اشحابادتا بانكوماتتان اقشا شەشىپ الۋ قيىنداپ كەتتى
تۇركىمەنستان استاناسىندا مەملەكەتتىك قىزمەتكەرلەر قاڭتار ايىنىڭ پلاستيك كارتالارعا اۋدارىلعان جالاقىلارىن الۋدان قيىنشىلىق كورىپ وتىر. 7 قاڭتاردا كارتا يەگەرلەرى استانالىق بانكوماتتاردان ءبىر مارتە 200 ماناتتان ارتىق شەشۋگە بولمايتىنىن بىلگەن.
"بانكوماتتارعا 10 ماناتتىق كۋپيۋرالار عانا سالىنعان. بانكومات جيىرمادان استام كۋپيۋرا بەرمەيدى. سونىڭ كەسىرىنەن ادامدار 200 مانات قانا شەشىپ الادى",- دەدى ازاتلىكتىڭ اشحابادتاعى شولۋشىسى امانمىرات بۋگاەۆ.
ونىڭ ايتۋىنشا، 1000 مانات كولەمىندەگى كۇندىزگى ءليميتتى شەشىپ الۋ ءۇشىن تۇتىنۋشىلارعا ءبىر وپەراتسيانى بەس مارتە قايتالاۋعا تۋرا كەلەدى. ونىڭ ۇستىنە بانكوماتتا اقشا تەز ءبىتىپ قالادى.
"تۇركىمەنستان" بانكى فيليالىنا جينالعانداردىڭ تورتتەن ءبىرى عانا قولما-قول اقشا شەشىپ الا العان.
تۇركىمەنستاندا سوڭعى ءتورت جىلدا مەملەكەتتىك قىزمەتكەرلەردىڭ جالاقىسىن بانك كارتالارىنا اۋدارادى. قازىر پلاستيك كارتالارعا زەينەتاقى، وتەماقى، ستيپەنديا، سونىمەن بىرگە شارۋالاردىڭ جالاقىلارىن جولدايدى.
Abai.kz
