وبلىستىق جانە اۋىلىشىلىك جولداردى جوندەۋگە جەرگىلىكتى بيۋدجەتتەن جىل سايىن 25 ملرد. تەڭگەدەن استام قارجى ءبولىنىپ، جەرگىلىكتى جولداردىڭ 78%-ءىنىڭ جاعدايى ءبىرشاما جاقساردى. بۇل تۋرالى وبلىس اكىمى اماندىق باتالوۆتىڭ تۇرعىندار الدىنداعى ەسەپ بەرۋ جيىنىندا ايتىلدى، - دەپ حابارلايدى الماتى وبلىسى اكىمىنىڭ ءباسپاسوز قىزمەتى.

«نۇرلى جول» باعدارلاماسىنىڭ ارقاسىندا الەمدىك زاماناۋي ستاندارتتارعا سايكەس «باتىس ەۋروپا – باتىس قىتاي»، «الماتى – تالدىقورعان» اۆتوكولىك جولدارى جاسالدى. وتكەن جىلدىڭ وزىندە عانا كولىك قىزمەتىنىڭ كولەمى  10% ءوسىپ، 500 ملرد. تەڭگەگە جەتكەن.

وسى جىلى «تالدىقورعان-وسكەمەن»، «ءۇشارال-دوستىق»، «ۇزىناعاش-وتار»، «كۇرتى-بۋرىلبايتال» اۆتوكولىك جولدارىنىڭ قۇرىلىسى باستالىپ، سونىڭ ناتيجەسىندە ءوڭىردىڭ ترانزيتتىك الەۋەتى بۇرىنعىدان دا ارتا تۇسپەك.

جالپى الماتى وبلىسىنداعى اۆتوكولىك جولدارىنىڭ ۇزىندىعى 9334 شاقىرىم بولسا، سونىڭ 6788 شاقىرىمى – جەرگىلىكتى ماڭىزداعى جولدار.

Abai.kz