسىنا جولداعان بۇل دەپۋتتاتتىق ساۋالدىڭ ماڭىزى زور. شىن مانىندە مەملەكەتتىك رامىزدەردىڭ قۇندىلىعىن تۇسىنەتىن ۋاقىت جەتتى.

ب.مۇراتۇلى

«ايقىن» گازەتى