تۇركىمەنستان ۇكىمەتى ۆاليۋتا باعامىن وزگەرتۋدى قاراستىرىپ جاتىر
تۇركىمەنستان ۇكىمەتى تۇركىمەن ماناتىنىڭ شەتەل ۆاليۋتاسىنا شاققانداعى باعامىن وزگەرتۋدى قاراستىرىپ جاتىر. بۇل جونىندە ازاتتىقتىڭ تۇركىمەن قىزمەتىنىڭ تۇركىمەنستان ورتالىق بانكىندەگى دەرەككوز حابارلادى.
اتى-ءجونىن قۇپيا ۇستاۋدى ءجون كورگەن تۇركىمەن شەنەۋنىگى جاڭا باعام "قارا بازارداعى باعاممەن" تەڭەستىرىلۋى مۇمكىن ەكەندىگىن ايتتى.
وسى اپتادا "قارا بازارداعى" اقش دوللارى باعامى بىردەن كوتەرىلىپ، تۇركىمەن ماناتى قۇنسىزدانىپ، 1 دوللار 15 ماناتقا جەتتى.
تۇركىمەن ماناتىنىڭ رەسمي باعامى 2015 جىلدان بەرى وزگەرمەي، 1 دوللار ءۇشىن 3.5 مانات بولىپ تۇر. بۇل ەلدە شەتەل ۆاليۋتاسىن ساتۋ زاڭسىز. 2016 جىلى تۇركىمەنستاننىڭ ورتالىق بانكى ۆاليۋتا ايىرباستاۋعا رەسمي تىيىم سالعان.
ازاتتىق دەرەككوزى ۆاليۋتا باعامىن كوتەرۋ، ەلدەگى ينفلياتسيانى ۇستاپ تۇرۋ ءۇشىن كەرەك دەيدى. بىراق يران جانە قىتايمەن كەلىسسوزدەن كەيىن عانا باعام دەڭگەيى بەلگىلى بولماق.
Abai.kz
